عدت شهور ولا عدا الشعور

30

~سند~
دخل الشقة وحذف نفسه على الكنبة
سياف:هاه وش صار
سند: ولا شي غير اني برجع لديره
سياف: خلاص بتقفل القضيه بعد مافتحتها
سند: ايه خلاص بكنسل
سياف: كذا يعاقبك القانون على فتحك للقضيه وتركها معلقة وقت وبعدها تقفلها بدون سبب فكر بعقلانيه شوي وافتح مخك ووسع بحثك وكثفه انا متاكد اننا ندور حول الحل بس متغافلين عنه ولا انتبهنا له
سند: ياشيخ انا الحين تعبان وابي انام واذ صحيت رجعت افكر وامخمخ عليها

~في الشرقية~
بدر بحماس: ميشو يلا موعدنا
قام مشعل بحماس: دقيقة بس ابدل
فتح بدر جواله و ثبته على الحامل  وبدا يصور فيديو: اليوم انا والخوي مشعل بنطلع مشوار بسيط جدا وحبينا تشاركونا فيه يلا يامشعل جاهز؟
طلع مشعل: ايه يلا نطلع
مد له الجوال: امسكه عشان اقدر اسوق
اخذه: انا اليوم احس بدافعيه للحياه واحس ودي اجرب كل شي والحين بروح لموعدي وبعدها بنطلع نتمشى ونسوي كل حاجه بالدنيا
بدر ربط حزام الامان:يلا نسوي مثل فلوقات اليوتيوب المرتبه
مشعل: حرك بسرعه ابي اصل للمستشفى واخلص
بدر: الحلو بذا اليوم ان جلستك اليوم فضفضه بس
مشعل: وهذا اللي مريحني ومخليني مبسوط وفيني طاقه كبيره
بدر بدا يعد: اول شي الموعد اللي بعده بنطلع نتابع فلم
قاطعه مشعل: لاا انا فيني طاقه فضيعه ولا ابي اطلع اتابع فلم خساره تروح طاقتي عليه شرايك نطلع للبحر ونلعب بالدبابات ولا نركب احصنه او حتى نركب دبابات مائيه اي شي نضيع فيها طاقاتنا
بدر: والله انه تم

~الصالة~
صرخت من القهر: قهرتني ماعاد اتحملها
انهارو العيال يضحكون
غُند: ماكنت ارحم الا زوجها او نقول طليقها كل عزيمه يجيب لها طقم ذهب جديد وتلبس كل الذهب اللي عندها مع الطقم الجديد لمنك نديتها ماتقدر توقف من كثرهن
حمد: طليقها من الديره؟
ناصر: ايه فلاح عرفته؟ اللي يشتغل في محل الذهب
حمد: ايــه اذا عرف السبب بطل العجب طمعانه بفليسات الضعيف
اديم: الحمدلله انه طلقها احسه المسكين تعقد
ناصر: وش دخلك فيه خير
فالح: خلاص فكونا من سيرتها اللي تقرف
فارس:ناصر غني لنا
تميم: ايه تكفى انا من امس وانا افكر بصوتك واسمعه ببالي
غُند بسخريه: مستحيل هذا يطلع منه شي
ناصر: اصلا ماراح اغني لكم ماتساهلون تسمعون صوتي
قامت: عاد حنا اللي ميتين نسمع هالصوت صوت مقصود عامل الزرع اطلق بميتين مره
حمد: خلاص ماراح نخليه يغني بس انتي وين رايحه
غُند: بروح لسعد يمكنه فطس

~بعد يومين~
غُند: لا ياسعد انا عطيتك رايي من سنين ولا يمكن اغيره او اتراجع عنه
سعد: الا بيتغير وبتتراجعين عنه الحين مو مثل اول الحين جدتي عندها امي وخالي حمد موجود
غُند: الموضوع عندي غير قابل للنقاش قفله
سعد: ترا بسجلك غصب عنك وبتدرسين وتكملين الجامعه وتتوظفين وتعيشين حياتك
غُند: مب على كيفك حياتي وانا حره ماجلست اربع سنين بعد الثانوي الا وانا مقتنعه وعن رغبه لو لي بالدراسه كان كملت لكن انا الدراسه ماتستهويني ولا احبها
سعد: نضحك على مين ياغُند نسبتك بالثانوي كلها ميه ونسبه قبولك عاليه جدا تعالي وكملي جامعه وبدخلك طب مثل ماتبين وتكملين حلم خالي حمد اللي ماكمله؟
قامت من عنده: لا مابي ولا راح ادرس
جواهر: انا ساكته من اول بشوف نهاية نقاشكم ايش غُند بترجعين تدرسين غصب عنك
رفعت طبقة صوتها: لا يعني لا حاليا ماني مستعده
جواهر: وانا قلت لك شي تسوينه
غُند: اصلا انتم ماينفع معكم الا جدتي احترمو رغبتي الدنيا ماهي غصب
كثير أشياء سايرتكم فيها ومشيتها بمزاجي لكن الحين لا والف لا وطلعت
جواهر: الله يعين بنتعب معاها

~مشاعل~
مشاعل: يعني الحين وينك انت
سند: رحت لدوام استدعوني
مشاعل: مو انت اخذت اجازه ثلاث شهور كذا فجاءة يقطعونها
سند: لا انا قطعتها لان فيه اشياء قدرت احلها ولا ابي أأجلها لبعدين الفرج قريب ان شاء الله
مشاعل: الا وش صار على عمك
سند: يخسي ماباقي الا هو يصير عمي
مشاعل: اللي هو وش صار عليه صار له فتره هاجد عنا ولا يدق عشان نرجع اخاف اذ جينا يطردنا وقتها
سند: افا يمه تخافين منه وانتي ورا ظهرك رجال ينشد الظهر بهم وتهتز المجالس من اساميهم
مشاعل: الله يجعلك ذخر لي وسند على اسمك …تدري ياسند ابوك ليش سماك سند
سند: لا والله مدري
مشاعل بحنين للماضي: لانه اول ماشافك واخذك قال هذا راح يكون سند لاخوانه ولي من جور الدنيا ماخاب يوم سماك سند كنت سند لي ولاخوانك بعد اخواني
سند: الله يجعلني يارب سندكم وقوتكم المهم عشان لا اطول عليك حاتم هرب واختفى طلعت عليه كذا قضيه احتيال وغسيل اموال وهرب برا السعوديه
شهقت: لا يكون ورطني معه اعرفه ذا خبيث ويموت لو مادخلني بالسالفه
بلع ريقه: لا مدري انا الفتره ذي بدور عنه واحقق معه واشوف بس لو سمحتو لا احد يدق خصوصا راشد يستلم جوالي ويحرقه اتصالات ويسبب لي قلق …ناقصكم فلوس شي؟
مشاعل: لا وانا امك استودعتك ربي وانتبه لنفسك وحافظ على صلاتك بوقتها اعرف الله بالرخا يعرفك بالشده

~بعيد عن اراضي الوطن~
: سويت مثل ماقلت لك؟
: ايه المفروض ترفع لي السعر شوي لاني جلست بالمكان وقت طويل وارسلت ولد اخوي للاستقبال عشان نشتته
: ماعليك حقك وحق ولد اخوك بيوصلونك وزياده بس ارسل لي رقم الحساب وعطني ثنين من رجالك احتاجهم يذبحون شخص
شهق برعب: لا معليش مقدر
: اقول لا ذبحك انت بداله وترا اسويها وبدون مايرف لي جفن
برجفه: خلاص طيب ارسلهم لك لروما على طول؟
: لا ارسلهم ترانزيت للندن على طول وكل واحد وجهه غير وبدون شبهه لو سمحت اي واحد يسوي لي خطا بشنقه عندي
: خلاص طيب يومين بالكثير وهم عندك
: يومين ايش ياغبي اسبوعين كاملين في كل محطه ينزلون لها يجلسون اقلها ثلاث ايام توي اقول لك بدون شبهه كذا انت بتجيبها لنا

(لَأّ تٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)
هاه كيف البارت يستاهل الغيبه ولا لا؟ بحاول اختم الروايه قبل رمضان فابتحسون بتسريع للاحداث شوي