နေရောင်ကား စူးရှတောက်ပနေသည်။နန်းစောရှင်ရဲ့နှဖူးတွင် ချွေးတို့ကတစက်စက်။ကြီးမားသည့် မန်ကျည်းပင်ရိပ်ကတောင် နန်းစောရှင်တို့အင်းဝမင်းသားတစ်သိုက်ကို အေးရိပ်မပေးနိုင်။စိတ်အားထက်သန်မှုတွေက မျက်လုံးထဲတွင်ပေါ်လွင်နေပြီး တိုက်ကြက်ဖနှစ်ကောင်ဘေးမှအပြင်းအထန် အော်ဟစ်အားပေးနေကြသည်။သန်မာသည့်တိုက်ကြက်ဖနှစ်ကောင်ရဲ့တောင်ပံခတ်သံတွေက တဖျတ်ဖျတ်။ခုန်ကာခုန်ကာအပြင်းအထန် ခွပ်ကြသည်။မင်းရဲကျော်ထင်ရဲ့တိုက်ကြက်ဖက သခင်ရဲ့အရှိန်အဝါအတိုင်းသန်မာပြီး အားကြီးသည်။နန်းစောရှင်ရဲ့တိုက်ကြက်ဖက လျင်မြန်ပြီးဖျတ်လတ်သည်။
နေပျောက်မကျသည့်မန်ကျည်းပင်ရိပ်တွင် တိုက်ကြက်ဖနှစ်ကောင်က အားမာန်အပြည့်ခွပ်နေကြသည်။"ဖေ့သားစိန်လေး ခွပ်လိုက်စမ်း"
ကျန်သည့်နောင်တော်၊ညီတော်များကဘေးတွင်ဝိုင်းကာ အားပေးနေသည်။နန်းစောရှင်ရဲ့ငွေခြေချင်းမှခြူသံက အော်ဟစ်အားပေးနေသည့်လူအုပ်ကြားထဲတွင် မထင်မရှား။နန်းစောရှင်ရဲ့တိုက်ကြက်ဖက ပန်းလာပြီ။ဖျတ်လတ်မှုကသိသိသာသာကို လျော့နည်းလာပြီးမင်းရဲကျော်ထင်ရဲ့တိုက်ကြက်ဖ ပြုသမျှနုနေရသည်။နောက်ဆုံးတွင်တော့ မင်းရဲကျော်ထင်ရဲ့တိုက်ကြက်ဖခုန်ကာခွပ်လိုက်အပြီးမှာ နန်းစောရှင်ရဲ့ကြက်ဖလေးက မလှုပ်နိုင်တော့ပေ။
နန်းစောရှင် ကြက်နှစ်ကောင်ကြားအလျင်အမြန်ဝင်လိုက်ပြီး သူ့ကြက်ဖလေးကိုကောက်ပွေ့လိုက်သည်။နန်းစောရှင်မျက်နှာလေးက ညိုးငယ်နေပြီးမလှုပ်တော့သည့်ကြက်ဖလေးကိုသာ ပွတ်သပ်နေသည်။
"ညီထွေးငယ် ရှုံးပြီနောင်တော်ကြီး"
မင်းရဲကျော်ထင်က နန်းစောရှင်ရဲ့ပခုံးကိုပုတ်လိုက်ပြီး ခပ်ပြုံးပြုံးပြောသည်။
"အရှုံးကိုလက်ခံနိုင်တာလည်း ယောကျာ်းကောင်းပေဘဲ ညီထွေးငယ်ရဲ့"
ထိုအခါမှသာ နန်းစောရှင်ပြုံးပြီးနောင်တော်ကြီးကျော်ထင်ကို လေးစားအားကျသည့်အကြည့်နှင့် ကြည့်လိုက်သည်။နောင်တော်ကြီးက ကျင်စွယ်မုတ်ဆိတ်မွေးရေးရေးနှင့် လေးနက်တည်ကြည်သည့်လူချော ဖြစ်သည်။စူးရှသည့်မျက်ဝန်းက မြင်ရသူအပေါင်းကိုခံ့ညားကြောက်ရွံ့စေပြီး မရှေးမနှောင်းပင်နူးညံ့သိမ်မွေ့မှုကို ခံစားရစေသည်။ဒါဟာ နောင်တော်ကြီးတွေရဲ့အားသာချက်ပင်။
YOU ARE READING
ချစ်သောပြည့်ရှင်မင်း(Completed)
Historical Fictionစစ်နတ်ဘုရားဟံသာဝတီအိမ်ရှေ့မင်းက အင်းဝနန်းတွင်းမာသူလျှိုလုပ်ရင်း အင်းဝမင်းသားငယ်လေးကိုကာကွယ်ချင်လာတဲ့အခါ နောင်တော်တစ်ပါးရဲ့သစ္စာဖောက်မှုကြောင့် အင်းဝမင်းသားငယ်လေးကဟံသာဝတီကိုရောက်သွားရရှာပါတယ် သူတို့နှစ်ဦးကံကြမ္မာတွေကိုဘယ်လိုဖြတ်ကျော်ပြီးစစ်မှန်တဲ့ပြ...