FEIGHT (Famous Eight)

Chapter 14: "Feight and the Party"

ROYAL SPLASH!

'Yan ang mga salitang bumubungad sa mga estudyante ng Royalonda habang papasok sila sa venue ng acquaintance party. Casual ang suggested outfits at kailangang nakasuot ng white top ang lahat. Maliban sa Feight members na pare-parehong nakasuot ng uniform.

Hindi mapigilan ng lahat ang excitement nila habang nililibot ang tingin sa buong lugar. It's the first ever foam party in Royalonda High. Kaabang-abang talaga.

Dalawang linya ang meron sa entrance. Sa kanang linya, si Leeroi at Hannah ang naga-assist. Sa kaliwa naman si Sindrick at Chloe. Bawat estudyanteng dadaan sa entrance ay bibigyan ng glow stick, at waterproof dry bags para sa gadgets nila. Hindi allowed ang iba pang gamit sa loob.

Pagpasok mo, bubungad sa 'yo ang malawak na quadrangle na lumiliwanag ngayon. Maraming food stalls sa paligid. Meron pa ngang mini carnival sa bandang kaliwa. Naarkila nila ang rides na 'yon sa sobrang babang halaga dahil sa malaking discount na binigay ng may-ari kay Chloe. Madalas daw kasing mag-rent sa kanila si Chloe kahit walang okasyon.

Bakante ang parteng nasa harap ng stage. Ang malakas na music ay umaalingawngaw sa buong paligid dahil sa magandang set-up ng sound system na si Sindrick ang nag-ayos. Maging ang mga ilaw ay sumasabay sa tugtog. 'Yong mararamdaman mo na lang na hindi pa nagsisimula ang party pero gusto mo nang sumayaw dahil nakakaengganyo.

Naarkila rin ni Sin ang sound system at lights sa magandang halaga. Sinabi sa kanilang hindi sila pwedeng gumamit ng sarili nilang pera pero hindi sinabing hindi sila pwedeng gumamit ng mga koneksyon.

"How's the entrance?" tanong ni Ayuri sa mga kasama gamit ang walkie-talkie. Kasalukuyan s'yang nakatayo sa stage, nagmo-monitor ng mga estudyante.

"Almost done. Konti na lang ang hindi pa nakakapasok," sagot ni Leeroi.

Seryoso lang na nagsalita ulit si Ayuri matapos matanaw ang mga kasamahan gamit ang binoculars. "No pictures allowed at the entrance, Sindrick."

"Oh, come on," angal agad ni Sin. Tumalikod pa nga s'ya ng konti para makapagsalita sa walkie-talkie. "Chick 'yon, eh. 'Wag kang killjoy, Yuri."

"Sisiw, Sindrick?! Nasaan?! Nasaan?! Gusto ko ring magpapicture sa sisiw!" kumikinang ang mga matang sabi ni Chloe sa walkie-talkie.

Nawalan ng buhay ang mga mata ni Sindrick habang tinitignan si Chloe na katabi n'ya lang. Hindi n'ya maintindihan kung bakit kailangan pa nitong tanungin s'ya sa walkie-talkie kahit magkatabi lang sila. At parang nakalimutan pa nga ni Chloe na magkatabi nga lang sila.

"The whole campus is clear. Walang naliligaw," report ni Zendra. Kakatapos n'ya lang mag-ikot sa buong campus kasama ang ibang temporary members ng Safety Committee. Noong dumaan s'ya sa entrance para pumasok sa venue, pinitik n'ya pa sa noo si Chloe na nago-offer ng bunny stickers sa mga pumapasok.

Nakuha ng mga nagkukumpulang estudyante sa ibaba ng ferris wheel ang atensyon ni Ayuri. Saglit n'yang pinanood ang nangyayari bago s'ya muling nagsalita. "Zendra, a commotion at the ferris wheel."

Wala nang tanong-tanong na nilapitan ni Zendra ang mga estudyante. Ilang beses s'yang nakisiksik para makita kung anong nangyayari sa gitna.

"Anong nangyayari?" tanong ni Ayuri.

Matapos makita ng maayos ang eksena, nameywang s'ya at sinagot ang tanong ni Ayuri. "You're the prettiest girl I've ever seen in my entire life."

Mabilis na kumunot lahat ng noo ng mga nakarinig no'n. Hinablot ni Sindrick ang walkie-talkie habang bakas ang kaba sa mukha. "Sinong tinutukoy mo, Zen? Si Ayuri ba? I know, she's pretty but- Zen, are you into girls?! Tell me, you're not. Please."