قلعة الشيخ مهران

بارت 2

#قلعة_الشيخ_مهران

سلاماً علينا فنحنُ من لم ينصفهم الزمانُ

شعله :- حنينه الاخت والله حنينه وعلى غفله يا خيه تفارگينه جانت گبل تنشد عليه احوي يبت امي وابوي أحوي .. مختاضه بعدج يو رضيتي
رحتي غفل ما ودعيتي والله عليج أنهجم بيتي

تعالو ليه يهالوادم يااععع  ولكم أخيتي الجنهه حبت ليلو سابحه بدمها الله واكبر

ركضت عليها شلت راسها وحطيته بحجري (حظني)
مسحت الدم الينزل من گصتها وحبيتها بحلگها

_جمرة خيه هنت عليج يرفيجتي وصويحبتي ولج خيه ابنيتج بعدهي بعازت حليبچ شلون تهدينها

جرني واحد من إخوتي طاح راسها مني بالگاع
ثغبت ودگيت على وجهي خرطت اخدودي شگيت زيجي التمت الوادم على صوت ثغيبي دش علينه الشيخ ساجي و ولايداته جانو زغيرونين بس فاهمين وعاگلين الازلام والنساوين والسلف بكبره دش الداري على صوت ثغيبي

ساجي :- لاحول ولاقوة الا بالله
ياهو منكم عمل هالعمله الرديه ولكم

ابو شعلة :- انه و ولادي عملناها وطمينه عارنا

ساجي :- لا بارك الله بيكم منهو انتم وتحاسبون مجان ربكم

ابو شعلة :- البت التطلع من شور أهلها وتروح تخلف نغل وطين روسهم بالگيعان لزوم تنصلخ وحرام تشم الهوا

شيخ ساجي :- حسابكم يم ربكم عسير لا بارك الله بيكم من بين الازلام

نزع الشيخ عباته وغطاها بيها وامر الازلام تطلع برى البيت بگيت بس انه والنسوان انه محنبه على جثت أخيتي وانوح وهنه يتبسبسن بينهن على الحجي الصار جدامهن

شواي وردو دشو ازلام شايلين تابوت خشب بلايه باب يلالي بيه الهوا صاحو على اثنين من الحريم اجن شالنها من الگاع وحطنها بطن التابوت وفوگاها عباة الشيخ وطلعو بيها ركضت وراهم مثل فرخة الجاهل اركض واصيح

--تتاني واحل الشوگ وياج وابد ما ترهم العشره بلياج

اركض وانه ادگ على ثداياي جلبن بيه الحريم وردني للدار اردود بقيت وحيدتي بلايه معين ادگ والطم عليها وجم حبيبه ظلن يمي لهناك ودشت عليه الحجيه ام مهران گعدت بصفي وهي تحجي بهداي ما تريد تسمع  الوادم الجاعده

ام مهران :- البگه براسج يشعلة گولي يا الله البت راحت يم ارحم الراحمين گومي على بيتج و على الفرخه التيتمت النوح والطم ما يفيد

شعلة :- انظلمت اخيتي يالشيخه والظلمها ابوي واخوتي وحگ الحمزة ابو حزامين ما عملت الشينه متزوجه على سنه الله ورسوله وفرختها بت حلال

نبت وحده من الحريم عليه ولنها تگول

_ ويلي ويلي ضلت الفرخه مسجينه للعار طول عمرها