على سبب تافه وتكله انته تكرهني ماتحبني...
حتى لو يحس بالمودة تجاها هي موتتها بكلبه وصار يكرهها بسببها هي ومشاكلها وظلت تلح عليه انته تكرهني ماتحبني..يعني حتى لو اكو فرصة يحبها هي عدمتها....
وتروح تشتكي عليه عد ابوها ويجي يحجي عليه وهو غصبن عليه يسكت عمه ومايكدر يحجي او يجاوز..ويكتلها بسبب شكواها عد ابوها ويطردها ويريد يطلكها بس ابوه يرجعها...
باوع لبته بحسرة مايريد يشتتها بينه وبين امها لذلك متحمل امها..بس اخر هل الأيام جزع مايكدر يتحمل بدور اكثر...
بدور هاي اسم مرته وتصير بت عمه وتزوجها بناء على رغبة ابوه لأن فقد حب حياته وظلت حسرة بكلبه هالبنية... خطبله ابوه بدور وهو رفض بس ابوه كله بت عمك وماتلكه احسن منها...
وهي بدور جانت تحبه وتكله احبك واريدك ..وهو جان صريح وياها وكلها بكلبي وحدة غيرج شلون تقبلين على نفسج..كلتله مايهمني المهم احبك...
وابوه خطبها بدون رضاه.. وظل يلح عليه بالموضوع وظغط عليه وهو مايهمه شي بعد ماخسر حب حياته وبس تزوج هي انكسرت هواي.. ماقبلو بيها اهله واضطرت تزوج عن حجي الناس وهم مافكوها....
فارس شافها كومت لجين تريدها تبدل وهي متعلمة البنية تبدل بحدها مرات...وبدور مساع متعاركه وياه وكامت تلبس بتها بعصبية...
فارس:على كيفج مو لعابة بيدج البنية تشلعن ايديها
بدور:وانته شيهمك انته تعبت بيها يعني واحن مني عليها
فارس كام راح سحب بته من ايدها:مو حيوان بيدج هي.. ياحنية انتي هم تعرفيها هالحنية..انه ابدلها كومي لمعجبينج خاف فاتهم البارحة تعاركتي وياي واليوم بسبب الهجران مو هيج لو لا
بدور بصياح:وتظن انه هل كثر ماستحي وانشر هيج عن حياتنه الخاصة
فارس:اشش صوتج لا وتراب الأمير اكص لسانج هذا
لجين خافت وعيونها دمعت وعدها ثكل بشوية احرف...
لجين:بابا لا تضلب ماما(لا تضرب)
فارس لزم وجهها:لا بابا مايضرب ماما..وباسها بخدها والتفت لبدور..خوفتي بتج ماعندج احساس
بدور:انته الماعندك احساس وعلي انه مليت منك ومن عيشتك..الله العالم وين جنت هسة واجيت
فارس لزم اعصابه مايسحلها سحل واخذ بيده بته..وطلع بيها بره وراح اخذها لأبو الاسواق الي بآخر الشارع حتى يشتريلها حلويات
ويهدي اعصابه...
ومر اليوم عادي وبالليل ماكو شي غير صوت الولد يلعبون دومنه هنوبه وصوتهم واصل لآخر الدنيا وبس اجه ابوهم سكتو نصو الصوت والعرايك مالتهم.....
والبنات كاعدات يمهم..حتى بدور كاعدة وقافلة وضايجة وتباوع لفارس بحضنه بته ويحجي وياها وشكد يحبها ويهتم الها ويبوس بيها...
وكاعدة تتمنه لوهي بمكان بتها وتحصل على حب فارس حيل تحبه..وهي مقتنعة انها مو غلطانة وفارس كله غلط بغلط وهو الي يسوي المشاكل...
ماتدري هي الي غلط بغلط وانو هي الي تسوي المشاكل دوم وحتى مرات تعلي صوتها ومايحجي وبطل يمد ايده عليها لأن بته كبرت وجاي تتأثر...
وتدري بي مايريد طفل منها وهالشي واضح من يجيها مرات وبطريقته الي تفهمها كلش زين انو هو مارايد طفل...
هي لجين عمرها 4 سنوات لأن تأخرو يالله صار طفل وصارله 7 سنين متحملها..وهالبنية دلوعة البيت كله لأن ماعدهم اطفال...
مشتاق اعزب وفارس مايريد جهال..ونور ولده كبار...
وماكلين راس فارس ويكلوله ليش ماجاي يصير عدكم طفل..وبدور تكلهم مانريد طفل بس لجين كافي...
نواف صغر عيونه على عمه مشتاق:اكول مشتاق تدري جايتك عروسة من ألمانيا باجر خخخخ سمعت يكولون حلوة تاخذ الحيل بت العم
مشتاق:لا حبيبي هاي العروسة الك ماريد اتزوج شبيه جايبلي علة وجهال واق ويق..وبعدين جم مرة اكلك كلي عمي..وضربه بظهره..شنو تكلي نواف حبيبي؟
نواف ابتسم:مشتاقوو هههههههه
مشتاق لزمه من راسه وحطاه جوى زنده وعصره وخنكه ونواف يستنجد بعمه فارس وخالد وهيثم..وهمه يضحكون عليه يكلوله احترم تُحترم...
نور يشرب جاي:هاي الألمانية راح آخذها الك بلكي تعقلك
شهد:هسة بت العم ترطن كله ألماني وين يفهمها وتعرف بأبنك نويف هايشة بالانكليزي هنوب ألماني
(الهايشة..بقرة)
زهراء:عزززاا لعد شلون راح نفهم عليها شنو نحط عمو صفاء مترجم يمنه ههههه
نواف فك نفسه من مشتاق وجهه احمر:وليش ما نزوجك انته ياشيخ اعرف بكلبك هسة اشباح معشعشه والأحم احم عليه تراب
خالد:اي يابه نزوجك هالألمانية انته ابن عمها اكيد جاي اتدور ابن الملحة الأسمر الي تكتل هيبته شباب المانية كلهم مايعين اكيد
نور:شهالميانة الزفرة بويه..نواف لسانك لا جلدك اصلخه عبالك مايفهمون حجيك..والله مفشلني شكبرك وشكدك وابن شيوخ وطايح حظك
فارس:زوجه بلكي يعقل..على كولتهم زوجوه هالألمانية ههههه..انته تذكرها نور من اجت جانت طفلة هسة كبرانة
نور:هسة صايرة مرة وهي اكبر من نواف..وين تقبل بهذا الطايح حظ جنها جمارة اذكر عليها هي واخوها
بدور:تلكوها هسة صايرة كمر..بس نواف هم حلو شماله..بس هم ماتقبل بيك نويف لا تفرح ههههه..هي عايشة بألمانيا مو بغداد حتى حجيها هسة يختلف عنه ومعتقداتها هناك بلد حريه
نواف يعدل بشعره:يابه شوق
ESTÁS LEYENDO
قصة الشيخ نور التميمي
Ficción Generalهو هذا الي يفز الكلب لو صار كبالي..هو وهيبة شخصيته انته انته يلي ابالي..بيش اوصف هذا الشعور الي هسة منك اجالي..فهمني علمني شلون اعشك يلي غيرك ماصفالي....
