Jawhara
*********
نادر باقي بالبيت الجبير مارجع اكيد ميصير يعوف صاحبه بس إخوته موجودين والكل راح ينامون بعد شنو تبقى !؟؟
لحد ساعة ثنعش انتظرته ما اجى نمت بس خاطري متكدر شنو قصده على أساس زعلان جنابه هو منو المفروض يزعل والله يا ربي
الصبح كعدت متأخرة لأن صليت الفجر ورجعت نمت باوعت الساعه تسعه اخذت موبايلي اشوفه ماكو لا رساله ولا اتصال ذبيته بالغرفه وطلعت جان قيصوري نايم بعده طلعت برا بالطرمه شغلت ماطور المي كلت اغسل الكراج كملت رجعت اسوي ريوك بينما كعد ابني جهزته وتريكنا
_ماما اروح لبيت بيبي
_ لا متروح ابقى هنا
_ ماريد ابقى
_ قيصر لاتعاند كلت لا يعني لا
_اريد بابا
_اتصل احجي وياه ،،عيني بابا ملتهي بخطاره
راح جاب موبايلي وكعد يتصل واني لميت الريوك وكفت اغسل المواعين واذني تتسمع عليهم
عكدت حاجبي والتفتت على قيصر ذب موبايلي عالميز وطلع
_ بابا يكول تعال انتظرك حتى نطلع للسوك
صحت وراه
_لاتركض ماما عمليتك فدوة اروحلك
من سمعني خفف خطواته وفتح الباب وطلع
نشفت ايدي وأخذت عباتي معلكتها ورى الباب لأن ما اطمن الا اشوفه يدخل البيت
طلعت راسي من باب الحوش
تفاجات نادر سيارته طابكه بالباب وقيصر صاعد وياه بالصدر
من شافني نادر نزع نظارته ورجع لبسها وشغل سيارته
تصرفه هذا ابد ماحبيته على شنو مادخلت للبيت
اني هماتين ما حجيت ولا سويت اي تصرف دخلت وسديت الباب ورجعت اكمل شغلي
بس داخلي حيل ضايجه
ورى ساعة جنت دا احضر شسوي للغدا دخل نادر وحده كعد عالكرسي وصاحني اكعد
بقيت واكفه وظهري للسنك
_ وينه قيصر !!؟
_ وديته بيت اهلي
_ ليش !؟
_ نكمل حجينا وماريده يسمع ويتاثر
_تمام ،، يعني الصار البارحه يحتاج نحجي بي لعد ليش عفتني ورحت حتى ما اجيت تبات هنا
_ شلون اعوف خطاري اكيد ابقى عيب من صاحبي بعدين من الفجر طلعوا
_ لا اكيد زحمه من صاحبك وأمه واخته وبالذات أخته
_ اها وهذا مربط الفرس انتي مابيها داعي تحجين عالبنت وامها البارحه ترى اني واعي لحركاتها بس ماخذها على كد عقلها
_لا بلة وحاسبها طفله ،، اصلا هاي حية وملعبة ،،وشنو تريدني انتظر واتفرج لما توكع برأسك واجيبها ضرة الية !!!!
_ شفاااء الكدامج مو زعطوط ولا حي الله رجال اني الشيخ نادر ابو قيصر
_ زين تعرف نفسك ،، لعد منو الي نطاها مجال وخلاها تتماده ترى شفتها من مدت أيدها ولزمت شماغك وجانت حيل قريبه عليك شوية وتحظنك
حجيت بعصبية ماسيطرت على نفسي لأن حيل مقهورة من البارحه وكاتمه وساكته
وكف واجى لعندي وعيونه غضب ونار تلني من ذراعي عصره وزمخ بية
_ ما اسمحلج بهيج اتهام انتي خليتيني بخانة رجال خاين ،، البنت الله يستر عليها مالي شغلة وياها من اول يوم لاحظتها تتودد الية واني احاول اتجنبها لخاطر عشرتي وصحبتي وية عبدالله اخوها
_ومنو جان وياها بالحديقة مو انت لو هاي هم اني دا اتهمك
_ طلعت من المضيف وشفت خيال بالحديقة اجيت اتاكد من. من نسوانه طالعه بالليل وجانت نوران حجيت عليها ونصحتها ترجع للبيت هذا كل الصار إذا هي استغلت هالشي لصالحها بعد الله اعلم بالنوايا
_ناااادر هدها لذراعي كاعد توجعني
YOU ARE READING
يُزهر عالمي بكَ
Romanceحقد وانتقام وعودة لأخذ ثار بعد سنين طويلة وبين كل هذا الظلام هناك زهرة جميلة نبتت وسط هذه الأحقاد
