😍عشقت استاذي😍 👮‍♀️الشرطية و السجين🕵️‍♂️

البارت 2

سلام انا حمزة ***
بلا ما نوصفلكم روحي و نضيع الوقت و باينة بلي انا شباب نحكيلكم على شخصيتي
بون انا طفل وحيد عند والديا اللي هما السي علاء و لالة زينب تربيت في فرنسا بصكو كنت عايش تما و كي ديسيدا بابا نرجعو للجزائر كان عمري 17 عامي تاع الباك ،جبتو و الحمد لله تما بابا قالي لازم ندير ادارة اعمال باش نخدم معاه مي انا كان حلمي اني نخدم استاذ من صغري و بعد نقاش طويل و تحلال و بلا بلا.... رضى بابا اني نحقق حلمي قريت و درت بروف فرونسي وانا طبعا فووور في الفرونسي بصكو حياتي كامل في فرنسا هيهيهي.... انا ماشي من النوع اللي يشوف باباه مرفه يتكل عليه و يتلق صماطتو non انا نحب نتكل على روحي و نبني نفسي بنفسي ،صفقو بالعقل نحشم ههههه.
و اليوم هو اول يوم ليا في الليسي و اول يوم خدمة ليا bon الساعة الاولى كانت مع كلاصة 2 année جازت نورمال غير وحد البهلولة قاعدة تجياح عليا مع صبح ربي و مع اللي انا منارفي حاوزتها ههههه شرير انا
كي خلاصت الساعة خرجت لقيتها مع صحبتها عند الباب و ديك صحبتها   زينها وحدو بصح ماثرش فيا بزاف!!
مع العشية علابالكم حفلة تاع صاحب بابا بفففف وانا شحال نكره هاد النوع تاع الحفلات ،بصح بابا داني معاه بالسيف وبدا يعرفني على صحابو بففف ملل
حتى يتفتح الباب و نسمعو في التالون و تدخل وحد الكعبة تاع الزين بيييي (متدوش عليا نضرة سيئة بصح والله غير شابة هههه) دققت مليح في وجهها حتى
ااااه اوووه ايييه هي و الله غير هي صحبت رماس اللي تقرا عندي ،صافي باباها رجل اعمال ؟؟
كملنا الجولة المملة مع بابا حتى لحقنا لصحابو من الطفولة و شكون هما؟؟
بابات رماس و ...وش كان اسمها وي.... رزان جيت راح نخمس معاها حتى نشوفها رفدت يدها بالعقل و هبطت راسها اللي ولا حمممممر طمطومة مفهمتش اذا جاها الضحك و لا حمارت برك المهم و بما انو صحاب بابا فقعدنا معاهم حفلة كامل ، شحاال كانت شابة و عندها سحر خاص امممم هكداك و قلبي قعد بارد.
زعما هاد الطفلة تقدر تطيحني على راسي؟؟؟
هادا رح نكتاشفوه مع الايام.!!
.
.
.
.
.
رو-شفتي شحال كان شباب والمو الكوستوم
ري-بففففف صرعتيني من نهار شفتيه وانت كاليتلي راسي
رو-زعما يكون اون كوبل؟😯
ري-مشكيتش مكانت معاه حتى وحدة في الحفلة
رو-وبالاك محبتش تجي
ري-افففف وانا وين عمبالي ايا بون نوي
رو-بون نوي
"كانو يهدرو في skype"
وراحو كل وحدة ترقد.

تنفس صباح يوم جديد و احداث جديدة:
ناضت رزان الصباح و بكل نشاط على غير العادة هعههه دوشت و لبست و هبطت عند يماها :
-صباح الخير ماما
-اووو كاش حمار مات ،شكون يامن بلي رزان ناضت بكري بلا تشقلالة
-مامااااا.
-هههههه صباح النور ،اقعدي تفطري
فطرت و تلاقات مع رماس و راحو لليسي اليوم محبوش يوصلهم الشوفور ،دخلو لليسي و بدات القراية جاز يوم عادي غير انو رزان صارعة رماس بحمزة 😬 ههههه، جاز اسبوع نفس الروتين و اليوم رح تتبدل بزااااف حاجات.

الصباح ناضت رزان كالعادة وجدت روحها و خرجت اليوم تقرا حتى لل5.30 افففف مكانتش حابة تروح بصح لازم 😐.
-ريري و الله ماني حابة ندخل
-نقول لعمو سمير يقطعلك رجليك هههه
-رمااااس
-سمحيلي سمحيلي
-وقتاش تخرجي؟؟
-على ال5.30 وانت
-كيفكيف وش عندك الساعة الاخيرة؟؟
-ههههه عندي عند حبيب القلب
-ياو رماس تكحلي نقلعلك عينيك فهمتي!!😠
-راني نتمسخر امشي برك.

قرات رزان حتى لل4.30 مجاتش تاع تاريخ اف ديك النعمة و الفرحة  ،قعدت تلم في دوزانها بالعقل و خرجت قبل ماتلحق للدروج تفكرت كتابها اففففف مجاباتوش ،رجعت جابتو بكل تثاقل و سلوى قعدت في الكولوار كي خرجت هي من الكلاصة مشات سلوى و هبطت الدروج.
-سلوى يا سلوي اسناي دقي....
و فجأة و بدون سابق انذار قريب تخبطت مع حمزة في قدام الدروج، قعد بينهم 1 مليمتر هي من الشوك يبست في بلاصتها غمضت عينيها بقوة و وجها حماااار عاودت فتحت عينيها و قالت بكل تردد :
-p...p...   pardon
هو متحركش من بلاصتو مفهمناش علاش حتى شافتهم سلوى :
-احم احم رزان
هو كلي فاق على روحو بعد و هي هربت تجري ،وهو عاود دار يشوف فيها و يتبسم .

حمزة يهدر:
في الحقيقة ستحليت هديك اللحضة مقدرتش نقاوم قعدت واقف كي الحيط و هي قصيورة و مخلوعة باينة بلي تورترت ،امممم ريحتها مزالها في نيفي رهوجتني حتى اني مقدرتش نقري وليت نهدر و نتلعثم و بديت نهتم لامرها يعني نقدرو نقولو ولات تعجبني في هاد السمانة كامل وانا نخمم فيها.
ياااا ربي هاد الطفلة وش دارت فيا !!

رزان تهدر:
تشوووكيت نسيت روحي بلي راني في الجزائر هههه حسيت روحي نمثل فيلم هندي هههه بصح شحال عجبني قربو امممم و ريحتو و رجوليتو الطاغية واااو
وليت نمشي و نترعد حتى ماما حست بيا مش على قدي و حسيت وجهي رح يترتق بالسخانة .
يااااا ربي هاد الطفل وش دار فيا !!

*********************
وش رايكم في البارت تع اليوم؟؟
زعمة حمزة يولي يحب رزان؟؟

متنساوش التفاعل .حبكم😙