ကျင်းလင်တွင် ယနေ့အခါ၌ သူရိန်နေမင်းက တောက်တောက်ပပလင်းထိန်လျက်ရှိသည်။
စုန့်ချီ၏မှတ်ဉာဏ်ထဲတွင် ကျင်းလင်သည် ဤမျှသာယာပြီး ကြည်လင်အေးချမ်းနေခြင်းမှာ ရှားပါးလှပေ၏။
လတ်တလောအချိန်တွင်မူ လျန်ရန့်ပေသည် အရှေ့မှလမ်းလျှောက်နေသောကြောင့် မြှောက်ကာစီးနှောင်ထားသည့် သူ၏မှင်နက်ရောင်ဆံပင်ရှည်များက ခပ်ပြည်ပြည်လေးလှုပ်ယမ်းနေသည်။ သူဟာ မကြာမကြာခြေလှမ်းရပ်ကာ စုန့်ချီအား လှည့်လှည့်ကြည့်တတ်သည်။
" ချီ ~ မြန်မြန်လာ "
လျန်ရန့်ပေက သူ့အားလောဆော်သည်။
ဤကလေးက တကယ်ကို စိတ်ရှုပ်စရာကောင်းလွန်းသည်။ နံဘေးတွင် အပြင်လူရှိမနေပါက သူ့အား " ချီ " ဟုအမြဲတမ်းခေါ်တတ်သည်။
အမှန်တကယ်တွင်မူ သူ၏လောကသိအမည်ကို ခေါ်ဆိုသူမှာအနည်းအကျဉ်းမျှသာရှိသည်။ အဘယ်ကြောင့်ဆိုသော် သူ၏အသက်ပြည့်မွေးနေ့ပွဲ ၊ လောကသိအမည်ကပ်ပွန်းတပ် အခမ်းအနားကို ကြီးကြီးကျယ်ကျယ်ကျင်းပခဲ့ခြင်းမဟုတ်သောကြောင့်ပင်။ မွေးနေ့ဧည့်ခံပွဲကို မည်သည့်ဧည့်သည်ကိုမျှ ဖိတ်ကြားခဲ့တာမဟုတ်ပေ။
ဆိုရပါလျှင် ထို့ထက်အခြေခံကျသည့်အရာမှာ သူ့တွင် အပေါင်းအဖော်၊ သူငယ်ချင်း များများစားစားမရှိခြင်းကြောင့်သာ။
စုန့်ချီ မျက်ခုံးများတွန့်ချိုးလိုက်သည်။
" လျန်ရန့်ပေ ၊ ငါ့ကို အဲ့လိုထပ်ခေါ်ရဲခေါ်ကြည့် မင်းကို ဦးရီးတော်နဲ့တိုင်ပစ်မယ်။ ဦးရီးတော် မင်းကို ဘယ်လိုအပြစ်ပေးမလဲ ငါမိန့်မိန့်ကြီးကိုကြည့်နေဦးမှာ! "
လျန်ရန့်ပေက ပါးစပ်ဖြဲလျက် ပြုံးဖြီးဖြီးလုပ်သည်။
" အစ်ကိုအခုနေ ရွှေမြို့တော်ဆီ တိုင်ကြားစာပို့လိုက်ရင်တောင်မှ ကျွန်တော့်အဖေလိုက်လာတဲ့အချိန်ကျ ကျွန်တော်ကကျင်းလင်ကနေ ထွက်သွားပြီးသားတောင်ဖြစ်နေလောက်ပြီ "
သူဟာ စိတ်ကြီးဝင်စွာ ဖြည့်စွက်၍ပင်ပြောလာသည်။
" ကျွန်တော် မကြောက်ဘူး "
YOU ARE READING
FOX DEMON CULTIVATION MANUAL
Romance[FDCM] 【2nd book of a Trilogy】 It's just a fan translation. I don't own anything of this story. Full credit to original author Feng Ge Qie Xing & English translator Lianyin. - အင်္ဂလိပ်ဘာသာပြန်ဆိုသူထံမှ ခွင့်ပြုချက်ရရှိထားပြီး -