😍عشقت استاذي😍 👮‍♀️الشرطية و السجين🕵️‍♂️

بارت 14

وصلنا للشومبر دخلت بالزربة و انا ناوية نقتلو اليوم هاد الطبيب حتى لقيت سلمى راقدة تما درت لهاداك الطبيب البهلول و قتلو:
هج-غدوة ترجعها وين كانت
طب-ما يكون غير خاطرك مدموزال

خرجت من السبيطار و ركبت في طونوبيلتي العزيزة مي تخمامي الكل عند رتاج خفت عليها غير هي اللي مونستني كي نكون وحدي....في الطريق تفكرت قيصر و تصرفاتو...علاش معطاش رشوة؟ علاش ما وكلش محامي؟ علاش مقبلش يتزوج بسلمى؟ malgré هي طفلة شابة و الف واحد يتمناها و كلشي فيها يتحب لالا غالط و يزيد يتشرط؟...واش اللي خلاه يرفضها؟ بقيت نغلي وحدي حاسة التقرعيج قريب قتلتني هههه و في الاخير قررت نسقسيه ،مي منستناش حتى الغدوة اذا ستنيت تلقاوني في الجبانة هههه ،بدلت الطريق و اتجهت للكوميساريا ،
كي لحقت هبطت للمكان اللي محجوز فيه قيصر ...
و في الدروج سمعت صوت لحمي شوك ،صوت ترتيل القران ...يزعزع القلب صوت تخشع معاه بالسيف عليك بقيت نتبع هاداك الصوت حتى لحقت للزنزانة اللي فيها قيصر هادا صوتو؟؟ طليت عليه لقيتو يرتل في القرآن و مقابل القبلة ...
كمل و رفد يديه للسماء
((يا الله لقد نامت عيون الخلائق و انا الساهر ، الضائق به الصدر...اشكي لك ضالما وقف في بوجهي عن الخير
رفعت كفي في جوف الليل خذ بحقي و بين برائتي فانا بما اصبت شاكر و لكن اريد حقي ممن ضلمني يا رب الخلائق ))
انا هنا زاد التأثر تاعي بيه كيفاش راجل كيما هادا يغتصب؟ مستحيل!
وقف لم سجادتو..دار لقاني موراه هبط راسو و قالي:
قي-مرحبا بيك مدموزال
هج-علاش مدرتش محامي يجيب برائتك
قي-برائتي انت راح تجيبيها
هج-مفهمتش؟
قي-انت مهمتك تحكمي المجرم و تحطيه في الحبس ،و انا مش مجرم يعني مهمتك مزال مخلاصتش مزال لازمك تبحثي في الموضوع باش تحققي العدالة...دركا تصبحي على خير
هج-ت ..تصبح على خير

رجعت للدار كانت ال3 تاع صباح اااه واش راح ينوضني غدوة!

نضت الصباح راسي يوجع فيا ...بصكو مرقدتش بكري البارح فطرت و رحت للكوميساريا
انا قاعدة و يجي في بالي قيصر ...رحت لعندو juste طليت عليه محبيتش نحلبو 😁
لقيتو يسيي يدير دوا لجروح ضهرو و مالحقش بقيت نخزر فيه حتى ضحكني ...و رجعت للبيغو تاعي نكمل خدمتي..
لحقت ال12 عيطتلي خالتي كوثر قاتلي اللي مريم فطنت فرحت بزاف و حبيت نروح عندها مي واش ندير الخدمة على راسي اليوم ...
كملت خدمتي و لحق الوقت اللي نخرج فيه ...خرجت رحت لل supérette شريت بزاف انواع الشوكولا و القاتو اللي تحبهم مريم نعرفها تعشق الشوكولا هههه و عمرتلها بهم باطة و رحت لعندها ...
غير دخلت ترمات عليا تعنق فيا تقول انا اللي درت l'accident ماشي هي هههه

مريم-اععع وين كنتي توحشتك
هج-كنت في الكوما هاداوين فطنت هههه
ياسين-بعيد الشر عليك متهدريش هكا
مر-سكتنا سي رومنسي
هج-اييه كيفاش راكي؟
مر-الحمد لله مليحة

قعدنا نقسرو و نضحكو حتى خلاصت مدة الزيارة ....جزت عند سلمى ياك قلت لكم لاشوبر تاعها قدام تاع مريم سواسوا ...
لقيتها مزالها في حالتها تاع البارح سقسيت الطبيب تاعها:
هج-دكتور كيفاش راهي سلمى؟
طب-حاليا حالتها مستقرة مي مزالها في غيبوبة
هج-و الجنين؟
طب-راه مليح ...خص غير تفيق سلمى برك.
هج-اوكي ربي يجيب الشفاء...

رجعت للدار كنت عيانة ،خملت شوية برك و درت حاجة خفيفة تعشيت و غسلت الماعن و رحت نتفرج...
على ال11 عيطتلي مريم خلعت جاوبت بالزربة:

هج-واش مريم لاباس؟
مر-ما لاباس ما والو راه وحد الديقوتاج رح نطرطق
هج-العبي في التلفون ...اتفرجي!
مر-طلعتلي القنطة للراس
هج-نجي عندك؟
مر-اذا حبيتي علاش لالا؟
هج-يا حيي على اذا حبيتي رانا خواتات
مر-اوكي مرسي

بدلت حوايجي بالزربة و خرجت ....
مع اللي لحقت عند الشومبر تاع ميمي تعكلت بالخيوط تاع ال Converse هبطت نربطهم ،حتى نسمع هدرة في شمبرة تاع سلمى... قلبي تخطف قلت هادا sûr قيصر بعث كاش واحد يقتلها ...قربت من الباب بالشوية باش اللي يكون الداخل ميفيقش بيا و يهرب...المهم دنيت للباب و نتصدم من اللي شفت ...لا من اللي سمعت تاني... اواه c'est impossible راني غير نتخيل 😱😱😱

يتبع....

♤♤♤♤♤♤♤♤♤♤♤
واش رايكم في البارت؟؟
واش شافت هاجر؟؟
متنساوش التفاعل .حبكم