A Man of His Word

Chapter Fifty-Four

PALIKO NA SANA sila Albie nang umatras siya agad. Napasinghap tuloy sila Georgia.

"Shhh!" lingon niya sa mga ito.

Ang ilan ay tinakpan pa ang kanilang mga bibig.

"You saw Papa?" pabulong na tanong ni Nikolai.

Nag-gesture siya sa lahat na mag-squat kaya iyon ang ginawa nila. Then, Albie carefully peeked from behind the wall. Bumundol ang kaba sa kanyang dibdib dahil tinututukan na ng baril ni Roger si Boris.

Hindi siya makapaniwala.

Si Roger? Kalaban din si Roger ni Boris?

Muntik na siyang mapasigaw. Nagulat siya kasi nalingunan niyang nakikisilip sa likuran niya si Nikolai. Mabilis na tinakpan ng bata ang bibig niya at hinila ulit siya patago.

"I will sneak behind the post," usap nito sa kanya.

"No... no..." nag-aalalang hawak ni Albie sa mga braso nito. "Don't. It's dangerous."

"But if I hide there, I can throw my shoe at the gun. Then the gun will fall and Papa can fight that bad man," he hissed.

"What if they see you? I can do that. I'll do that."

"But I am smaller. They won't notice me."

Napailing-iling si Albie. Para siyang nanay na nagiging overprotective sa anak. 'Yung tipo na gusto niyang dito lang si Nikolai at siya na ang bahala sa lahat. Pero may katwiran din ito na mas mahahalata siya kung pupuslit ng takbo para magtago sa likuran ng may kalayuang poste.

Kung siya ba si Boris, ano ang isasagot niya sa bata?

Inalala niya kung paano alagaan ng lalaki ang anak. Hinahayaan nito na matuto ang bata. Hinahayaang mag-explore. Ginagabayan at hindi inaalalayan.

Natatakot na nahigit niya ang hininga.

"Okay," titig niya sa mga mata nito.

Nikolai gave him a nod.

"You can do it. Aim good. I believe you can do it."

"Of course," mayabang nitong ngisi bago sumilip ulit.

"Nababaliw ka na ba?" bulong sa kanya ni Georgia. "Delikado iyan. Hindi mo dapat hinayaan si Nikolai—"

"Baka mahuli na ang lahat," lingon niya sa mga ito. "At ayoko naman na malaman nilang nandito tayo."

"Pero si Nikolai—"

"Kung mahuhuli siya, nandito ako. Poprotektahan ko siya. Kapag ginawa ko iyon, bumalik na kayo sa labas. Abangan niyo 'yung mga pulis at si Piping. Kami na ang bahala ni Nikolai gumawa ng paraan para ma-delay 'yung balak gawin ni Roger."

Muntik nang mapatili ang mga bakla nang kumaripas na ng takbo si Nikolai. Tinakpan ng ilan sa kanila ang mga bibig. Ang iba naman ay mariing tinikom ang mga bibig. Dumiin ang pagkakasandal ni Albie sa pader. Abot-langit ang dasal na magtagumpay si Nikolai.

After a few still moments, he shoved in a deep breath.

Dahan-dahang sinilip niya si Nikolai at nakita na nakapagtago ito sa poste ng ligtas. Natutop niya ang bibig para hindi lumabas ang may relief na tawa. Nakatutok na ang paningin ng bata kay Roger, nag-aabang ng pagkakataon.

.

.

INTENSYON NI SLOVEN NA MAHULI ng kadenang kakabit niyon ang baril para mahila pababa at maagaw kay Roger. Kaya lang, naunang tumama sa baril ang isang sapatos. Pumulupot tuloy ang kadena sa braso ni Roger.