يُزهر عالمي بكَ

الفصل الثالث

Jawhara

*******

_هذا الكلام ما اقبل بي ابني عدكم أريده لا اتصرف غير تصرف
_ على أساس بهاي عصبيتك راح تخوفني ترى ماتهز شعره من شاربي
_ حجيت العندي والظاهر مراح يفيد كل الي كلته واني اعرف اشلون أخذ ابني
_ والله اخليك تندم بس تمس شعره من راسه وين جنت من نكرت ابنك ساعة اول ما انولد
_طلال هواي حجينا بوكتها وكتلكم غلطان واعتذر بس اختك راسها ناشف وجدك وكف بظهرها
_ حقها الله يلوم الي يلومها شتريد منها وشلون تتصرف وانت هيج تحجي والله عيب عليك هاي وانت شيخ وريس ربعك
_ الفات مات وخل نطوي صفحه
_ماظن تنطوي صدكني انت قبل ثلاث سنين سويت سالفة شكبرها وماحصلت شي وانوب جاي تعيدها
_انت اب وتعرف فانطيني حقي لاتبقى راكب راسك انت واهلك واذا جاي تذكرني ترى بعده أثرها بجتفي ماراح
_ اي وقليل بحقك شنهو فجأة نزلت عليك المحنه لو لأن ماصارلك خلفة طول الست سنوات الله عالظالم شوف ربنا شلون جازاك هذا كله ذنب وخطية تحملها حيل بيك
_ مراح اخذ منك حق ولا باطل
سديته بعصبية واني افتر بالمضيف وحدي جريت حسرة وذبيتها اوف والله متندم ندامة بس شيفيد وكلام طلال صحيح هذا ذنب الي سويته ست سنين زواج ماصارلي طفل ومرتي معلعلة مريضة يومية نايمه مستشفى عدها ذاك المرض بالرحم وهاي آخر زيارة اخذت جرعه والدكتور يكول لازم يرفع الرحم استغفر الله واتوب اليه
انتبهت لابو رعد واحد من رجالي .. السلام عليكم شيخنا
_وعليكم السلام هلة ابو رعد ليش تأخرت
_ بقيت لما انتهى الدوام وهاي كل الي طلبته هنا

اخذت الموبايل من أيده ورحت كعدت بركن المضيف عالقنفه واشرتله يطلع اريد وحدي ابقى فتحت الفديو مصور ابني نقلته لجهازي وحذفته من جهازه بقيت اعيد بالمقطع واني كلبي اكلني اكل عليه واني أشوفه يلعب ويركض بالمدرسة وية جماعته
عيوني غوركت دمع واني اتذكر شلون حرمت نفسي منه وحرمته من رعايتي واهتمامي شكد متندم يا الله ياريت انشل لساني ولا حجيت بشئ اوووف اووف

سديته وضميته بجيب دشداشتي وصحت ابو رعد انطيته موبايله وطلعت للبيت دخلت من باب المطبخ امي كاعدة تسبح بسبحتها وعينها على نسوان اخوتي يشتغلن بالمطبخ
وهي توجه بيهن
_ها يمه اشوفك مستعجل
وكفت اعدل بشماغي والعكال ورديت عليها .. عندي شغلة اريد اروح اكضيها
_اي مكضية بجاه النبي
_اي والله يمه ادعيلي كون الله يفرجها
عفتها تدعي وصعدت لغرفتي سحر نايمه بالفراش ادري بيها مالها خلك تكوم لأن مريضة من حست علية فتحت عينها وكعدت تلملم بشعرها الي صاير خفيف أغلبه جاي يوكع من العلاج
_ نادر
تقربت عليها وأيدي مسحت راسها .. شلونج
_تعبانه
صوتها ناصي وعيونها مغوركة دموع انقهرت حيل عليها كعدت بسدها وسحبتها بهدوء بحظني كامت تبجي بصوت تعبان
_ راح اموت
_اششش عيوني لاتبجين مو زين عليج
باجر نطلع لبغداد مراجعتج بالمستشفى أن شاء الله تتحسنين
_ ماكو فايدة جسمي كله يوجعني