قلعة الشيخ مهران

بارت63(ج2)

#قلعة_الشيخ_مهران

وأن سألوك يوماً عن سبب تغيري
فقل كان يثق بي عمراً وخيبت
آماله بلحظة 💔

            ..................................

أمامة :- عمو مغمى عليه الدم ينزل من راسه احچي وياه احرك بيه ما يرد ولا يتحرك إسلام نفس الشي هزه حچى وياه ماكو رد التمت الناس وابو السيارة وياهم تعاونوا عليه شالوا للسيارة صعد إسلام يمه واني صعدت وياهم

_  گال أنزلي ماكو شي لا تخافين ما رديت عليه بس عمو بحظني ودموعي تنزل فوگاه الولد يمشي بكل سرعته ويحلف ميه أمام ما يدري بيه وما شافه شلون منين طلع

طلع إسلام تليفونه اتصل بعمو سند خبره و رجع وراها اتصل بعمو مَتين انطاه خبر ، اباوع العمو أسير وجهه أصفر وتنفسه قل تخبلت بقيت ابچي بصوت عالي لحد ما وصلنا للمستشفى اني فاقده على الاخير اخذوا من يمنا للطوارئ وراها دخلوا عمليات اسمعهم يگولون عمليات بس عمليات مال شنو ما اعرف ربع ساعه و وصل عمو مَتين دخل يمشي سريع وجهه مخطوف تفاجئ بوجودي ما يعرف جايه وياهم جنت گاعده بالگاع وابچي  تقدم عليه گعد على اركبة مقابيلي و لزمني من إيدي

مَتين :- مابيه شي كافي لا تبجين مريضه انتِ مو زين عليج

رفعت رأسي اباوعله عيوني صارت عينه وگتله

أمامة :- ليش مكتوب عليه اودعهم واحد واحد ليش مكتوب عليه ابقى وحدي عمو نينه تموت لو صار بيه شي ماعندها غيره تعرف شنو نينه تموت لو ما تعرف

مَتين :- ماكو شي صلي على النبي وگولي يا الله

ما رديت بس ضميت راسي بين رجليه و ابچي بحرگة گلب  گام من عندي و حچى وياه إسلام الجان واگف يمنا يستمع الكلامنا

مَتين :- شلون تجيبهاا وياك صاحي انتَ

إسلام :- صعدت ويانا وما قبلت تنزل شسويلها يعني

مَتين :- شلون هيج صار وين لگته السيارة

إسلام :- ما ادري سمعتها تصرخ طلعت عليها گالت راح للشارع طلعنا نركض وراه ما لحگت عليه انضرب بالسيارة بس والله الشارع جان فارغ ما ادري منين طلعت هاي السيارة

راح عمو يسأل والولد السايق واگف يم إسلام ويرجف خطيه وكل شويه حالف ما يدري بيه عشر دقايق واجوا إعمامي الباقين عمو إياد وعمو سند وإيهاب وياهم نفس الشي انخبصوا ويسألون لحد ما رجع عمو مَتين لگاهم جاين

سند :- ها بشر شلونه

مَتين :- زين جبسوا رجله وعنده كسر بأيده هم جبسوها و رضوض باقي جسمه

إسلام :- شو گالوا عمليه يحتاج

مةتين :- لا ما يحتاج جانوا شاكين نزيف داخلي بس ماكو شي الحمد لله

سند :- صحى لو فاقد

مَتين :- بعده فافد بس نفسه طبيعي ودگات گلبه طبيعيه شوية ويصحى