يُزهر عالمي بكَ

تكملة الفصل الاحد عشر

Jawhara

*******

المحامي وام غادة وبنتها رجعو واني بقيت عمي رافع ماقبل ارجع كال هذا بيتج تبقين معززة مكرمة
صاح على زوجه ابنه ام عثمان
_ شجون يابة تعاي أخذي اخيتج  خل ترتاح
ودتني بغرفة ماثثة وكالت اي شي تحتاجينه صيحيني شكرتها وكعدت عالجرباية تعب نفسي وجسدي
رجعت راسي على تاج الجرباية  وغمضت عيني وفكري يم بنتي الله يعلم بحالها  دك موبايلي هاي ميار
_هلة ميار
_هلو خالة شلونج شخبارج طمنيني على جوجة
_اوف شاحجي هي وينها لحد الان مالكيتها
_يربي وين راحت زين بلغي الشرطه
_ هو آني هم راح ابلغهم بعد مترهم وضعنا تعب
_ان شاء الله يارب تلكونها
_ان شاء الله
سديته منها هاي زوجها جبان طلع اول هزة تخلى عن جوهرة وهم حاسب نفسه رجال 

اندكت الباب ودخلت ام عثمان وياها بنت شابة سلمت علية وخلت ملابس ومنشفة عالجرباية
_هاي ملابس جديدة إذا ردتي تسبحين وترتاحين
_مشكورة زاحمتكم
_تدللين عيني هلة بيج  ،، خل اعرفج على بنتي طيبة
_هلة طيوبة
نص ساعه ونحضر العشا يلة ارتاحي هسة
طلعن واني ظليت بالي يودي ويجيب أبوية  ماساعدني معقولة ما يكدر يأثر على طلال
  ولا اهتم أبوية نساني ورجعتي ما غيرت شي  هو حتى ما سألني شلون عشت وين رحت 

ورى العشا صاحتني وحدة من جناينهم كالت الحجي يريد يحجي وياج
طلعت واني اعدل بحجابي نفس ملابسي ماغيرتها هي الجبة والحجاب دخلت الاستقبال واشرلي اكعد بصفه
كعدت ونزلت راسي عمي هيبة ورجال اله صيته استحيت منه  وخفت يسالني ليش جوهرة مطربة 
_ احجيلي على فهد الله يرحمه وجع فقده خنجر وانغرس بگلبي جنت متأمل يجي يوم ويدخل علية من الباب هذا

حجيتله احداث حياتنا أغلبها  وهو ساكت ما حجى بس يسمع
ومن عرف جوجة تغني ضاج وماقبل بس فهمته انو تركت بعد ما تغني 
_اكول عمي امل سؤال محيرني طلال من تزوجها معقولة ماعرف اسم ابوها اسمج انتي
_ والله يا عمي جوهرة من جانت تلح وتتوسل تشترك بمهرجانات تريد تغني لأن تحب هالشي اتفقت وياها  تسوي هوية بغير اسم وهذا الصار وهويتها الحقيقية موجودة عندي
_ اي مو اكول شلون ماعرفها اقلها من يقرأ اسمج راح يتذكر
_ على كلامج عقده عليها تزوير مادام مو اسم ابوها الحقيقي ولا اسمج يعتبر عقد فاسد
_ ايي والله عمي كلامك صح شلون نتأكد
_ هذا المحامي الي جان حاضر مبين خوش ادمي نتواصل وياه ونفهم منه هالشي

حسيت شوية راحه من كلام عمي رافع  ويارب تخلص جوجة من هالطلال هذا

******
_ بابا احنا مو تغدينا خل اروح للمزرعه
_يا بابا خل نكعد شوي وبعدها نطلع المزرعه بعدين عيب عمامك كاعدين ونعوفهم
_تعال جدة قيصر تعال اكعد بسدي ارد اسولف وياك

عيني على ابني اشوفه متضايق يريد يروح يمكن يريد يشوف المهر الصغير
جدته دنكت باسته من كعد يمها وبقى عينه علية أحسه ميريد يبقى