عدت شهور ولا عدا الشعور

21

~2005-١٤٢٦-المزرعة-ليلة رمضان~
كان كل سنه غنام يجمع اهل القريه بذا اليوم ومن تعب ابوه ومات صار هو بدال ابوه يجمع الناس بذي الليله بالمزرعه لين السحور ثم يفترقون
نايف: ياسعد قم صب قهوه لعمك حمدان
حمدان: توه صغير على مسكة الدله
نايف: لا ماهو صغير قطع كلمته يوم صرخ حمدان من قوه الحراره
سعد طالعه بخوف: اسف ياعمي
نايف ضربه: وش يفيد اعتذارك قم اذلف داخل وجيب ماء بارد
ناصر: طيب
دخل جابر بعد ماخلص المكالمه
جابر: عسى ماشر صوت واصل للمقبره
حمدان قبضه عشان يسكت: اسكت هو يبيها من الله عشان يضربه لا تزودها
نايف: لا والله خل يعلم ولده السنع وطالعه: ولدك كب القهوه على حمدان
جابر احتقن وجهه بالدم: سـعـد وين راح الكلب ذا
حمدان: حصل خير يارجال
جابر: اي خير وهو كب القهوه عليك
سعد برجفه: سم
مسكه جابر: الدله تمسكها بيدك اليسار والفنجال بيدك اليمين وتكون بعيد عن اللي تصب له عشان ماتحرقه مثل ماصار لحمدان كم مره واحنا نعلمك
سعد: اسف والله
جابر مسك الدله: نخليك تجربها وبعدها نقول لك اسف
رجع للواقع بعد فزت حمد له: بسم لله عليك جاك شي
سعد ابتسم بالم: لا معليك ماجاني شي كايد
اخذه حمد للمغاسل: اكيد انه يوجع ماتشوفه كيف تنفخ
سعد مسح ملح عينه وصد: مايوجع بس انت تبالغ
حمد: ايه ماشفنا دموعك احنا من حرارته
سعد: اللي اوجعني ماهو الدله اللي اوجعني بن عاصم
حمد: افا مايوجعك بن عاصم دامني حر طليق خلني اشوفه والله لافتك سنوني عليه
سعد: ياشيخ لاتهايط يجي ويلطمنا كلنا وانت معانا ياشايب
حمد: يعني عشان كم شعره بيضا قلت عني شايب
سعد: وراك عصبت الشيب مايكسو الواحد الا ويزيده هيبه ووقار
حمد: حسافه فزتي لك ياورع اساعدك واخرتها تعايرني ماهقيتها منك والله
مشى سعد وراه: ماخبرناك زعول ولا يهمك بنخلي حصيص تحط لك سدر على شيباتك مثل ماكانت تحط لخالي نايف
حمد ضربه: حصيص اجل بعلمها ونشوف وش تسوي فيك الا نايف وينه ماجاء من قبل شوي وانا اتحراه
سعد سوا حاله ماسمعه وتخطاه وراح لراشد: تكفى يانشمي دبر لي مخرج حمد يسال عن خالي نايف ومابي اعلمه وش السواه؟
راشد: قله مدري وينه بعدين علمه
سعد: هو ماعرف عن جدي حماد الا قبل شوي
راشد: اعوذ بالله كل ذي السنين وماعرف
سعد لف وشاف حمد جاي لهم: جاء جاء تصرف وصرفني معك
حمد: سعيدان يوم اني اسالك وراه تسفه فيني
سعد: اسف والله بس فك اذني لاتطير هيبتي اللي تعبت عليها
حمد فكه: نايف وينه
سعد بلعثمه: هو يعني كان مدري
راشد تدخل: عمي نايف يطلبك الحل من سنين طويله
ارتخت كتوفه: انت تقولها صادق؟ يعني اولها ابوي والحين نايف طيب وين سلطان ووين عبد المحسن اصدموني اكثر وقولو انهم ماتو ايه وولد سلطان الكبير وينه ناسي اسمه والله لايكون بعد معهم
سعد عطى راشد نظره: لا معليك موجودين عبد المحسن مارجع لسعوديه من خبرك وسلطان عنده الفتره ذي مهمه الثلاث الشهور الجايه
وولده اسمه ناصر توظف قبل ثلاث اسابيع بالشرقيه
مسح راسه بضياع: لا حول ولاقوة الا بالله العلي العظيم طاحت ضلوعك ياحمد وماعاد لها مركاز طيب نايف عنده عيال من زوجته الاجنبيه؟
سعد: ايه بس بنت وتصير اختي من الرضاعه
حمد: وسلطان بس عنده ولد بس؟
سعد: لا عنده بنت كبر بنت خالي نايف
حمد: طيب يلا نروح لهم

~المزرعه-الحريم~
انسدحت غُند: تعبت
الجده: هذا و سعد شال عنك نص الشغل وتعبتي مفروض للحين فيك طاقه
جواهر: يمه
الجده: نعم يامك
بتردد: خلاص طاح عتبك لي عشان السالفه ذيك
الجده: دام حمد طلع خلاص طاح
باست راسها: الله يطول بعمرك ويحفظك لنا
سعد من بعيد: ياولد طريق
الجده: تعال مافيه الا امك واختك
سعد جاء: غُند بسرعه قومي العيال معي
رفعت ذراعها عن عيونها: ياليل منكم
سعد: لا يكثر وتعالي عشان خالي حمد يبي يسلم عليك
غُند: تصبحون على خير الصباح اشوفه واسلم عليه
سحبها سعد: اجل خليك واقفه يسلم عليك وروحي احسن من الصباح
ولف: حــمــد تعال
حمد: خالك ياورع احترمني
انصدمت غُند من الشبه بينه وبين ابوها وضلت تراقبه وهو يسلم على امه وجواهر
سعد: غُند من النوم ماهي مستوعبه الرجال صار له ساعه ماد يده وانتي قلبك نايم
غُند بإحراج: معليش اسفه ما انتبهت
حمد: حصل خير
الجده: قومي ياغُند جيبي القهوه
حمد: لا يمه بس لي فتره طويله ماشربتها واحس اني مو متقبلها
غُند دقته وبهمس: يشبه ابوي بشكل كبير انا لو ماشفت ابوي محترق قدامي كان قلت ذا ابوي
ضحك سعد: عشان كذا فهيتي؟
غُند تتامله: ايه
سعد: اقول حمد فيه ناس قالو انك تشبه فز بقوه من اظافر غُند: متوحشه وش سويتي وكمل: انك تشبه خالي نايف
حمد ضحك: عاد الصراحه انا طلعت اشبه ابوها وهي لا ابوها ولا امها كانها اخت لعيال محمد
جواهر: لا وين ماتشبه عيال محمد بسم لله عليها طالعه تشبهني بعمرها
حمد: ولا واحد بالميه تشبهك
الجده: ياسعد
سعد: لبيه
الجده: عشانك وفيت لي بوعدك تعال همز رجولي اليوم رجعت شباب ورقصت رقص حتى بزواج سلطان ما رقصت مثله والحين اعوذ بالله رجولي مقدر احركها
سعد: يمه وش دخل وعدي برجولك؟
الجده: محد قالك توفي بوعودك قم يلا والله ان ركبتي اليمين رجعت توجعني
جلست غُند عند ركبتها وجلست تحركها: يايمه انتي عارفه ان عمليتك ماهي كل ذا وراه تضغطين على نفسك كذا الحين بنخليك اسبوع ماتتحركين وغير كذا احنا نسينا موعدك
الجده: يووه المفروض اني قد رحت قبل يومين
غُند: اوراق مراجعتك مع ناصر
سعد: جدتي وعمليه؟ متى صار ذا كله
غُند صدت عنه: مالك دخل خلاص يايمه بكره ندق على ناصر يعطينا الاوراق ونروح تصبحون على خير

~صباح يوم جديد~
الجده: دقي على ناصر يعطينا الاوراق
غُند: طيب
رد: الوه
غُند: سلام
ناصر: وعليكم السلام غريبه داقه علي من جوال جدتي اهلي فيهم شي؟
غُند: مافيهم الا العافيه بس ابي منك اوراق مراجعه جدتي حق رجلها
ناصر: يوه نسيت موعدها مين بيوديكم؟
غُند: لو سمحت ابي الاوراق بغرفتك؟
ناصر: تسفهين يعني اخترتي ذا الاسلوب المهم تلقونه بمكتب ابوي الدرج الاخير اول ملف ولا تفكرين تعبثين بالمكتب ولا حتى تنبشين فيه لان احنا واحنا عياله ماندري وش فيه واذ خلصتي اقفلي الباب وحطي المفتاح في الزرعه اللي عند الباب
غُند: ياكثر هرجك خلاص فهمت
ناصر بتشديد: لا تفتشين بشي خوذي اللي لك واطلعي
غُند: ادري وقفلت بوجهه وطالعه الجده: يمه انا بروح اجيب الاوراق واجي وبعدها ندور احد يودينا للرياض

(لَأّ تٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)