عدت شهور ولا عدا الشعور

20

~بالفندق-قبال السياره~
ريان: احس اني متوتر خلاص رجعني مابي اروح معك
حمد يحاول يعدل نسفته: خلاص اسكت حتى انا متوتر اكثر منك الشماغ ذي عيت تضبط
ريان ساعده: ضابطه والله بس انت من التوتر تحسه خربان
جيك طلع راسه من السياره: هيا لا اود ان اتاخر على الموعد
ريان: يلا خلاص شماغك ضابط خلينا نركب لايموت علينا الامريكي هذا
ضحك: يلا احس اني جاهز

~بالمزرعه-الرجال~
مابين السوالف وريحة العود ممتزجه مع ريحه القهوه اللي طغت على المكان والضحكات اللي نابعه من القلب احيت المزرعه بعد موتها وانقطاع الناس لها
سعد جالس قبال البوابه وكل شوي يطالعها وينزل عيونه لجواله
قبضه راشد: تراك مفضوح وش تنتضر
سعد فز: الله ياخذك مالقيت تقبض الا من ذراعي وانت عارف ان عصى جدتي مرت على هالمكان
ضحك: الا عارف بس ابي اوجعك زياده
فز سعد على حيله وهو يرحب بصوت عالي رفع الرشاش فوق وبدا يضرب فيه:  يامـرحبا مليون ماتكفي ولا تسد يامرحبا ياعضيدي
ضحك حمد بضياع: جعلك تسلم يابو جابر
حضنه بقوه سعد: والله ماني عارف من فرط شعوري وش اسوي احس اني مجنون واني اتحلم تكفى اذ هو حلم مابي اصحى منه
حمد: مجنون وانا اشهد جامع لي الحشود كلهم باول لقاء ليه
سعد: اليوم بترسى سفينتك وبتنحط على بعض الحروف نقاط ما انتهت القصه كلها باقي لها جزء بسيط وتبان حروفها ومعانيها
بعد سعد عنه ولف لجيك: جيك لماذا لم تلبس زينا الرسمي
جيك فرك جبهته بتوتر: اصمت يارجل اني لا اود تذكر المره السابقه هم لما بهذا الكم الهائل
سعد: لا عليك هذي هي عاداتنا وتقاليدنا
سعد سلم على ريان: ماشاء الله انت اول واحد يصادقه خالي
ريان بحراج: تسلم والله

~بالمزرعه-الحريم~
طغى زينهن على كل الحريم واللي خلاهم يستغربون من طلتهم المبالغ فيها بالنسبه لهم
ام عابد: علامكم ياام عبد المحسن متدهرات ومتزينات وجايبات من هاللي يقهون الحريم مدري وش يقالهن ماهو من السناعه والذرابه انكم تجيبونهم
غُند: يقالهم يام السنع والذرابه ناس مثلنا مثلهم على الاقل فكرو يشتغلون على حالهم مو يطيحون بكبد امهم مثل بعض الناس
جواهر همست لها:بس ياغُند اليوم بس كفي شرك عن الناس عشان فارس
الجده: يحق لنا عيالنا طالعين من شر
فجاءه سمعو طلق نار قامت الجده وقلبها مقبوص لحقتها غُند بعدها استوعبت انها بدون غطى شافت رويدا توها راجعه من سيارتهم وعليها عباتها: تكفين الحقيها لايصيبها شي
رويدا: ابشري

~بالمزرعه-الرجال~
بعد ماسلم حمد على الرجال مسكه سعد وسحبه بالوسط بحيث ان الكل يشوفونه: انا جامعكم ياهل قريه ام جلاجل ياهل الوجيه الطيبه على شرف براءة حمد بن غنام من تهمت الشروع بالقتل حمد طلع براءه حمد بريئ من دم محمد
عايض: جايب بيننا قاتل وتقول بريئ من متى القاتل يكون بريئ
سعد: ماتهمنى انت وراسك العقيم المهم احنا ياهل ندري بطهره ولا من متى وانت تصدق الشي دايم وانت ضده اللي ماهو مصدق ان حمد بريئ يقوم يطلع برا بكرامته احسن من انه بعدين يجلس يتكلم فيه وهو حاضر يوم اني نفيت انه قاتل قام عايض وطلع: الله يرحمك ياغنام انت ونايف بعمرهم ماطردو احد من مجلسهم
لف حمد على صوت حرمه كبيره بالسن  : يابري حالك ياحصه ولدك اللي ابوه مات مقهور عليه هذا هو قدامك
سندتها رويدا: اذكري الله ياخاله لا
ينخفض عندك السكر
الجده: لا إله إلا الله لا إله إلا الله انت حمد ولدي انت هو؟
ضغط سعد على كف حمد: رح لها قرب لها حمد وحضنته
بكت الجده: الحمدلله الحمدلله الله نصرك قرة عيني بشوفتك انت حمد صدق؟
حمد: ايه يامي والله اني حمد
بكت من جديد: وينك ياغنام تشوف ان ولدك بريئ من اللي يقلونه
ماقول غير حسبي الله ونعم الوكيل
حمد بصوت مرتجف: ابوي مات؟
الجده: ابوك مات من قهرته عليك وانك مسجون ابوك مات لان اهل الديره ماقصرو زادو عليه ضيقته مات وهو على فراشه طريح مسحت دموع حمد بمسفعها:ترحم عليه بس الحين رح واجلس مع الرياجل واذ راحو تعال
تحرك حمد بيروح بس صوت البنت اللي مع امه وقفه: لو سمحت ممكن تنادي لي ريان اخوي هو اللي جالس جنب ابو بدله تكفى بدون مايحس عمي
حمد اشر لريان يجي قام وهو مستغرب: وش تبي
حمد: مو انا اللي ابيك واشر على البنت
شهق: رود ما صدق وش جابك هنا
رويدا حضنته: سالفه طويله تكفى لا ينتبه لك عمي تراه مايدري اني اشتغل كذا انا جيت بدون مايدري
ريان: امي وين؟
رويدا: بالبيت
ريان: بترجعين معي بس المشكله اني ماجبت سيارتي بس عادي بدبرها
اذ جت اذ صارت اثنعش خليك واقفه برا
رجع ريان وجلس جنب حمد: اذ طلبتك شي بتردني
حمد: لا اطلب
ريان: ابي الامريكي يرجعني للفندق باخذ سيارتي عشان باخذ اختي وامي وارجع لبيتنا
حمد سحب يد ريان وحط المفتاح وسكر يده: وليش جيك يوديك خذ انت السياره واكشخ فيها على اهلك وخلكم بالفندق هالاسبوع لين يمل عمك ومايلقاهم ثم ارجع
ريان: جزيت خير يابو غنام ولكن سيارتي هناك جاهزه وشقتي مايعرفها عمي يعني اموري بالسليم
حمد: اجل على ماتحب وبين فتره وفتره انزل لام جلاجل سلم علينا وتعلل عندنا يومين كذا
راشد راقب حركات سند ويدعي اليوم ينتهي بدون مشاكل من لحظه تصريح سعد عن هوية حمد وهو يراقب انفعالات سند اللي وجهه قلب اسود وبهت التفت يدور فالح شافه واقف مع صفوف العرضه ارتاح ان فالح ما اهتم وراح يدور شي يرقص عليه ويرفه عن نفسه
سعد سحبه يدخل معاهم وبدات اهازيج العرضه المعروفه والكل مستمتع وفرحان برجعت حمد وبرائته من دم محمد

~المزرعه-الحريم~
رجعت الجده وهي من فرحتها تحس نفسها رجعت شباب رجعت لاكثر من ثلاثه وعشرين سنه: جواهر
جواهر: سمي يمه
الجده:عز الله انك ربيتي رجال شديد باس وفعل على انكم رحتم لبلاد الكفار الا ان طبعه ماهو مثلهم ماقصرتي انتي وولدك
جواهر: انا وسعد تربيتك يمه
الجده: قبل حوالي ثلاث اسابيع سعد وعدني واليوم نفذ وعده اخوك حمد طلع براءه وهذا هو جالس بين الرجال ربشت سعد اللي اليوم عشانه عارف
ارتفعت اصوات الحريم اللي يسال كيف واللي يبارك لهم واللي يقول انه كذب وانه قاتل واللي اخذت عيالها وهجت خوف عليهم منه
الجده: شغلو لنا شي نتمايل عليه
قامت غُند وشغلت السماعه وبدؤ يرقصون من فرحهم

~المزرعه-الرجال~
راشد مسكه قبل يطلع: تعال وين رايح
سند نفضه عنه: بعد عني ولا اشوفك بوجهي
راشد: سند ادخل لاتسوي شي تندم عليه بعدين وتندمنا معك
سند: مالك دخل فيني راشد حتى لو احرق نفسي
راشد: احنا اخوان نحزن ونضيق ونضحك مع بعض ولا شي نخبيه عن بعض لو واحد فينا زعلان يعلمنا واحنا نساعده نسيت؟ نسيت هذاك اليوم اللي اخذنا فيه هذا العهد؟ انت كذا قاعد تنقضه
بدا يرخي حجاجه: لا مانسيت
راشد: ماراح اسالك ليه معصب بس ابيك تدخل
سند: اعفيني من هذا الطلب وانا اخوك مقدر المكان هذا بكبره ضايق فيني ثوبي وهو ثوبي خانقني عاد كيف المزرعه ذي بكبرها بطلع اتكي بسيارتي لين تنامون واجي لا تخاف
طالعه راشد لثواني ثم هز راسه وراح
سند: اعذرني ياخوي نقضت عهدنا عشان موال يدور براسي شغل السياره وحرك لوجهتك

~الرياض-المستشفى~
حاتم: انت عارف مدى خطورة كلامك واتهامك لي بالباطل
سند: ماجبت شي من راسي كله هنا مثبت لك وقدامك على الورق والمصيبه ان حمد طلع معناته انهم بيسجنونك لو اقدم لهم ادلتي عطني بس تبرير واحد لقتلك لابوي
حاتم: ماقتلت احد ماتفهم
سند: حاتم لي نص ساعه عندك والاوراق والادله قدامك ومصر تكذب؟! خايف يعني؟
حاتم سحب الورقه مره ثانيه وجلس يتاملها: انا قلت لك الحقيقه وسبق وقلتها للشرطه لما استجوبوني انا ماكنت موجود وقت الحادثه
سند: واضح ان ليلنا طويل اختصره علينا واعترف
ابتسم لما لاحت بباله فكره سحب الدرج الاول: مو راضي تفهم؟ مالي دخل بالمشكله من اساسها ولكن عشان يفهم راسك العقيم سحب الولاعه واحرق الاوراق واخذ الفلاشه وكسرها:لا تتهمني بادلتك التعبانه ذي ياحسافه اني عديتك واحد من عيالي وعاملتك مثلهم

(لَأّتٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)