#jawhara
*****
_ مامليت وانت تعيد بهاي السالفة صارلها دهر كافي لخاطر الله ارحم روحك وارحمنا ياجدي
_ لاتخليني اشتم الخلفك شنهو تراددني انت كبرت كلت بعد جدي ما احترمه
_ جدي وعلى راسي شلون ما احترمك بس والله تقهرني من اشوفك خلكك ضيج وانت اتذكر الصار قبل خمسة وعشرين سنة
جدي سالفة نسيناها ومحد بعد يتذكرها هاي هية ماتت عليش نعيد ذكرها
_هااا ي طلال تضحك على منهو اني وانت نعرف ما ماتت
_جدي رحمة لأهلك قصدي عالناس محد يدري كل اليعرفونه ماتت بحادث سيارة الله يرحمها بعد
_ الله لا يرحمها ماراضي عليها ليوم الدين
_ له له يجدي لا تعصب يرتفع ضغطك خلص أهدأ فديتك خل تولي هاي السالفة
سكت حجي عزام ومسح لحيته البيضا بيده ومسد عليها وهو صافن بوجه حفيده وجر حسرة وذبها وبخاطره هم جبير بس الله يعلم بي مايريد يحجي أكثر خلة بگلبة احسن
انتبه على واحد من الحماية دخل المضيف وبيده جهازه تقرب على طلال وانطاه الموبايل
_ سيدي يتصلون عليك من المكتب ومجاي يحصلونك
_اي موبايلي طافي شحنه خليته بالبيت عالشحن
أخذ الجهاز وطلع برى المضيف يحجي
حجي عزام صاح ورى الحماية .. منقذ تعال هنا ارد احاجيك
رجع يم الحجي وكف .. كول حجي اامرني
_ مايامر عليك بس ردت أسألك ولا توصل كلامي للنايب
_تامرني حجي صار
اشرله يكعد بسده ومن كعد تقرب يسأله ..منهي البنت الي مصاحبها هالايام
ارتبك منقذ وجفل من سؤاله شلون عرف وشنو راح يرد عليه بقى ساكت وعيون حجي عزام مركزة بعيونه
نتر بي .. خااايب احجي لا اهفك بهاي العوجية
رفعها عليه بيد ترجف يهدده
_ ها جدي شبيك على منقذ
دخل طلال وأشر للحماية بعينه رأسا نهض وطلع برى وهو يتنفس براحه لأن ميريد يحط نفسه بهيج موقف يعرف طلال ميتفاهم وهو محذرة وماكد عليه مايحجي شي
وكف طلال وأيده بجيب بنطرونه وأيده الثانية لازم الموبايل .. جدي اني طالع لبغداد محتاجيني هناك اشوفك بخير
رجع الحجي انتجى على عوجيته بيديه اثنين ورفع عينه لحفيده .. ايييه حقك تنشغل وراك بلاوي
_ ياستار الله يبعدنا ليش هيج تحجي جدي
_ والله انت ما تنحزر خانس دوم بس العلم عند الله اكول روح لاتتاخر وعوف جدك الشويب وحيده
_ لا جدي اليوم انت قافل من صدك تراك بنص اهلك وحبايبك والله مكثرهم حواليك واحفادك مايقصرون
_منهو بحالي من يوم ماتت جدتك واني وحداني هي الي جانت تفهمني ومداريتني
الله يرحمها
_الله يرحمها جدتي صنعه ايباه شكد شايلة حنية جانت
_ ايييه جانت تحبكم ماترضى على زعلكم
_ اي والله ياجدي جانت مداريتنا
يلة اترخص اني يادوب الحك ارجع
_ لاتتاخر علينا
_ أن شاء الله جدي
دنك باس راسه وأيده وطلع من المضيف صار بوجهه اسعد ابن عمه وزوج أخته ميس سلم عليه .. شنو طالع
_اي هسة اجاني اتصال مهم
_يمعود اختك محضرة الغدة خليتها واكفة تطبخ هسة تنجلط إذا متجي
DU LIEST GERADE
يُزهر عالمي بكَ
Romantikحقد وانتقام وعودة لأخذ ثار بعد سنين طويلة وبين كل هذا الظلام هناك زهرة جميلة نبتت وسط هذه الأحقاد
