Jawhara
*********
ماما صارلها كم يوم مهمومة وماتقبل تحجي بداية كلت لأن اني هذا وضعي وتعبانه نفسيتي مقهورة علية إلى أن سمعتها تحجي بموبايلها وية خالة سروة تتعذر منها لأن متكدر تزورها وكاعدة تحجيلها السبب ذكرت سبب زيارة ابوها واخوتها شهكت وأيدي على حلكي
من هذا مقهورة لأن ابوها خلة شرط لرجعتها شكد ظالم لعد
دخلت الغرفه رأسا سلمت وسدته
_ خالة سروة تسلم عليج
مارديت عليها اني بالي بغير مكان رحت مددت بفراشي وغمضت وكلامها دا يتكرر بدماغي بقيت افكر بحل يخلصني من وضعي هذا اول شي اتخلص من الحمل بس شلون لازم اسوي شي حتى اجهضة اجى على بالي دبة الغاز موجودات بالممر بصف البيت ،، لحد يلومني احس عقلي مخدر من الوجع الي ياكل بروحي بسبب الكاعد يصير وياي
نزلت من الجرباية وطلعت برا الغرفه جان وكت عصر اسمع صوتهم بالهول ما اهتميت لأن على بالي شي لازم اسوي
وكفت عيني على دبة الغاز وبدون تفكير سحبتها بقوة رفعتها ورجعتها وكعت من ايدي طخت بالبقية طلعت صوت رفعتها مرة ثانية تحركت بيها واحس ظهري وجعني اسمع ماما عاطت بية من الارتباك وكعت على رجلي حسيت اصابيعي انمردن
صرخت من الالم وروحي شاغت ،، ماما اخذتني بحظنها واني مستمرة اصرخ متوجعه
طلعوا على صوتنا يردون يعرفون الصار بعد مدري بروحي الي فرفحت
********
_خيرر ليش عصبي ومستعجل وين تريد !!؟
_ للمستشفى !
_ تعال خل افهم !!!
طلعت بسرعه بسيارتي حتى الحماية ما انتظرتهم ولا رديت بعدها على جدي من سالني
،،، الاتصال الي اجاني خبلني طول الطريق واني الأفكار تلعب بعقلي هاي بس لا سقطت الطفل دست بانزين واني اتعدى السرعه الاعتيادية اريد اوصل حتى اعرف الصار بيها ،،، تخبلت هاي وبعد مستحيل اسكت وابقى اتفرج
دك موبايلي جدي يتصل فتحت خط لأن اعرفه يبقى يتصل الا ارد عليه
_ احجي شبيك ليش تخلي بالي عليك !!؟
_ جوهرة بالمستشفى احتمال إسقاط عدها
_ لاحول ولا قوة الا بالله وانت ياهو الكالك
_ مخلي جماعه يجسسون على بيت حجي رافع وهسة اتصل بية
سديته واني اركز بسياقتي وصلت للمستشفى ذبيت سيارتي يم البوابه نزلت واشوف سيارتين الحماية طبكن ورى سيارتي
دخلت بسرعه وسالت عليها بالاستعلامات ودلوني .....
أشرت للحماية يرجعون برا ماحبيت يدخلون وياية
لاكاني عثمان جان طالع من غرفه الدكتور وبيده ظرف ماسالته خل يولي ماريد اكبر رأسه سالت الطبيب الي طلع وياه
_ شلونها حالة جوهرة !!
التفت على عثمان ورجع علية .. حجيت للاخ حالتها بس باقي ننتظر الطبيبة النسائية
_احجي وياي وبالتفصيل شنو تعاني
_ منو حضرتك اني شايفك قبل !!
_ المريضة زوجتي واريد اطمن عليها
_ خل اشرحلك حالتها عدها كسر بأصابع القدم ثلاث منهم متضررين حاليا منكدر نجبسهم إلا بعدما تطلع من غرفة السونار والطبيبة النسائية اطمنا لأن عدها نزف
YOU ARE READING
يُزهر عالمي بكَ
Romanceحقد وانتقام وعودة لأخذ ثار بعد سنين طويلة وبين كل هذا الظلام هناك زهرة جميلة نبتت وسط هذه الأحقاد
