(Unicode)
မနက်(၉)နာရီခွဲအချိန် ရရှိသည့် နေရောင်က ပြတင်းပေါက်ကိုဖြတ်ပြီး အခန်းအတွင်းသို့ဝင်ရောက်ရန် တာဆူနေသည်။ သို့သော်ငြား ဆွဲပိတ်ထားသည့် လိုက်ကာရှည်များကြောင့် ဝင်ရောက်နိုင်ခြင်း အတိအလင်းမရှိ။ အခန်းကျယ်အတွင်းရှိ နှစ်ယောက်အိပ်ကုတင်ပေါ်တွင် ခေါင်းပေါ်ရုံလေးသာ ခြုံထားသော စောင်ထဲ၌ အဲကွန်းမှ ထုတ်လွှတ်နေသော ခပ်စိမ့်စိမ့်လေထုကြောင့် အာကာလင်းသန့် ကွေးနေတုန်း ရှိသေးသည်။ ပိုင်မြင့်မြတ်ကျော်ကတော့ မနက်(၈)နာရီကတည်းက အိပ်ယာနိုးကာ ယခုအချိန်ဆိုလျှင် ကုမ္ပဏီကိုတောင် ရောက်နေပြီဖြစ်၏။
မနက်ဆိုလျှင် ပိုင်မြင့်မြတ်ကျော်က သူ့ထက်စောပြီး ပုံမှန်နိုးသည်။ သူ့ရဲ့ပါးကို နှာခေါင်းနစ်ဝင်အောင် နမ်းခြင်းက ပိုင်မြင့်မြတ်ကျော်နိုးတာနှင့် ပထမဦးဆုံးလုပ်ဖြစ်သည့် လုပ်ငန်းဆောင်တာတစ်ခု။ ပြီးလျှင် ရေချိုးခန်းဝင်ပြီး ပြန်ထွက်လာတာနှင့် သူကြိုထုတ်ပေးထားသော အဝတ်အစားတွေကို ဝတ်ဆင်ကာ အလုပ်သွားသည်။ သူက မနက်ပိုင်းဆို စောစောမထတတ်သည့်အတွက် အဝတ်များကို ညမအိပ်ခင် ကြိုတင်ထုတ်ပေးထားခြင်း။
စောင်ပုံထဲတွင် မြုပ်နေသော အာကာလင်းသန့်တစ်ယောက် 'အင်း အဲ' နှင့် တအီအီလုပ်ကာ နိုးလာပြီဖြစ်သည်။ မျက်လုံးကပွင့်နေပေမယ့် တော်တော်နှင့် မထဖြစ်သေးဘဲ အိပ်ယာထဲမှာ ထဖို့ အရှိန်ယူနေရင်း သူ့ဘယ်ဘက်လက်သူကြွယ်ထက်၌ ပိုင်မြင့်မြတ်ကျော်နှင့် ဆင်တူဝတ်ထားသော လက်ထပ်လက်စွပ်လေးကို အသေးစိတ်ကြည့်နေသေးသည်။ ထိုသို့ကြည့်ရတိုင်း ဘယ်တော့မှ ရိုးသွားသည်ဟူ၍မရှိ။ သူချစ်ရသူ ပိုင်မြင့်မြတ်ကျော်က ယခုဆိုလျှင် သူနဲ့ တစ်ဘဝလုံး အတူတူဖြတ်သန်းသွားတော့မှာ တွေးရင်း တွေးရင်း ပျော်ရွှင်စိတ်ဖြစ်ပေါ်မြဲ။
အိပ်ယာက ထလိုက်ပြီး ရှေးဦးစွာ အိပ်ယာကို သပ်ရပ်အောင် ပြန်ပြင်သည်။ ထို့နောက် လိုက်ကာတွေကို ဆွဲဖွင့်၏။ ထိုကိစ္စတွေပြီးမှ အပျင်းဆန့်ကာ ရေချိုးခန်းဆီသို့ ဦးတည်လေသည်။ နံရံရှိ မင်္ဂလာဆောင်ဓာတ်ပုံကို အကြည့်ရောက်တော့ ပြုံးမိသေး၏။ သူတို့ရဲ့ လက်ထပ်ပွဲကို ကိုကိုတို့လို ကနေဒါနိုင်ငံမှာပဲ ကျင်းပခဲ့သည်။ အဖြူရောင်ဘောင်အနားကွပ်ထားသော ဓာတ်ပုံအတွင်း၌ အနောက်တိုင်းဝတ်စုံ အနက်ရောင်ကို ခန့်ညားစွာ ဝတ်ဆင်ထားသော ပိုင်မြင့်မြတ်ကျော်နှင့် အဖြူရောင်အနောက်တိုင်းဝတ်စုံကို ဆင်မြန်းထားသော သူသည် တစ်ယောက်ကိုတစ်ယောက် မြတ်နိုးစွာကြည့်ရင်း ပြုံးနေကြသည်။ ဓာတ်ပုံတွေက စကားပြောသည်ဆိုသော စကားအတိုင်း ဤဓာတ်ပုံကို ကြည့်ခြင်းအားဖြင့် သူတို့နှစ်ယောက်ရဲ့ ချစ်ခြင်းကို ကြည်နူးစိတ် ဖြစ်ပေါ်လာသည်။
YOU ARE READING
နွေးထွေးမှုတို့လွှမ်းခြုံကာ( Completed) ေနြးေထြးမႈတို႔ လႊမ္းၿခံဳကာ(Completed)
RomanceCover photo credit to the rightful owner. အဆိုးဆုံးအခြေအနေမှာတောင် ကျွန်တော့်ကို မစွန့်လွှတ်ခဲ့ဘဲ သူ့ရင်ခွင်မှာ တစ်သက်လုံး စံမြန်းခွင့်ပေးတဲ့ သူ့အတွက် ကျွန်တော့်အချစ်တွေက သမုဒ္ဒရာထက်တောင် နက်ရှိုင်းတယ်ဆိုတာ သူသိအောင် ဖွင့်ထုတ်မပြောပြလည်း သူသိတယ်ဆိုတ...
