Healing Love 🍁
Part-18
မိုးလင်းပြီဆိုတဲ့အသိနဲ့ ထ ဖို့ တွေးပေမယ့် ရုံးသွားစရာမလိုတာကြောင့် နည်းနည်း ထပ်အိပ်ဖို့ တွေးလိုက်မိသည်။ သို့သော် အသက်ရှုသံက ကိုယ့်တစ်သံပဲမဟုတ်။ နောက်ပြီး ခေါင်းလျှော်ရည်နံ့ စူးစူးလေး။ ယောင်ယမ်းကာ မျက်လုံးဖွင့်ကြည့်မိတော့ ကုတင်အဖျားနားမှာ လက်တင်ကာ ကိုယ့်ကို ငေးနေတဲ့ ကောင်လေး....
" နိုးပြီလားဗျ "
" အစောကြီးပဲ "
" အစ်ကို့ကို တွေ့ချင်လို့...ဖြစ်နိုင်ရင် ညတည်းက လာချင်နေတာ "
ကောင်လေး ကြူးနေတာကို မခံနိုင်တော့စွာ Chanyeol ချောင်းဟန့်လိုက်၏။ အရင်က မိမိ ဒီလို မဖြစ်ပါ ။
" အစ်ကို ထတော့မှာလား "
" အိပ်ဦးမလို့... ၇ နာရီပဲ ရှိသေးတာ "
ညကလည်း ညဥ့်နက်တာကြောင့် Chanyeol အိပ်ရေးမဝသေးပေ။ သူ ပြောလိုက်တော့ ကုတင်အောက်မှာ ထိုင်နေတဲ့ ကောင်လေးက အနားတိုးလာကာ ပြုံးစိစိဖြင့်...
" ကျွန်တော်ပါ အိပ်မယ်လေနော် ... "
အရင်လည်း လာကပ်အိပ်နေကျကို ဒီတစ်ခါမှ ခွင့်တောင်းနေ၏။ ဝင်အိပ်လိုက်ပါလား။ ဘယ်သူက သူ့ကို နှင်နေလို့လဲ !
" အဟမ်း !! "
ဆိုကာ ရင်ခွင်ထဲမှာ ပိုက်ထားတဲ့ ဖက်လုံးကို ယောင်ယောင်ယမ်းယမ်းဖြင့် အနောက်ဘက် ပို့လိုက်တဲ့ Chanyeol...
" ဟဲဟဲ ... ရင်ခွင်ထဲ လာအိပ်ရမှာလား "
မချိုမချဥ် ရုပ်လေးဖြင့် ရင်ခွင်ထဲ အတင်း တိုးဝင်လာ၏။ စောင်ထဲကိုပါ သူ့ခြေထောက်တွေ ထည့်ကာ Chanyeol ခါးကို ကျစ်ကျစ်ပါအောင် ဖက်တွယ်လာသည် ။ ဒါ ဒီကောင်လေးရဲ့ ပုံစံမဟုတ်။ တစ်ခုခု ဖြစ်နေတာ သေချာနေပြီ။
" ဘာဖြစ်လာတာလဲ ကောင်လေး "
ဆံပင်လေးတွေကို အသာဖွပေးနေရင်း မေးမိတော့ ရင်ခွင်ထဲ မှိန်းနေတဲ့ ကောင်လေးက နှာခေါင်းရှုံ့၏။ ရင်ခွင်ထဲကနေပဲ Chanyeol ကို မော့ကြည့်လာကာ မျက်နှာလေး ငယ်ပြနေသည်က သူ စိတ်မကောင်းဖြစ်နေတာပါပေါ့...