عدت شهور ولا عدا الشعور

37

~المكتب~
واقف عند الشباك ورافع الجوال قريب اذنه يسمع التسجيل
عبد العزيز: فيه كلام كثير مب باين
قفل التسجيل ولف عليه بسرعه: وانت وش تبي هنا مب انا قلت لا احد يجيني؟!
عبد العزيز: جيت اقول لك قدمو قضية ابوك لبعد اسبوع ونص من الحين
سند: الموضوع لعبه يعني؟
عبد العزيز: مدري انا جيت اعطيك اللي عندي …الا التسجيل ذا حق مين؟
سند تنهد: شكلها قضيه ثانيه بالطريق والقضيه ذي اهم من اللي ماسكينها

~بيت حصه ــ صباح جديد~
صحت اليوم وتحس خاطرها مكدر ولا لها خلق دخلت المطبخ بملل وشغلت النار على ابريق الشاهي وفتحت الشباك تجدد هواء المطبخ وبنفس الوقت تنتظر الماء يغلي تكت على طرفه تتامل الجو وصوت العصافير النشيطه مع الصباح لفتها شي في اخر الحوش عقدت حواجبها: بسم الله هذا وش؟!
طلعت من المطبخ بسرعه للحوش
اشر لها حمد تجي له: غُند تعالي
قربت تمشي على حذر وهي كل شوي تلف تطالع ورا
حمد: ارحبي يا دهر قلبي ورجعانه
غُند: تبقى وش عندك جالس هنا
حمد: ابد طلعت اتنفس شوي الا انتي وش عندك
غُند رفعت اكتافها: مدري وانا بالمطبخ شفت شي غريب هناك وطلعت اشوفه تجي معي؟
قام حمد: ايه يلا …اخبارك اليوم
غُند تنهدت: الحمدلله
حمد: ضايقك كلام سلطان صح؟ ماعليك منه انا وسعد وفارس وامي وجواهر وحتى ناصر بنوقف بوجهه
غُند بضيق: كلامه ما ضايقني بس اني شلت بخاطري طلع كل ذي السنوات يسوي هذا من ورا قلبه
حمد: تدرين انه منع ناصر ياخذك وان ناصر طول الاسبوع يحاول فيه! اصلا انا لاحظت ان ناصر اخر الاسبوع كان يتجنب ابوه وينام عندنا بس ماتوقعت ان المشكله بذي الكبر سلطان قاعد يدمر حياته فوق ماهي مدمره
شهقت بقوه: ايش هذا؟!

~لندن ــ المستشفى~
جابر مسك كتفه: حالة ابوك بتحسن كبير جدا خصوصا بعد اخر عمليه والدكتور المشرف على حالته قال ان الفتره ذي محد بيدخل عنده لمدة اسبوعين على الاقل لان عبد المحسن مناعته صارت ضعيفه ويحتاج وقت يتعافى
مسلط: طيب ياعم ايش رايك ترجع لعيالك؟ اكيد انهم يبونك
جابر ضحك: الله يهديك وش الكلام ذا اكيد ان فارس دق عليك وازعجك انت واخوانك وبعدين عيالي كبار وانا حالف ما ارجع الا ومعي عبد المحسن 
مسلط: تعبناك والله
جابر: اقول وش تعبناك جديده ذي انا وابوك عشرة عمر ومستحيل انه اذ تعب ما اوقف معه
مسلط مسح على وجهه: وهذا اللي صار من ثلاث سنين وانت وابوي من مستشفى لمستشفى
جابر: لا تحط املك انه بعد ذي العمليه يعني خلاص لا اكيد فيه مراحل علاج ثانيه وتاهيل لانك مثل ما انت عارف ابوك اخر فتره فقد المشي والدكتور المشرف على حالته قال بيرجع يمشي بعد استئصال الورم لانهم عطوه مثبطات واكيد حتى وظائف جسمه قلت حركتها وتخثرت
مسلط: ابوي قبل يدخل العمليات قال اول ما يطلع يبي يرجع للسعوديه ويراجع هناك
جابر: للاسف لا بيكون صعب عليه

~ناصر~
قفل جواله وتنهد: لا حول ولاقوة الابالله ابوي الفتره ذي غريب كل ذا عشان ما اخذ غُند!!
بدر: معليك يزينها الله انت بس توكل عليه
طالع ديكور المطعم بترقب: ياعيال المطعم شكله مميز
ناصر: طبعا اختياري اكيد غير وتوك ماشفت الاكل رهيب بصراحه اول اكله اكلتها يوم توظفت هنا وطعم يوووه
بدر: تحمست له لان ناصر مستحيل يمدح اكل وهو يارب لك الحمدلله
ناصر: عندي لكم تحدي قوي هو مب قوي لكن اللي يسويه له الف ريال
مشعل بحماس: تم وش هو
بدر: تم
سحب علبة الزيت زيتون: اللي يشربها له الف ونبدا من مشعل لانه متحمس
مشعل: لا الدعوه فيها زيت الزيتون مابي
ناصر: مالي دخل انت اللي تممت بدر امسكه وانا بشربه افتح فمك يلا
بدر طالعه ثواني وثبته
مشعل تحرك: لاا لا بدر ياكلب فكني فكني
ناصر ثبت وجهه: افتح فمك اخلص تراه بس شوي
بدر يقاوم حركته: مشعل يلا فشلتنا الناس كلها تطالع
صبه بفمه وسكر فمه: ابلعه يلا ابلعه لا لا بدر يازفت امسكه لين يبلعه
طالعهم بحقد: انا اوريكم
مد له علبة الماء و الالف: اشرب ومبروك عليك الالف كاش

~غُند~
شهقت بقوه: ايش هذا
انحنى يرفعه صرخت عليه غُند: لااااا اتركه ابعد عنه
حمد عقد حواجبه: وش جابه هنا اصلا كيف جاء معقوله مرزوقه جابته؟
غُند: حمد فكر بعقلانيه العظام و الدم اللي حولها ماتقدر تجيبها مرزوقه العظام باين انها قديمه
لفت تطالع بسرعه: غريبه انهم ارسلو تهديد مبطن! يوم احرقو ابوي كانو معلقين باصبع رجله الورقه
حمد اشر على الكيس: هذي هي الورقه داخل الكيس
غُند: تحليلاتي تقول ان الكيس كان فيه الدم حذفه الفاعل من فوق السور وضرب بالحجره ذي وانفجر لكن العظام كيف رتبها بذا الشكل والمكان مافيه الا خطواتي وخطواتك
حمد دفها: اقول امشي قدامي بنطلع للمزرعه او اي مكان اهم شي جواهر ما تكون موجوده وقت ما نطلب التحقيق ولا حتى تدري بعدين

~بعد ساعتين ونص~
لبس القفاز وانحنى ياخذ العظمه طالعها ثواني ووقف
سند: تهديد واضح وصريح العظام اللي هنا واضح انها هرمه ولبهيمه كبيره بالسن وهذا يعني ان الطرف المجهول ناوي وبشكل صريح على اكبر شخص بالعايله ومن كيس الدم المفجور هنا نعرف انه ناوي يقتل بالمسدس
غُند شهقت: جعلها فيك وجع تتفاول على جدتي
حمد سد فمها: معليش حضرة العقيد هي اكيد منهاره وما تدري وش تقول اعذرها دقها بكوعه وهمس لها: ترا يشلونك بتهمة التعدي على رجال الامن
غُند قاومتة: الا ادري وش اقول و قاطعها صوت اطلاق نار
ركض سند للباب ووراه العساكر
طاحت غُند على ركبها: عمي حمد! امي حصه ماتت مثل مايقول سند؟
سعد سحبها: قومي يلا يلا نشوف امي حصه وطلعو يركضون بدون غُند اللي رفضت تقوم

~المزرعه~
جالسين وسط النخل وعلى العشب الاخضر والمكان اقل مايقال عنه خيال فارس وتميم يتسابقون من بدايه المكان الى نهاية وإلهام و اديم جالسين على الطرف ويتناقشون بجديه وعلى الفرشه وجواهر ومشاعل وجود وفالح وراشد يتقهوون الا الجده جالسه جمب الفرشه
الجده: ياربي لك الحمد اللحين جالسين على الفرشه ليه واحنا مشغلين العمال  وبرواتب يزرعون ويكدون وبالنهايه حاطين فرشه
ضحك راشد: الحين هذا اللي مكدر خاطرك من اول؟
هاه وهذي القهوه اخذناها وجلسنا جمبك كذا رضيتي
الجده: ياعلني ماشوف فيك باس ماهو انتم
مد لها الفنجان: تقهوي يام عبد المحسن جعل ما يتقهو غيرك
الجده: سلمت …راشد وانا امك قم شف الماخوذ عبدو قلت له يجيب لنا رطب واختفى رح شفه وين ذلف ولا هاك القدوع جيب لنا انت
راشد: بالمستودع الكبير
الجده: ايه عجل لا يبرد فنجالي الا والرطب عندي
قام فالح وانسدح عندها: يمه حصه اقري علي احس اني مب كل ذا من صحيت
الجده: بسم الله عليك اقرب وانا امك اقرب
وبدت تمسح على راسه وتقرا عليه
دقايق وسمعو صوت طلق نار وصراخ

(لَأّ تٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)
لا تنسون النجمه والكومنت الحلو…