قلعة الشيخ مهران

بارت59(ج2)

#قلعة_الشيخ_مهران

ليت الأجداد لا يكبرون ولا يمرضون ولا يشيبون
ليت رائحتهم تشترى ليت وجودهم دائم لا يرحلون

الابو حظ وبخت بالبيت
ويهنياله الحظه بحظه
الأبو لو شال بيتك ينهدم للگاع
والينهدم بيته بيا جف يكضه

.......................................

أمامة :- اخذوا بالسيارة وراحوا و اني بقيت واگعه بالگاع اريد اگوم واتحرك ما اگدر انشليت من جديد بعد ما اگدر امشي اللي جنت خايفه منه صار جدو يروح ويعوفني منو الي منو يحميني ياكلوني والله ياكلوني

صوت نينه بــ إذاني تعيط ردت وجهي اباوع عليها واگعه بالگاع وتضرب على رجليها سندت نفسي وگمت امشي خطواتي ميته ما اتحرك قوي ما اگدر رجليه ثكيله ومنمله بنفس الوقت وصلت يمها وشمرت نفسي بحظنها بجيت بجيت لحد ما نفسي نگطع ما دخلنا للبيت بقينا بالطرمه وكل وحده بينا ماخذتلها جهه تبچي بيها ساعه تقريباً واتصلوا گالوا انجلط وحالته صعبه ادعولها

گمت من حظن نينه رحت توضيت وفرشت سجادتي بقيت الليل بطوله على السجادة ما اصلي بس اشكي الربي جنت احچي وياه وادري بيه يسمعني ويشوفني

_ يارب اخذت مني أبوي وأمي وحتى أخوي وانطيتني جدو عوضتني بيه عن كل الخسارات ياربي الخاطري عدي هاي الازمه الخاطر أخوي المريض الما عنده احد غيره يتامه وهو كافلنا ومن بعده نضيع يا الله دخيل أسمك

خلص الليل و إذن الفجر محد بينا شاف النوم
و ارتاح خلصت صلاة الصبح ودگيت على عمو مَتين مره اثنين ثلاثه اربعه ماكو ميرد رجعت اتصل على عمو أياد نفس الشي ميرد تعبت من البچي والانتظار والخوف گمت طلعت محد موجود بالصاله الظاهر صلن ونامن رحت علي غرفه نينه فتحت الباب ودخلت لگيتها گاعده وعيونها حمر من گد ما باجيه

أمامة :- منو النا بعد نينه راح يروح مثل بابا زين منو يحمينا منو يدافع النا ياكلونا ياكلونا

اشرتلي بأديها اجيها رحت عليها حظنتي قوي واني حاظنتها وابچي على صدرها وهي تبچي وياي لحد ما تعبت وغفيت بدون ما أحس على نفسي ثاني يوم مو افضل من اللي قبله عمو عاصي وعمو سند و إيهاب رجعوا غسلوا وارتاحوا ساعه و راحوا للمستشفى بس وصلوا هناك اجى عمو أياد وإسلام نفس الشي غسلوا وارتاحوا ساعه و رجعوا يم جدو لليل واجوا لان ما يقبلون يبقون كلهم بالمستشفى لازم واحد لو اثنين هم اجوا و إسلام وعمو مَتين بقوا هناك اصلاً عمو مَتين ما شفنا وجهه ولا اجى ولا اكل ولا نام من اول ساعه الوگع بيها جدو الهسه

بيتنا صاير مظلم ما بيه روح الكل حزنان ومقهور محد بينا يشتهي ياكل لو يشرب خلص اليوم الثاني والوضع مثل ما هو ماكو اي تحسن حالته كل ما جالها جاي تتراجع اكثر واكثر

رحت للمدرسة مجبورة عندي امتحانات شهرية ولازم اروح امتحن شفت الولد واگف بنفس مكانه درت وجهي منه وكملت طريقي بديت بالدوام وامتحنت ونص اجوبتي غلط لان ما قارية بالاول جان زواج إيهاب وراها وگعت جدو ما صارلي مجال اقرأ