Unicode
အပျိုပေါက်လေး ဖြစ်လာ၍လား မပြောတတ်။ စိမ်းတစ်ယောက် တစ်ခုခု ထူးဆန်းလာသည်ဟု ကြွေ ထင်နေမိသည်။ ထိုတစ်ခုခုဟာ ဘာလဲတော့ မပြောတတ် ။
"ငါတို့နွေရာသီကျောင်းပိတ်ရက်ကျရင်
ရှမ်းပြည်ဘက်အလည်သွားကြမလား
အဲ့ဒီမှာ စွယ်တော်ရွက်လှလှလေးတွေ ရှိတယ်တဲ့ "ကြည့်ပါလား ။ စိမ်း အဲ့ဒါတွေ ဘယ်က သိလာသလဲ။ ကြွေနှင့် မဆုံခင်အချိန်က ရှမ်းပြည်ကိုများ ခရီးထွက်ခဲ့ဖူးပြီး အဲ့ဒီမှာများ ငယ်ရည်းစားတွေ ကျန်နေခဲ့သလားဟုလည်း တွေးမိပြန်သည်။
"ငါတော့ လိုက်လို့ မရဘူး
ငါ့အိမ်က ဆယ်တန်းအတွက် ဂိုက် ခေါ်ထားပြီးနေပြီ"ဝေ က ထိုကဲ့သို့ ငြင်းလိုက်တာမို့ ကြွေလည်း ငြင်းဖို့ ဆင်ခြေလေးတစ်ခုက ခေါင်းထဲ လက်ခနဲ ဝင်ရောက်လာသည် ။
"စိမ်းကလည်း .. ဆယ်တန်းက ငါတို့အတွက်
အရေးအကြီးဆုံး အချိန်လေးပဲလေဟာ .. နော် .. နော် "စိမ်း၏ ရောဂါမှာ တော်တော်လေး ရင့်နေပုံရသည် ။ မလိုက်မဖက် မျက်စောင်းတွေ ပိတ်ထိုးနေပြီး နှုတ်ခမ်းလေးကပါ စူထားသေး၏။ အတွေးများနေသည့်ကြားကပင် ကြွေ့မယ် ပြုံးမိရသေးသည်။
"စိတ်မကောက်ပါနဲ့ စိမ်းရာ ဆယ်တန်းစာမေးပွဲပြီးရင် ငါတို့သုံးယောက်အတူတူသွားကြမယ်ဟာနော်"
ဝေက ထိုကဲ့သို့ ဝင်ချော့တော့ ကြွေ့ကိုပါ ကြည့်လာပြန်တာမို့ ကြွေလည်း ခေါင်းတစ်ချက် ငြိမ့်ပြပြီး သက်သေပြလိုက်မှ စိမ်းက ပြုံးလာပြန်သည်။ စိမ်း ပြုံးလိုက်သည့်အခါ မေးရိုးသွယ်သွယ်လေးက အနည်းငယ် ပြန့်ကားသွားပုံက ကြည့်ကောင်းလွန်း၏ ။
"တကယ် ကတိနော် "
ကတိတွေ အထပ်ထပ် တောင်းပြီးနောက်မှာတောင် စိမ်းက သိပ်ယုံကြည်ချင်ပုံမရ ။
သူ သွားချင်သောနေရာသို့ မသွားရ၍လား မပြောတတ် ၊ ထိုနှစ် နွေရာသီ ကျောင်းပိတ်ရက်များမှာ စိမ်းတစ်ယောက်တည်း တော်တော်လေး ငြီးငွေ့နေပုံရလေသည် ။ ကြွေ စာလုပ်နေသည့်အနား မယောင်မလည် ရောက်လာတတ်သော်လည်း စာအတူလုပ်ဖို့တော့ ခေါ်၍မရ။ ကြွေ မြင်လိုက်တိုင်း စိမ်း၏ မျက်ဝန်းများမှာ တစ်ဝက်ပိတ်ကျလုမတတ် ။
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။