A Man of His Word

Chapter Four

NARATING na nila Albie ang beach proper ng resort pero hindi pa rin nila mahanap ang tatay ng bata na nagpakilala sa kanya na Nikolai.

Naguguluhang napa-pamewang tuloy siya. Albie squinted his eyes because of the strong sunlight. Tumingin-tingin siya sa paligid, tanaw ang nagtataasang mga alon sa dagat at mga turistang paroon at parito sa buhanginan.

Nasaan ba ang mga magulang nito? Iniiwan mag-isa ang anak nila? iritado niyang isip. Malalagot ako nito eh. Baka ma-report pa akong out of post! Hindi ko naman pwedeng pabayaan itong batang ito.

Samantala, nakayuko na si Nikolai sa hawak nitong tablet. Matapos ang ilang pag-swipe, tiningala siya nito.

"Hey, Sir!" tawag nito sa kanya.

Naeeskandalong pinanlakihan niya ito ng mga mata.

Siiiir????!

Tinaas nito ang tablet para ipakita sa kanya ang screen.

"Look very closely," wika nito. "That's my Papa."

Nilapit ni Albie ang mukha at nakita ang larawan nugn higanteng Ruso na nakita niyang kasama ng bata noong mag-check in ang mga ito sa hotel. Gwapong Ruso na mukhang nasa forties na. Sobrang tangkad. Blond. Paano niya makakalimutan ang isang lalaki kung ganoon ang features? Marami mang foreigner na guests ang Cool Waves, tinalo nitong lalaki sa larawan ang mga iyon pagdating sa tangkad at pagiging siksik ng katawan sa muscle.

And damn, that oozing sex appeal.

Naku naman, naalala na naman ni Albie nung nabangga siya sa matigas nitong katawan!

"Wow, so handsome," maluwag niyang ngiti.

Nikolai ignored his comments. Seryoso lang itong tumitig sa kanya pagkababa ng tablet.

"You search for my Papa over there," turo nito sa kaliwa nito. "And I'll go search over there," turo nito sa kabilang direksyon.

Aba, at siya pa ngayon ang inuutusan ng bata!

"But I cannot leave you alone," Albie softened his voice to appeal friendlier for Nikolai. Tinukod niy ang mga kamay sa sariling tuhod para magpantay ang mga mata nila nito. "Some people, they might, kidnap-kidnap you," pananakot pa niya.

Nikolai gave him a bored look.

"Meet me exactly here," turo nito sa gate na katapat nila bago siya iniwanan nito.

Naguguluhang tinanaw ni Albie ang bata.

Aba, sapo niya sa pisngi habang unti-unting nawawala si Nikolai sa kanyang paningin, matalinong bata. Kasingtapang din yata ng Russian Daddeh niya!

Ilang saglit pa siyang natulala bago napasighap.

"Ay, oo nga pala! Hahanapin ko si Russian Daddeh!" maarteng pilantik ng mga kamay ni Albie pataas bago tinungo ang direksyon na tinuro kanina ni Nikolai para hanapin ang tatay nito.

Tinahak ni Albie ang dalampasigan, sinisikap na maisa-isa ang mukha ng mga tao roon habang nagmamadali sa paglalakad. Mabilis niyang inaalis ang tingin sa guest kapag na-assess na hindi iyon ang taong hinahanap. Hanggang sa makarating siya sa pwesto ng mga nagva-volleyball. Inisa-isa ni Albie ang tingin sa mga ito pero naputol iyon nang tumalon ang matangkad na lalaki at malakas na pinalo ang bola.

Recognition struck him.

Wala sa sarili na tumakbo siya palapit kay Russian Daddeh para ipaalam agad dito na hinahanap ito ng sariling anak.