နွေးထွေးမှုတို့လွှမ်းခြုံကာ( Completed) ေနြးေထြးမႈတို႔ လႊမ္းၿခံဳကာ(Completed)

Part 10

(Unicode)

ရုံးသို့ ပိုင်မြင့်မြတ်ကျော်ရောက်သည်နှင့် ဌာနအတွင်းရှိ သူ့လက်အောက်က ဝန်ထမ်းတွေမှာ တနင်္ဂနွေနေ့က လုပ်သည့် ညစာစားပွဲကို သူမလာဖြစ်သည့်အကြောင်းအရင်းအား ပြာပြာသလဲမေးကြသည်။ သူ့မှာ ဝန်ထမ်းတွေကို ကြောင်းကျိုးညီညွတ်အောင်လို့ ဖြေရှင်းပေးလိုက်မှပဲ သူတို့ရဲ့ဆိုင်ရာ စားပွဲတွေဆီသို့ ပြန်သွားကြလေသည်။

"ဆရာ၊ ကျွန်တော် ဝင်လာပြီနော်"

သူရောက်နေပြီဖြစ်ကြောင်း မန်နေဂျာဖြစ်သူအား အသိပေးပြီး ဝင်သွားဖြစ်သည်။

"ဟိုတစ်နေ့က ဘယ်လိုဖြစ်လို့ မလာတာလဲ"

"ကျွန်တော့်အစ်မ ရုတ်တရက်ကြီး ဗိုက်အောင့်တယ်ဆိုတာနဲ့ဗျာ ဆေးရုံကို သွားပို့‌ပေးရတာ၊ သူ့အမျိုးသားကလည်း ခရီးထွက်နေတော့ အိမ်မှာ ကျွန်တော်ပဲရှိတယ်၊ ဆေးရုံရောက်တော့ အူအတက်ပေါက်တယ်ဆိုပြီး အစ်မက ခွဲခန်းတန်းဝင်လိုက်ရတယ်၊ ဒီလိုနဲ့ပဲ မလာဖြစ်သွားတာပါ ဆရာ"

"ဆရာတို့လည်း မင်းရောက်မလာတာနဲ့ ဘာများဖြစ်လဲပေါ့၊ ဖုန်းဆက်ကြည့်ခိုင်းတော့လည်း မကိုင်တာနဲ့ တစ်ခုခုဖြစ်နေတယ်ထင်တာ၊ ဘာမှမဖြစ်ဘူးဆိုတော့ ပြီးတာပါပဲ၊ မင်းလည်း လုပ်စရာတွေရှိမှာပေါ့၊ အခုအလုပ်သွားပြန်လုပ်လို့ရပြီ"

ဖုန်းမကိုင်ဖြစ်သည်ဆိုတာက အာကာလင်းသန့် သူ့ဖုန်းကိုယူပြီး silent လုပ်ထားခြင်းကြောင့်ဖြစ်သည်။ ဖုန်းတွေ ဝင်ထားတာကို အိမ်ကိုပြန်ရောက်သည့်အချိန်မှသာ သူသိတော့သည်။ သူ့မှာ ရှေ့လျှောက် ဤကဲ့သို့ ထပ်ကြုံရဦးမည်ဆိုလျှင် အဆင်မပြေဖြစ်လာနိုင်သည်။ တစ်ဖက်က အလုပ်၊ တစ်ဖက်က သူအရာရာနဲ့လဲပြီး ချစ်ပါသည်ဆိုသော အာကာလင်းသန့်။ ထိုနှစ်ဖက်ကြား သူ့အတွေး‌တွေ ဗြာများနေမိသည်။

သက်ပြင်းတစ်ခုကို ချမိပြန်သည်။ ဒီရက်ပိုင်းအတွင်း သက်ပြင်းချရတာတွေများသောကြောင့် အသက်တွေလည်း တိုကုန်ပြီထင်၏။

🍀

အာကာလင်းသန့်နှင့် စွမ်းရည်ထက်တို့ presentation လုပ်ပြီးသွားသည်နှင့် လေးလံကာ ဖိစီးနေသော စိတ်တို့မှာ အလိုလိုပြေလျော့သွားတော့သည်။ သူငယ်ချင်းနှစ်ဦး အတိုင်အဖောက်ညီစွာ အတန်းလစ်ပြီး နောက်တစ်ချိန်ကို ကန်တင်းတွင်သာထိုင်ပြီး အချိန်ဖြုန်းဖြစ်သည်။ စွမ်းရည်ထက်မှာ ကန်တင်းတွင် ထိုင်ပြီဆိုကတည်းက ဖုန်းကို ထုတ်ပြီး ဂိမ်းထဲတန်းဝင်ကာ ပတ်ဝန်းကျင်ကို‌မေ့လျော့သည်အထိ ဆော့တော့သည်။ အာကာလင်းသန့်ကတော့ ယောကျာ်းလေးဖြစ်ပေယ့် ဂိမ်းဆိုရင် စိတ်ကိုမဝင်စားပါ။ သူစိတ်ဝင်စားတာဆိုလျှင် ပန်းချီဆွဲခြင်းသာရှိသည်။ ထို့ကြောင့် စွမ်းရည်ထက်က ဂိမ်းဆော့နေသည့်အတွက် သူတစ်ယောက်တည်း ဟိုကြည့်ဒီကြည့် ဖြစ်ရသည်။