😍عشقت استاذي😍 👮‍♀️الشرطية و السجين🕵️‍♂️

بارت 9

حتى نشوف camion جاي يجري باتجاهنا ...و وسيم مقدرش يبعد عليه...
و boooooom دخل فينا الكاميون ...انا ماصرالي والو كنت من اللور ،مي ..مي وسيم ااااه 😯
هبطت نجري هكاك بلاغوب بلوش شفت منضر عمري مننساه ، malgré كنت زعفانة على وسيم و محبيتوش و مكنتش نحمل نشوفو mais كان في حالة لا يرثى لها...
و الدم يشرشر و تشوه كاااامل حتى انا مقدرتش نتعرف عليه ،انا متقستش و البلاء الكل جاء فيه ...
دنيت لعندو خرجتو بالسيف من الطونوبيل و هو يتفس بصعوبة...حطيتو في حجري و قاعدة نمسحلو الدم في وجهو و نبكي ...حتى حسيتو شدلي يدي و قالي:

وس-(بصعوبة) سمحيلي على واش درت لك و اتهلاي في روحك....

هج-وسيم متقولش هكا stp متموتش...

مكملتش هدرتي حتى تغمضو عينيه و ترخفت يدو...no impossible وسيم مماتش مراحش يخليني هو وعدني من قبل ...

هج-وسيييييييييييم...

جاو الناس يجرو بعدوه عليا و غطاوه و انا قريب هبلت بكيت ..بكيت ...بكيت malgré قاع واش دار فيا mais quand même .....
ناري على زهري الحبيب اللي مخطانيش حتى نهار عرسي 😭...
جات l'ambulance و انا كنت عيطت للفامي اللي جاو في رمشة عين لقاوني بلاغوب بلونش اه اقصد لاغوب غوج بدم وسيم
،كنت نبكي و الماكياج الكل ساح ،كنت كيف الغول ...
داو وسيم للسبيطار و انا رحت في الطونوبيل تاع والديا للسبيطار تاني...
اااااااه يا ربي راسي طرطرق من البكاء ...خبرونا بالصاعقة وي ...
وسيم مااااات ،وليت ارملة يوم عرسي ...شفتو زهري الحبيب شحال فيدال...
منيش حابة نوصف حالتي فداك الوقت غاضني بزااااف و غاضتني عمري تانيك ...
رجعت للدار و انا مش مامنة...بلعت لساني مقدرتش نهدر حتى البكا و مقدرتش نزيد نبكي و الكل قدامي قاعدين يبكو و يندبو ...
محملتش هاد الاجواء خرجت لل jardin قاعدة نشوف في القمر...
لاول مرة حسيت بمشاعر تجاه وسيم من نهار عرفتو ...ندمت على الكلام اللي كنت نقولو ...كل مرة كنت نجرحو فيها كان يهبط راسو و يسكت ،
حتى راح باش حسيت بقيمتو ...جات عندي مريم خافت كاش ماندير في روحي ...قعدت قدامي عنقتني و بدينا نبكو ...حتى سكتها:

مر-هاجر خلاص متبكيش متديريش هكا في روحك

هج-ضلمتو بزاف و جرحتو même pas مطلبتش السماح

مر-خويا عمرو مزعف عليك!

هج-عمري منسامح روحي..

مر-خلاص متبكيش (مسحتلي دموعي) هههه وليتي كي الباندا الكحل الكل ساح...

هج-متتمسخريش (خبطتها في كتفها)

مر-هيا امشي ترقدي بزاف عليك

داتني للشمبرة ،غسلت وجهي ،و رقدت في حجرها .

                        "تغيير جذري"

جازو يامات كحولا ،
و اخيرا قررت نخرج من هاد الحزن اللي راني فيه ،و نكمل حياتي ...
اول حاجة درتها هي اني رجعت لعائلتي و صحاباتي ،
وليت نضحك و نقسر كيما كنت ...
بدلت style لبستي ،
حتى اني قطعت شعري ..و قررت نكمل قرايتي ، donc سجلت في كلية الشرطة...
و الحمد لله قبلوني ،حبيت نكون شرطية باش نرجع حق كل وحدة تعرضت للاغتصاب كيفي و ندافع على المضلومين ،
في الاول عائلتي اعترضت ندخل سلك الشرطة ،مي كي شافوني مصرة خلاوني براحتي ...كنت مجتهدة و دائما الاولى ...
و بفضل الله تخرجت ،و بما انو انا كنت من الاوائل في الدفعة تاعي ،عطاوني بوست ....
اول حاجة درتها هي اني محبيتش نتسرع ...
لازم نسخن بلاصتي و نكسب الثقة تاع les chefs تاوعي
و هكداك درت ،كنت ممتازة في خدمتي و محبوبة من طرف زملائي و les chefs تاوعي ،
كامل علابالهم معايا مكاش تمسخير غير ال sérieux و عمرو واحد اشتكى مني بالعكس الكل يمدحوني و عمري لا خسرت شي قضية ...
كي تحسنت حالتي المادية شريت طونوبيل
،محبيت نتكل على حتى واحد ...و مام دارنا كانت شوية بعيدة على خدمتي صافي عطاتني الدولة دار 😋 وليت نسكن وحدي مرة على مرة عائلتي يجو عندي و انا في الweekend نروح نقعد عندهم ...و قعدت مريم هي صديقتي الوحيدة .

يتبع......

□□□□□□□□□□□□□□□□□
واش رايكم في البارت؟؟
توقعاتكم؟؟
متنساوش التفاعل .حبكم😙