Healing Love 🍁
Part-25
လေးလေးရဲ့ အကြံပေးချက်အတိုင်း ဆိုဟီးနဲ့ဖြစ်ဖြစ် ဆိုဟီးဘက်က ရှေ့နေနဲ့ဖြစ်ဖြစ် တွေ့ဖို့ အရင်ဆုံး ဆုံးဖြတ်ချက်ချလိုက်သည်။ ကာမလိမ်လည်မှုနဲ့ တရား စွဲထားတယ်ဆိုသော်ငြား ကိုယ်က သူ့ရဲ့ ကာမကို လိမ်လည်ရယူခဲ့ခြင်း မရှိခဲ့ဖူးပါ။ ဖြားယောင်းသွေးဆောင်ခြင်းလည်း မရှိခဲ့ဖူး။ ဒါကြောင့် သူမ သို့မဟုတ် ရှေ့နေနဲ့ တိုက်ရိုက်တွေ့ပြီး အမှုကို ပြန်ရုတ်သိမ်းပေးဖို့ ညှိနှိုင်းရမည်ဖြစ်သည်။
ဆိုဟီးအဖေဆီ ပြန်ဆက်သွယ်ကာ သူတို့ဘက်က မြို့နယ်ဥပဒေအရာရှိ ထိုင်တဲ့ ရုံးအထိ လိုက်ရ၏။ သို့သော် ဆိုဟီးနဲ့တော့ အတွေ့မခံကြပါ။
" ဒီဘက်က ဆရာပြောကြားချက်အရဆိုရင် မင်ဆိုဟီးနဲ့ ဆရာက မှားယွင်းခဲ့ဖူးခြင်း မရှိဘူးပေါ့ "
" မမှားခဲ့ဘူးခင်ဗျ ... ဒါကို သူလည်း သိသလို ကျွန်တော်လည်း သိတယ် , လက်ထပ်ဖို့ အကြောင်းပြ လိမ်လည်ပြီး အတူနေခဲ့ခြင်းလည်း မရှိသလို ကျွန်တော့်ဘက်က ဖြားယောင်းသွေးဆောင်တာလည်း မရှိဘူး , ဆိုဟီးအဖေက မသိဘဲနဲ့ လုပ်တာ ဖြစ်တဲ့အတွက် ကျွန်တော်ကတော့ ဆိုဟီးနဲ့ပဲ တိုက်ရိုက် ဖြေရှင်းချင်ပါတယ် "
ထိုအခါ တစ်ဖက်ရှေ့နေက သက်ပြင်းချကာ ခေါင်းညိတ်၏။ သူတို့ဘက်က ပြင်ဆင်ထားတဲ့ တရားစွဲဆိုမှု အကြောင်းအရာစာရွက်တွေက စားပွဲပေါ်မှာ အပုံလိုက်ဖြစ်သည်။
" ဒါကတော့ ခက်ခဲလိမ့်မယ်ဗျ ... မင်ဆိုဟီးက အခု စိတ်ကျန်းမာရေးဆရာဝန်နဲ့ ကုသမှု ခံယူနေတာဆိုတော့..... "
" ဒါဆိုရင် ကျွန်တော့်ရဲ့ ကာမလိမ်လည်မှုဆိုတာ အကျုံးမဝင်ဘူးပဲ ... ဒီအမှုက ကာယကံရှင်ကိုယ်တိုင် တရားရုံးမှာ ဦးတိုက်လျှောက်မှ အကျုံးဝင်တာ ဆရာသိမှာပါ .... တကယ်လို့ ဒါကိုမှ ရှေ့ဆက်တိုးရင် ကျွန်တော့်ဘက်ကလည်း အသရေဖျက်မှုနဲ့ ပြန်တရားစွဲရပါလိမ့်မယ် "
" ကောင်းပါပြီ ... အမှု ပြန်ရုတ်သိမ်းတာ မသိမ်းတာကလည်း ကျွန်တော့်ဘက်က လုပ်လို့ရတဲ့ အရာ မဟုတ်ဘူးဗျ ... ကျွန်တော့် အမှုသည် တရားလို မင်ဆိုဟီးဘက်က ဖြေကြားချက်အတိုင်းပဲ ကျွန်တော် ဆောင်ရွက်ရမှာ "
