قصة الشيخ نور التميمي

بارت 2

وحدة ألمانية وهي كذلك واسلمت بسببه...

وبعدها طلبها وتزوجها ومن عرفو اهله كلهم تبرو منه وكالو مو ابنه وكسر عاداتنه وتقاليدنه وتزوج اجنبية وغريبة ومانعرف شنو من صنف من البشر هي...

بس هي بقت وياه وما عافته ابداً وكل يوم تثبتله هي شكثر تحبه..حاول يصالح اهله ورجع الهم...وحاول يصالحهم بس مارادوه وعاش فترة بحده بالعراق وحتى يحاول يصالح اهله....

صار عنده طفلين منها وهي ماجانت تعرف للحياة هنا بس متحملة لخاطره...وجانو اهله يكلون لنورسين وادريس كفار انتم وامكم وهو كال العراق بعد ماعرفه...

وعاف اهله واخذ مرته وجهاله وسافر لهناك..وعاش وياها عالحلوة والمرة وبرغم الحالة ماجانت ذيج العالية بس الحمدلله اسرة متحابة...خذو الجنسية الالمانية...

كبرو جهاله ومرته توفت بسبب سرطان الرئة لان جانت تدخن قبل..عانت هواي من السرطان...ودعت احبابها وبتها وابنها وزوجها الي تخله عن اهله علمودهم...

بعد فترة تواصلو وياه وابوه كله تعال اريد اشوفك قبل ما اموت..وكله يابه كلتو لجهالي كفار واعتبرتوني كافر لأن اتزوجت الي حبيتها..انسوني...ماردتوني من اجيت اتوسل بيكم سامحوني...

ورة فترة اتواصلو وياه مرة ثانية وسمع بوفاة ابوه كلش انقهر وحزن وبجه عليه لأن ماراح شافه...

اخوه الجبير الشيخ علي الي هو ابو نور كله تعال للعراق..كله عمامك واخوانك مستعدين يستقبلونك انته واولادك...

وظل يلح عليه اخوه وكله تعال عيش ويانه..وهو اخوه شايب وجبير... اخيراً قبل يجي للعراق بس مؤقتاً ويرجع...وراح يجيب اولاده وياه...

خل اعرفكم ادريس الزغير عمره 22..بس هواي تخلق بأخلاق البلد الي عايش بي بالرغم ابوه تعب عليه وعلمه تقاليدهم بس الشباب الي يماشيهم كلهم ألمان واجانب...جامعي بس مأجل هالسنة لأسباب صحية...

يدخن ومرات يشرب بس بدون علم ابوه...بس رغم هذا كله كلبه طيب ومحبوب.....

عيونه زرك على امه وشعره اشكر... حتى لحيته شكره حتى رموشه وحواجبه..وسيم وكشخة..وفري كلش ومايحاسب اخته شما تسوي...

نورسين عكسه..عاقلة وحبابه وابوها رباها على تقاليدهم وشكثر يحبها وعبالك صديقته مو بنته...وهي روحها معلكه بأبوها خصوص بعد ماتوفت امها...
بس هي اختارت تكون سافرة بلا حجاب وابوها ماكدر يجبرها على الحجاب لأن حيل مدللة عنده..وهي تشبه امها تماماً بس شعرها مختلف...

عيونها زرك وشعرها بني..رشيقة تشبه الممثلة كيت بيكينسيل بس بالشخصية والجسم بس الشكل لا تختلف..نورسين طيبة هواي..بس عصبية وقوية..

وتتعرفون عليها اكثر بالقصة...عمرها 24 سنة دارسة لغات ومؤلفة وجاي تألف كتاب روايات ملحمية ملكية باللغة الألمانية...

( كاتبة مو لو مو 😉)

وراح يجون للعراق هي وابوها واخوها الي اجه مرغوم مايريد يجي ابوه جابه غصب عنه.....

كاعدين الولد يلعبون طاولة بالصالة وصوتهم واصل لآخر الطارمة...

نواف:مشتاق كافي عاد مصختها

مشتاق كفخه على راسه:طاح حظك عمك انه كلي عمي

نواف:انته وسروالك المشكوك كووم عمي كال عمي

مشتاق صدك حجي نواف وظل يفتش بسروالة مامشكوك وحط نواف وسحله سحل..هو لابس بجامة بيت طويلة وتشيرت وياها...

مشتاق نايم فوكه ويضرب بي:ناقص تشاقة بعد هيج

نواف يلزم ايدينه:واشلع عينك همين هههههههه

مشتاق زاد العصر عليه:هااا شتكول ماسمعك عدل

نواف يضحك وظلوعة تأذت:وداعتك عمي ماشاقه وياك بعد يمعود كسرت ظلوعي..شكدك لتكول دينصور انته وعضلاتك

مشتاق:مو معلمك ما تستسلم بسهولة زلمة تبن انته

نواف يضحك:والله احتاريت وياك..هسة اتعوفني لو لا

خالد:ولك صدك جذب ماتكدر على عمي مشتاق بدفره اطيره

هيثم:انجب انته يالله راوينه مراجلك

فارس دخل:سلام عليكم..هاي شبيك نواف شمسوي نايم فوكه مشتاق ههههه

الكل:وعليكم السلام..

نواف:بالعباس كلشي مسويت كتله لباسك مشكوك عمي فدوة لشواربك وخر هالثور عني

فارس:هههههههههه وانتم لتكول مزعطة كل يوم عرايك

نواف:عمي شسوي لأخوك يكبر ويدبر...

جان تجي كفخة قوية على راسه قوية من مشتاق....

مشتاق صارله جم سنة تعبان على نفسه بالعظلات ومسوي جسمه معظل..وبعده لا زواج ولا حتى حب...

بأختصار رابط الدنيا يم عمود الكهرباء...

يكول احسنلي بحدي ماريد اتزوج الا احب مايريد يصير مثل فارس اتزوج بت عمه بس ابد مايحبها ومشاكل بينهم والكل يعرف مايحبها مبين هالشي...

هي تحبه بس هو مايحبها...وابوه ماخلاه يتزوج الي يحبها كله امها مو زينة مانريد اناسبهم وكل العالم تحجي بعرضها...
ونور كله بويه لاتكسر بي احنه ماراح ناخذ امها شعلينه راح يتزوج البنية...بس ابوهم كال لا والف لا...العرج دساس...

هي صدك امها ماظل واحد ما شاف الأمة العربية العدها وسيرتها على لسان كل الي يرحون الها وهي البنية شردت من امها وراحت عاشت يم عمامها...

بس ولد عمامها مو خوش اوادم واضطرت ترجع يم امها وهسة يحجون على البنية والأم وتزوجت البنية وما فكت نفسها..لأن الماخذته لا عنده شخصية ولا يحل ولا يربط بس يسترجل عليها وشابعة اهانة وذل منه