နွေးထွေးမှုတို့လွှမ်းခြုံကာ( Completed) ေနြးေထြးမႈတို႔ လႊမ္းၿခံဳကာ(Completed)

Part 13

(Unicode)

"ငါကသူတို့သုံးယောက် အဆင်ပြေသွားရင် ရဲစခန်းမရောက်တော့ဘူး ထင်ခဲ့တာလေကွာ၊ အခုတော့ သုံးယောက်ပေါင်းလောင်းကျော် ဖြစ်နေပါလား"

ပိုင်မြင့်မြတ်ကျော်က သူ့နားထင်ကို လက်နှစ်ဖက်ဖြင့် ဖိထားရင်း စိတ်ညစ်စွာ ပြောမိသည်။ သူမနက်ဖြန် မိဘမဲ့ဂေဟာသွားရင် ယူသွားရန်ဆိုပြီး မမြိုင်က မုန့်ထုပ်တွေလာပေးလို့ ရှိပြီးသား အထုပ်တွေဘေးတွင် သေချာစီ၍ထားနေချိန်မှာ ဖုန်းနံပါတ်အစိမ်းတစ်လုံးက ဝင်လာခဲ့သည်။ သူ့မှာလည်း ဖုန်းနံပါတ်အစိမ်းဆိုတော့ တော်‌တော်နှင့်မကိုင်ရဲ အရင်တစ်ခါကကိစ္စကြောင့် မထိတ်သာမလန့်သာ ဖြစ်နေရသေးသည်။ ကိုင်လိုက်တာနှင့် ကြားလိုက်ရသည်ကတော့ အာကာလင်းသန့် အချုပ်ထဲ ရောက်နေပြန်ပြီဆိုသည့် သတင်းသာဖြစ်သည်။ ရန်မဖြစ်နဲ့ဟု အတန်တန်မှာလိုက်သည့်ကြားက ဖြစ်ခဲ့ပြန်သောကြောင့် ဝရုန်းသုန်းကားဆန်စွာ ရဲစခန်းသို့ လိုက်ရပြန်ပါသည်။

ရဲစခန်းရောက်တော့ ထွန်းဝီရက တာဝန်ကျရဲအရာရှိနှင့် စကားပြောနှင့်နေတာကို အဆင်သင့်တွေ့ရသည်။ သူရောက်ပြီး ရှေ့ဆင့်နောက်ဆင့်ပဲ တစ်ဖက်ရန်ဖြစ်သည့်ဘက်က မိသားစုဝင်တွေရောက်လာ၍ ဆေးဖိုးအတွက် လျော်ကြေးပေးတန်တာပေးပြီး အမှုကျေအေးပေးရန် စသည်များ ဖက်ဖက်မောအောင် လုပ်ခဲ့ကြရသည်။ စိတ်ပင်ပန်း၊ လူပင်ပန်းဖြစ်ခဲ့အပြီးမှာတော့ ထွန်းဝီရရဲ့ ကွန်ဒိုသို့ ရောက်လာခဲ့ကြရသည်။ သူ့‌အရှေ့တွင် ထိုင်နေသော ထွန်းဝီရကို ကြည့်တော့ သူ့ကဲ့သို့ စိတ်ညစ်နေသယောင်။

"ငါလည်း အဆင်ပြေစေချင်ဇောနဲ့ သေချာမတွေးလိုက်မိတာကွာ"

သူနှင့် ထွန်းဝီရ တစ်ယောက်ကိုတစ်ယောက် ကြည့်လိုက်ပြီး ပြိုင်တူသက်ပြင်းချမိကြသည်။

"ဖြည်းဖြည်းလုပ်ကွ၊ နာတယ်စွမ်းထက်ရဲ့"

"မလုပ်နိုင်ဘူး၊ မင်းအရင် ရွဲ့စောင်းပြီးသွားပြောလို့ မင်းအဖေတွေနဲ့ ဖြစ်ရတာလေ၊ ဒါမင်းကြောင့်ဖြစ်တာ ထွန်းလင်း၊ အခုမှ နာတတ်မနေနဲ့"

"တော်ကြတော့ကွာ၊ ငါအိပ်လို့မရတော့ဘူး"

ခေါင်းမှာ ပတ်တီးအဖွေးသားနှင့် ခေါင်းထဲက တရိပ်ရိပ်ဖြစ်နေလို့ ပိုင်မြင့်မြတ်ကျော် ပေါင်ပေါ်မှာ မှေးနေသည့် အာကာလင်းသန့်တစ်ယောက် ကျပ်ထုပ်ထိုးရင်း အသံမျိုးစုံ ထွက်နေကြသည့် စွမ်းရည်ထက်နှင့် ထွန်းလင်းသီဟကို ငေါက်ကနဲ ထထိုင်ပြီး အော်လိုက်မှပဲ ထိုနှစ်ယောက်ငြိမ်သွားကြသည်။ တစ်ဖက်ကလူ‌တွေကို သုံးယောက်သားလက်သံပြောင်စွာ‌ မြင်မကောင်းရှုမကောင်းမျက်နှာတွေဖြစ်သည့်တိုင် ဆော်ပလော်တီးနိုင်ခဲ့ကြသည်။ သို့သော် ကံမကောင်းစွာ တုတ်နဲ့အရိုက်ခံလာရသည့်သူက အသံမထွက်ရဘဲ မျက်နှာကို ကျပ်ထုပ်ထိုးပေးတာလေး အသံထွက်နေသည့် ထွန်းလင်းသီဟနှင့် ရန်ဖြစ်ပြီးသွားမှ ဘယ်သူ့ကြောင့်ဆိုပြီး လွှဲချနေသော စွမ်းရည်ထက်တို့ကို ဒေါသထွက်ရပြန်သည်။ ရုတ်တရက် ထထိုင်လိုက်သည့်အတွက် ခေါင်းမှာ မိုက်ကနဲ မူးဝေသွားရသည်။