ချစ်သောပြည့်ရှင်မင်း(Completed)

Part 10

နန်းစောရှင် ခေါင်းတွေခြာခြာလည်အောင် မူးနေသည်။ဦးနှောက်ထဲတွင်ကား ဗလာနတ္ထိ။ မျက်လုံးတွေကိုဖွင့်လိုက်တော့ နူးညံ့သည့်ဖဲသားမွေ့ယာပေါ်တွင် ရောက်နေကြောင်းသိလိုက်ရသည်။အခန်းထဲတွင် ရိုးရှင်းသည့်အပြင်အဆင်ကိုသာ တွေ့ရသည်။ကြီးမားသည့်နံရံပေါ်တွင်လေးတောင်ခန့် ရှည်လျားသောရွှေကနုတ်ပန်းခက်တွေ အနားကွပ်ထားသည့်လေးတော်ကိုချိတ်ထားသည်။ထိုလေးတော်အောက်တွင်ကား အင်းဝလှံရှည်များနှင့်မတူသည့် ဟံသာဝတီလက်နက်အဲ‌မောင်းလှံရှည်ကို တွေ့ရသည်။

နန်းစောရှင် အာခံတွင်းတစ်ခုလုံးခြောက်သွေ့ကွဲအက်နေသည်။လည်ချောင်းကိုပူလောင်သည့်မီးက လောင်မြှိုက်နေသည်။အခန်းထဲတွင် နူးညံ့သည့်ပန်းရနံ့တစ်မျိုးရသည်။ပန်းရနံ့ကနန်း‌စောရှင်ခေါင်းကို ကြည်လင်လာစေသည်။နန်းစောရှင်အပြည့်အဝနိုးသွား‌တော့ အတွေးတွေကတစ်ပတ်လည်လာသည်။အဖြစ်အပျက်တွေကတဖြည်းဖြည်း နန်းစောရှင်ဦးနှောက်ထဲဝင်ရောက်နေရာယူလာ၏။

'နောင်တော်ကြီးမရှိတော့ပြီ'

'နောင်တော်တွေလည်းမရှိတော့ပြီ'

'ခမည်းတော်လည်းမရှိတော့ပြီ'

'သူသည်လည်းအင်းဝမင်းသားငယ် မဟုတ်တော့ပြီ'

နောင်တော်ကြီးနှင့်နောင်တော်တွေအားလုံးက  မင်းရဲဗလရဲ့ဟန်ဆောင်မျက်နှာဖုံးအောက်တွင်  ကျဆုံးခဲ့ရသည်။မင်းရဲဗလက နန်းစောရှင်တို့ကိုပြုံးပြနေရင်း တစ်ဖက်ကပင်ရွံမုန်းနေခဲ့သည်။ကြင်ကြင်နာနာပွေ့ဖက်ရင်း နောက်ကျောကိုဓားနှင့်ထိုးရန် ကြံစည်နေခဲ့သည်။

'ဘယ်အချိန်ထဲက မင်းရဲဗလကနန်းစောရှင်တို့ကို သတ်ပစ်ချင်နေခဲ့တာလဲ ခမည်းတော်နဲ့မသင့်မြတ်ထဲကလား'

နန်းပလ္လင်ကို လောဘတက်လွန်း၍ညီနောင်တွေကို ရှင်းလင်းပစ်ခဲ့တာ။မင်းရဲဗလ ငယ်ရွယ်စဉ်ကခံစားခဲ့ရသည့်အရှက်ကွဲမှုတွေ သိမ်ငယ်မှုတွေကို အလုံးစုံမြိုသိပ်ရင်း အဆိပ်ဓားသွားတစ်လက်ကိုဖွက်ထားကာ အသေအချာကိုကြံစည်ခဲ့တာ။နန်းစောရှင် အစာအိမ်ထဲကခါးသီးမှုတွေကို ခံစားလိုက်ရသည်။