နွေးထွေးမှုတို့လွှမ်းခြုံကာ( Completed) ေနြးေထြးမႈတို႔ လႊမ္းၿခံဳကာ(Completed)

Part 28

(Unicode)

ကလေးတွေ မွေးဖို့ ဘယ်လောက်မှ မလိုတော့ပေ။ နေ့စေ့လစေ့အချိန်သို့ ရောက်နေပြီဖြစ်သော အာကာလင်းသန့်ကို အနီးကပ်စောင့်ရှောက်ရန် ပိုင်မြင့်မြတ်ကျော်မှာ အလုပ်တောင် မသွားတော့။ အိမ်မှာသာနေပြီး အလုပ်လုပ်ဖြစ်သည်။ ဒီရက်ပိုင်းအတွင်း ဘယ်အချိန်ဖြစ်ဖြစ် ဗိုက်ထနာနာ အဆင်သင့်သွားနိုင်ရန် ဆေးရုံတက်စဉ် လိုအပ်မည့် ပစ္စည်းတွေကို ထည့်ထားသော ခြင်းတွေမှာလည်း သူတို့ရဲ့ အခန်းတွင်း၌ နေရာယူထားပြီးသားပင်။ ထိုကဲ့သို့ ပြင်ဆင်မှုတွေကို ပိုင်မြင့်မြတ်ကျော်က အစ်မဖြစ်သူ မမြိုင်ကို ဖုန်းဆက်ကာ အပူကပ်မေးပြီး အရာရာအား အစအဆုံး ပြင်ဆင်ထားခဲ့လေသည်။ ဘယ်နေရာပဲဖြစ်ဖြစ် ကြိုတင်ပြင်ဆင်ထားလျှင် ပိုမိုအဆင်ပြေချောမွေ့တတ်သည် မဟုတ်ပေလား။

အာကာလင်းသန့် ပူဆာ၍ သူတို့နှစ်ယောက် အာကာလင်းသန့်ရဲ့ မိဘတွေအိမ်သို့ ရောက်နေကြသည်။ အာကာလင်းသန့်က သူ့ရဲ့ အသည်းကျော် တူတော်မောင်ကာကာ့ကို သတိရသည် ဆိုလေတော့ ပိုင်မြင့်မြတ်ကျော် မငြင်းနိုင်။ လိုက်ပို့ပေးဖြစ်သည်။

ကာကာက အခုဆို စကားတွေလည်း တော်တော်များများ လည်လည်ဝယ်ဝယ်ပြောတတ်ကာ သွက်သွက်လက်လက်နှင့် ပြေးလွှားပြီးတောင် ကစားတတ်နေပြီ။ အာကာမင်းခန့်ကျတော့ လေယာဉ်မှူးဖြစ်ပြန်၊ ခွန်းဝဏ္ဏသည်လည်း ဆေးခန်းတစ်နေ့လုံးထိုင်တော့ မအားပြန်သည့်အတွက် ကာကာ့ကို ဒိုင်ခံထိန်းသူများက အဘိုးအဘွားတွေသာ ဖြစ်နေ၏။ မျက်နှာချိုချိုလေးနှင့် ပြောတတ်သည့် ဖိုးပြုံးချိုလေးကာကာ့ကို အာကာလင်းသန့် အသည်းတယားယားဖြစ်ပြီး ချစ်တာလည်း မဆန်းလှပါ။

အာကာလင်းသန့်တစ်ယောက် ဧည့်ခန်းကြမ်းပြင်ပေါ်တွင် တင်ပျဉ်ခွေထိုင်၍ ကာကာဆော့နေသည်ကို ဘေးမှ ထိုင်ကြည့်ရင်း ထိန်းနေသည်။ ပိုင်မြင့်မြတ်ကျော်မှာ ယောက္ခထီး ယောက္ခမတို့နှင့် စကားဝိုင်းဖွဲ့နေ၏။ အာကာလင်းသန့်ဆန္ဒကြောင့် ဦးထိုက်ဝင်းဆွေဆီက အကူအညီအဖြစ် ရယူခဲ့သော ငွေကို လုပ်ငန်းပုံမှန်လည်ပတ်လာသည့်အချိန်မှစ၍ ဖြည်းဖြည်းချင်း ပြန်ပေးခဲ့တာ ယခုဆို ငွေအကုန်လုံး ပြည့်သွားပြီဖြစ်သည်။ ဦးထိုက်ဝင်းဆွေတို့က ပြန်မယူဘဲ လက်ဖွဲ့ငွေအဖြစ်သာ သဘောထားလိုက်ရန်ပြောသော်ငြား သူကိုယ်တိုင် မယူ,ယူအောင် နားချပြောဆိုကာ ပြန်ဆပ်ခဲ့၏။ သူလက်ခံခဲ့သည်ဆိုကတည်းက တစ်ချိန်ချိန်မှာ ပြန်ပေးဖို့ ရည်ရွယ်ချက်ထားခဲ့ပြီးမှသာ ခေါင်းညိတ်ခဲ့ခြင်း။