عدت شهور ولا عدا الشعور

29

~صباح يوم جديد~
سند منسدح بالحوش يفكر
جلس جنبه حمد: اللي ماخذ بالك يتهنى به
سند: لا جعله لا يتهنى
حمد: افا وراه
سند عدل جلسته: افكر بمين اللي طعن سعد ويبيه يبعد عني
حمد بصدمه: سعد مطعون
سند سد فمه: اسكت ولا تفضحنا فيه واحد طعنه من اسبوع ولا يعرفه سعد ويقوله ابعد عن سند ولا تلعب بعقله
حمد: سهله حط احتمالات واحذف اللي تحس ان مب فعلته
سند سرح شوي يفكر
حمد نغزه: هاه لقيته؟
سند: تقريبا ايه
حمد بفضول: مين؟
سند قام: لسلامة صحتك النفسيه بعدين تعرف مو وقته اذ احد سالك عند وراشد خص قلهم مات طار اختفى اي شي الا اني ماسك خط للرياض وراح طالعه قبل يطلع: هاه ترا بذمتك ياحمد
حمد: رح الله يستر عليك بس
دخل حمد بالمجلس وشغل النور وطفى المكيف واخذ العصا وضرب فيها الباب: قومو يلا
فز فارس بسرعه وقفل النور وشغل المكيف وحط يده على فم حمد: اششش اسكت ترا سعد طول ليله ماقدر ينام جته حمى ويهذي
حمد: ياحنون ماعرفتك
راشد فتح عيونه: وين سند؟
حمد: مدري يلا قومو عشان بسوي لكم شي حلو
ناصر قام بعصبيه: اففف يعني حتى هنا مقدر ارتاح بنومي كفايه علي مشعل مقلقني ومسبب لي ازمه وتجون انتم بعد
فارس: خلاص اسكت ولك اللي يرضيك بعدين
وقف فالح بهدو ودخل الحمام
حمد: هذا وش فيه منفس
راشد: مالومه والله

~الجده~
دخلت على البنات بالغرفة ضربت العصا بالباب: لا صلاه ولا عباده الوحده جهادي فيها عشان تصحى لصلاة الفجر واخرتها يقرب الظهر
ولا وحده منكن صحت وانتي ياغُند ماتخلين صلاة الفجر ويوم جو العرب ماعاد اشوفك تصلينها بوقتها
غُند قامت بصوت كله نوم: طيب ياجده هذا انا بقوم ولا تعصبين ويرتفع ضغطك
الجده: يلا قدامي اشوف
نزلت من السرير وبان الشاش اللي برجلها جربت تمشي عليه وحست بوخز
الجده: ياوليدي هذا وش؟ صايدك شي
غُند بنفي: لا بس دخل برجلي قزاز وطلعه لي سعد
الجده: يلا عشان بنروح لغدا جارتنا ام سعيد
اديم: لاا تكفين يمه مانبي والله تغث وبنطلع من عندها وهي جثه
الجده: عيب عليكم وقومو تجهزو وطلعت
كتمت اديم صرختها بالمخده: تدقنا بالحكي ونروح لها ياربي من جدتي بس مدري متى ماعاد نروح لها المريضه ذي انا مدري اجيها منها ولا من بنتها سوير وع عليهم بس
جلست وبتقليد لسوير: اددييييمم ككييففهه نسوري حبيبي ما مر علي اليوم ولا شفته
وبقرف: وع ومالت عليها تقرف واصلا من متى ناصر معطيها وجهه هي اللي تحذف نفسها عليه
ضحكو البنات على تعابير وجهها
إلهام: شكلها ضاغطتك
اديم قامت: الله يصبرني عليها وما اذبحها
إلهام: اذ بغيتي انا اخليها تعتدل
اديم: ايه تكفين حارتني وجهه الثعلب
غُند صرخت: لااا اديموه ياحماره من قبل شوي وانا احاول اوصل للحمام وبالنهايه تدخلين يوم وصلت عنده
اديم ضحكت: محد قالك اللحين انتضري لين اطلع ولا روحي للحمام اللي برا اتوقع العيال قدهم قامو ودخلو للمجلس الداخلي
غُند بتافف: افف إلهام قومي عطيني ملابسي واغراضي بروح اخذ لي شاور هناك سحبت جلالها وصارت تعدله واخذت اغراضها من إلهام وراحت وهي تعرج للحمام
ناصر من وراها: خييرر ان شاء الله وش جابك هنا
فزت بخوف منه: يقطع شرك وقفت لي قلبي وانت وش دخلك
ناصر: وش دخلني اجل هاه
دفها بشويش و دخل الحمام قبلها
غُند بقهر حذفت علبة الشامبو عليه قبل يسكر الحمام: كلاب انت واختك متفقين علي