( Unicode )
♪ လေ... ပြေညင်းရယ်
ငြိမ်သက်ဆဲ... ညမှာ
အသာအယာတိုးလို့ တိုက်ခတ်နေ
သင်းပျံ့မွှေးတဲ့ ပန်းရနံ့တွေ
ဆောင်ယူ သယ်လာ လေညင်းရယ်... ♪ခေါင်မိုးအချွန်လေးနှင့် သေသပ်လှပပြီး အနောက်တိုင်းပုံစံ တည်ဆောက်ထားသည့် အဖြူရောင် နှစ်ထပ်တိုက်တစ်လုံးအတွင်းရှိ ဧည့်ခန်းကျယ်ထဲတွင် ကြားနေရသောသီချင်းသံက နားထောင်ရသူတို့၏ ရင်ထဲသို့ တသိမ့်သိမ့်ဖြင့် ဆွတ်ပျံ့ကြည်နူးဖွယ်စီးဝင်နေသည်။ သာယာငြိမ့်ညောင်းသည့် စန္ဒရားလက်သံသည်လည်း ကြည်လင်ချိုမြသော ထိုသီချင်းသံနှင့်အတူ ပနံရစွာ လွင့်ပျံလျက်ရှိ၏။ စားပွဲပေါ်မှာတင်ထားသော အလှပန်းအိုးထဲတွင် ထိုးစိုက်ထားသည့် နှင်းဆီဝါလေးများကလည်း ၎င်းတို့ထံမှ အကြည့်မခွာချင်စရာ။ သင်္ကြန်တုန်းက မရွာဘဲ နောက်ကျမှရောက်လာခဲ့သော အခါလွန်မိုးဖွဲက တံစက်မြိတ်အောက်ရှိ ပိန်းပင်အရွက်များပေါ်မှတစ်ဆင့် မြေပြင်ပေါ်သို့ တစ်ပေါက်ချင်း ခုန်ဆင်းနေကြသည်။
သီချင်းဆိုနေကြသူများသည် အသက်ရှစ်ဆယ်နားနီးပြီဖြစ်သည့် အဘိုးကြီးအဘွားကြီးလင်မယားနှစ်ယောက်ဖြစ်ပြီး စန္ဒရားတီးနေသူကတော့ သူတို့မြေး အိမ်ရှေ့မင်းသားလေးဖြစ်၏ ။ မယ်တော်ဒေါ်သီရိရတနာဘက်က တော်စပ်သော အဘိုးဦးကျော်စွာနှင့် အဘွားဒေါ်ခင်လေးကြည်တို့အိမ်သို့ ဘုဏ်းဇေယျာကျော်တို့ မောင်နှမအလည်ရောက်ရှိနေကြခြင်းပင်။
နှစ်တိုင်း သင်္ကြန်အပြီး တစ်ပတ်လောက်နေလျှင် သည်အိမ်မှာ သူတို့မောင်နှမ တစ်ပတ်ဆယ်ရက်ခန့် လာနေလေ့ရှိကြသည်။ နှစ်လတစ်ခါခန့် အလည်ရောက်ဖြစ်ကြသော်လည်း အခုလို ညအိပ်ရက်ရှည်နေတာမျိုးကတော့ တစ်နှစ်မှတစ်ခါသာ။ အဘိုးနှင့်အဘွားကတော့ သမီးနှင့်မြေးတွေကို တွေ့ချင်လျှင် ဘယ်အချိန်ပဲဖြစ်ဖြစ် နန်းတော်ထဲ အလည်လာတတ်ကြသည်။
နောက်ငါးရက်ဆို မင်္ဂလာသက်တမ်း အနှစ်ငါးဆယ် ပြည့်တော့မည့် ဘုဏ်းဇေတို့ အဘိုးနှင့်အဘွားသည် ခေတ်နှင့်အညီ လိုက်လျောညီထွေစွာ နေတတ်ကြပြီး စိတ်ပျိုကိုယ်နုဆိုသည့်အတိုင်း အသက်ရှစ်ဆယ်နီးပင်ဟု မထင်ရလောက်အောင် နုပျိုကျန်းမာကြသူများဖြစ်၏။ ဂီတကို မြတ်နိုးကြသူများပီပီ အခုအရွယ်ထိ သီချင်းဆိုလျှင်လည်း အသံက မကျကြသေးသလို စာသားမေ့သွားခြင်းမျိုးလည်း မရှိကြ။ ဘုဏ်းဇေ၏ ဂီတပါရမီသည် သည်အဘိုးအဘွားတွေဆီမှ ပါလာသည်ဟုပင် ပြောရမည်။
YOU ARE READING
Forget-Me-Nots { Completed }
General FictionA Love Story ( Own Characters ) ဘုဏ်းဇေယျာကျော်xရှင်းသန့်တည်ကြည် " မင်းသားလေး...မင်း ငါ့အပေါ် သိပ်သဘောကောင်းတာပဲ၊ ငါ့မေမေကပြောတယ်၊ အသက်ကြီးလို့ လက်ထပ်တဲ့အရွယ်ရောက်ရင် ကိုယ့်အပေါ်ကောင်းတဲ့သူကိုမှ လက်ထပ်တဲ့၊ ငါကြီးရင် မင်းနဲ့လက်ထပ်မယ် " " ငါတို့က ယော...