Jawhara
********
موتت روحي من سمعت عمتي تكول قيصر وكع من الفرس وهسة بالمستشفى ونادر ماقبل يكلولي
بقيت اضرب على صدري فاقدة كل احساس بس احساسي انو ابني راح مني
لزمت ايدية دعاء وتتوسل اهدي روحي وعمتي اجت حظنتني وكعدتني بصفها
_ ولج عمة اهدي لاتفاولين عالوليد
_ شلون اهدا وابني ما اعرف شبي شلون متحجون وتخبروني من شوكت صار هالشي
ردت دعاء علية وهي تنطيني كلاص مي ماقبلت اشربه
_ساعة تسعة عمر جان وياهم واتصل علينا من المستشفى دخلو للعمليات
رجعت لطمت وجهي وصدري والدموع غركت وجهي ابني متاذي واكيد حالته خطرة
_ ما ابقى هنا خل اروح هسة للمستشفى
_ شلون بيج موتي روحج وانتي حامل هسة يصير بيج شي انتي والجاهل
_ يطبني طب بية ولا بابني كولشي ولا قيصوري سودة علية يعيون امك
العبرة شكت صدري احس اختنكت وكمت اجر نفسي كوة
دعاء غصبتني اشرب مي شربت شوية وتوسلت بيها ..
_ فدوة دعاء شوفيلي واحد ياخذني للمستشفى
_ هسة احجي وية نذير موجود لو راح عليهم مدري والله ،، خل أصيح هبة تخابره
طلعت دعاء وشوية رجعت هي وهبة الي كعدت تواسي بية هي وياهن
_ خابرته والله يكول كلنا بالمستشفى وية الشيخ ومحد باقي بس اثنين من ولد عمامنا بالمضيف
عمتي ردت
_ ابقي كاعدة وين ترحين هسة زلمنا كلهم هناك والشيخ مايقبل لو يريد جان كالج هو منعنا نخبرج حتى لاتنهبطين
خليت أيدية على راسي أحسه راح ينفجر وعيوني غوشت
التفتت على دعاء اشرتلها تنطيني الموبايل لأن موبايلي مجبته وياية اريد اتصل على أهلي اني حافظه رقم طلال وجدو عزام
اتصلت على طلال يرن موبايله مايفتح خط
يمكن لأن رقم ممعروف عنده
دزيتله رسالة خبرته اني شفاء
رأسا اتصل علية
_ هلة خيتي شلونج اعذريني ما ....
_ طلااال الحكني ... ااابني بالمستشفى وحالته الله اعلم بيها
_يا ستار يارب اهدي ولاتبجين هسة انتي وين
!؟؟؟
_ابيت عيالي تعال أخذني راح اتخبل اريد ابني طلال فدوة اروحلك
_ سدي مسافة الطريق اني عندج
سديته وبقيت انتظر وروحي مقبوضة رجعت اتصلت على نادر ميفتح خط تخبلت زايد ليش ميفتح ويطمني ليشش
_ يايمة اهدي مايصير هيج تسوين بحالج
اباوع لعمتي بيدها سبحتها وتسبح وتدعي بس مبينة خلكها متكدر تحجي علية تريدني اهدا وهي حالها مو احسن من حالي بس صابرة
كمت افتر بالمطبخ واني احس روحي تطلع حسيت بطني مغصتني ما اهتميت دا انتظر طلال يارب يوصل بسرعه
فترة ورن موبايل دعاء فتحت خط لأن عرفته طلال اتصل
_ اطلعي اني برا انتظرج وجدي عزام وياية
سديته بسرعة وأخذت عباتي لبستها وعمتي صاحت وراية
_ لا تركضين وتنسين روحج حامل
عفتها تحجي علية و طلعت برا سيارتين بالباب والشارع طلال وجماعته
أنت تقرأ
يُزهر عالمي بكَ
Romanceحقد وانتقام وعودة لأخذ ثار بعد سنين طويلة وبين كل هذا الظلام هناك زهرة جميلة نبتت وسط هذه الأحقاد
