قلعة الشيخ مهران

بارت26

#قلعة_الشيخ_مهران

        في هذه الحياة ستتعلم كل شيء وحدك
                             إلا القسوة
              سيقوم شخص أخر بتعليمها لك

                           .........................

مؤنس :- شنو هالكلام ها مو عيب نحچي بهالمواضيع واحنا بهذا العمر يله بابا روحوا
العبو هناك

إيهاب :- تعاي أُمامة نلعب

مؤنس :- لاااااا ما تلعب أُمامة روحوا انتم العبوا

أُمامة :- اريد اللعب وياهم بابا

مؤنس :- لااا يله تعاي نرجع يم جدو

حجى هيج ولزم إيدي حيل ومشى بيه مثل الخايف لا اضيع منه بقيت امشي وياه واباوع عليه كُلش ضايج بس ليش ما اعرف ما جنت افتهم ولا عرفت ليش ضاج من كلامهم لان جنت صغيرة وهيج سوالف ابد مو بالي كُل همي اللعب وهذا هو

دخلنا يم جدو لگيناهم مادين سفرة طويلة والبنات يسفطون بالاكل جدو صاح علينا سوالنا مكان يمه اني على يمينه وعمو أسير على يساره وبابا گاعد بصفي التموا كُل الولد  ويانا بس البنات ما گعدن حتى بيبي شيخة انسحبت من المكان وراحت يمهن بعدني هسه لزمت الخبزة واجت هاي المرة الشفتها يم الحمام

توحيد :- يله حبيبتي أُمامة تعاي ويانا

أُمامة :- دا اتغده وين اجي

توحيد :- چا تتغدين بوسط الزلم گومي غاد يمنا زحمة تظلين هنا

مؤنس :- اني اغديها اتركيها يمي

توحيد :- زحمة تظل هنا

مؤنس :- وين الزحمة بالموضوع طفلة وجاي تتغده وكُل الموجودين أعمامها شنو العيب والغريب بالموضوع

عاصي :- شنهي نسيتي مؤنس بغدادي وكُل شيء مباح عنده

مؤنس :- ليش يا حظرت السيد الجليل البغدادين عندهم كُل شيء مباح وما ادري

عاصي :- اي وابسط مثال بنتك بوسط الزلم تتغده

مؤنس :- واذا تغدت بين أعمامها شنو العيب بالموضوع اول شيء بنتي طفلة وثاني شي تتغده بالمكان اللي يعجبها وتسوي اللي يعجبها ومحد اله يمها شيء ما دامني عايش وكافي كُل كلمة وگلت بغداد وبغداد الشين بكُل مكان حتى هنا بالقصر

_ ما ارد عليك لان جاي اكل بس راح اگلك
إن شآء الله يطول عمرك وتشوفها  تمشي على حل گصيبتها

مهران :- تسمم بلايه حس لا تخلني اهينك جدام العالم وتالي وياك تغديلها فدوة هي وگصيبتها
بسك موش سممتنا

عمو عاصي بسرعة سكت وما نطق كلمة وحدة بعد بس بابا عيونه نطت وضاج حيل ما اكل شيء ابد بس صاح على عمو أسير جابه يگعد يمه و بقى يوكل بيه