Unicode
" နှင်းမြ သေဆုံးမှုနဲ့ပတ်သက်ပြီး ဖုံးကွယ်ထားတဲ့ အမှန်တရားတချို့ ငါ့မှာ ရှိနေသေးတယ် ညံ။ မင်းကို အကုန်ပြောပြမှာမို့ ခဏလောက်ဖြစ်ဖြစ် ငါ့ကို အချိန်ပေးပါ။ ငါ မင်းနဲ့တွေ့ပြီး ပြောမှ ဖြစ်မှာမို့ .."
" ကျွန်တော် အခုဘယ်ကိုလာခဲ့ရမလဲ ကိုသီဟ "
တစ်ဖက်က ပြောလာသည့် စကားကြောင့် နောက်ကျိနေသောစိတ်တို့ ပို၍ ထွေပြားလာခဲ့ရသည်။ ချိန်းဆိုလာမည့်နေရာကို စောင့်နေစဉ် ရုတ်တရက် ဖြတ်ချခံလိုက်ရသည့် လေလှိုင်းဆက်သွယ်မှု။
" ကိုသီဟ။ ကိုသီဟ "
ဘယ်လောက်ခေါ်ခေါ် တစ်ဖက်က ဖြေဆိုလာတော့မည် မဟုတ်။ ပြောနေရင်း ရုတ်တရက် ဖုန်းချသွား၏။ စိတ်တွေရှုပ်လာ၍ ဘာကိုမှသေသေချာချာ မစဉ်းစားနိုင်။ သောင်တင်နေသော မေးခွန်းပေါင်းများစွာအတွက် လက်ရှိ အဖြေထုတ်ပေးနိုင်သူမှာ ကိုသီဟသာ ရှိနေသည်။ ပြန်လည်ခေါ်ဆိုမှုကို မတုံ့မဆိုင်း ပြုပေမဲ့ ဆက်သွယ်ရေးအော်ပရေတာနှင့်သာ တိုးသည်။ ထပ်မံခေါ်ဆိုဖို့ရာ မလိုအပ်သည်အထိ စက်ပိတ်ထားကြောင်း အသိပေးအသံ။
" ရေး ငါ အခုချက်ချင်း ပြန်မှဖြစ်မယ်။ မင်းကားရောင်းတဲ့ ကိစ္စပြီးမှပဲ နောက်က လိုက်ခဲ့တော့နော် "
" ခဏစောင့်ဦး ညံ။ ငါပါလိုက်ခဲ့မယ် "
" ဘယ်ဖြစ်မလဲ။ မင်းကားက .."
" မရောင်းရလည်း ဖြစ်တယ်။ ခဏစောင့်။ ငါကားသော့သွားယူလိုက်ဦးမယ် "
ကျွန်တော့်စကားအဆုံးထိမရောက်ခင်ပင် ဖြတ်ပြောလာကာ အနားကထွက်သွားသူကို လှမ်းတားချိန်ပင်မရလိုက်။ အလကားသက်သက် ကျွန်တော့်ကြောင့်နဲ့ ရေးကို အလုပ်ကိစ္စ မပျက်စေချင်။ သို့ပေမဲ့ တားပြန်ရင်လည်း ရမှာ မဟုတ်။
ကြာကြာမစောင့်လိုက်ရခြင်းက ရေးရဲ့ အမြန်နှုန်းကြောင့်ပင်။ အပေါ်ထပ်အနွေးထည်ကို လက်ထဲဖြစ်သလို ဆုပ်ချေကိုင်ထားကာ ပြန်ထွက်လာသူ။ ရပ်ထားသည့်ကားနားကို လျှောက်ခဲ့ကာ အနားရောက်ချိန် ပွင့်လာသော တံခါးတစ်ချပ်။ ကားတံခါးအဖွင့်အပိတ်တာ၀န်ကို ကိုယ့်သဘောကိုယ်ဆောင်ကာ လုပ်သွားသူအား ပြောရေးဆိုခွင့်မရလိုက်။
