Unicode
ကျောင်းပိတ်သွားပြီ ဖြစ်သောကြောင့်သာ တော်သေးသည်ဟု ဆိုရမည်။ မဟုတ်ပါက ကြွေ့ကို ဘယ်လိုများ မျက်နှာချင်းဆိုင်ရပါမည်တဲ့လဲ။ မဟုတ်သေးပါဘူး အဲ့ဒါထက် မိကြွေကို သတိရစိတ်က လွန်ကဲနေပြန်တာပဲ မဟုတ်လား။
စိတ်ရှုပ်လွန်းသဖြင့် ထမင်းစားချိန်မှလွဲ၍ အပြင်မထွက်ဘဲ အခန်းအောင်းနေဖြစ်သည်။ ဖေဖေ နှင့် မေမေ က နေမကောင်းဖြစ်နေသလားဟု စိတ်ပူနေခဲ့သေးသော်လည်း အဆင်ပြေနေပုံလည်း ရသဖြင့် အရွယ်ရောက်လာသော မိန်းကလေးတစ်ယောက်၏ ကိုယ်ပိုင်နေရာလေးကို လေးစားပေးကာ ဘာမှ ထပ်မမေးကြတော့ ။
"သမီးရေ .. ဒီမှာ
သမီးသူငယ်ချင်းတွေရောက်နေတယ်"
သူငယ်ချင်းတွေ။ ရင်ထဲ ထိတ်ခနဲ ဖြစ်သွားသည်။ စိမ်းနှင့် ကြွေကလွဲလို့ ဝေ့မှာ ဘယ်က သူငယ်ချင်းများ ရှိနေသေးလို့လဲ ။ ထူးထူးဆန်းဆန်း ထိုညီအစ်မနှစ်ယောက်ဟာ ဝေ့အိမ်ကို ဘယ်တုန်းကများ ရောက်လာဖူးလို့လဲ ။ မေးခွန်းများကို အသာထား ၊ အခု ကြွေနှင့် တွေ့ရတော့မည် ။ ဘာလုပ်ရမလဲ ။ ဝေ ဘာကို အရင်လုပ်ရမည်လဲ ။
"သမီးရေ "
"လာပြီ ..ဖေဖေရေ .. "
လာပြီဟု အော်လိုက်ပေမယ့် မနက်စာစားပြီးကတည်းက အခန်းအောင်းနေတာမို့ မျက်နှာက ပြောင်ရှင်းလွန်းနေသည် ။ မှန်တင်ခုံပေါ်က မိတ်ကပ်အမှုန့်လေးကို မျက်နှာပေါ် မသိမသာ ပွတ်လိုက်ရင်း ၊ ရှုပ်ပွနေသည့် ဆံပင်ကို ဘီးလေးနှင့် သပ်သပ်ရပ်ရပ် ဖြစ်သွားအောင် တစ်ချက်နှစ်ချက်ဖြီးပြီးမှ အခန်းထဲက ထွက်ဖို့ပြင်ရလေသည်။ အခန်းဝရောက်နေကာမှ ရေမွှေးကပြေးဆွတ်ရသေးသည်။ ပျာယာခပ်နေပုံဟာ ရည်းစားက .အိမ်အလည်လာသည့်အတိုင်းဟု တွေးမိတော့ ပြုံးစိစိဖြစ်သွားသည် ။ မိကြွေသာ ဝေ့ရည်းစားသာဆို ဘယ်လိုနေမလဲ ။
"ဟဲ့ .. နင်ကလည်း .. ကြာလိုက်တာဟာ "
ဧည့်ခန်းထဲရောက်သွားတော့ ထင်သည့်အတိုင်း စိမ်းနှင့် ကြွေကို တွေ့ရသည်။ စိမ်းက ဖေဖေနှင့် စကားလက်ဆုံကျလျှက်ရှိသော်လည်း ကြွေကတော့ စောင့်ရတာကြာ၍ စိတ်မရှည်ကြောင်း ပြောလာသည် ။ စူပုတ်ပုတ်ကြွေဟာ ချစ်စရာကောင်းလိုက်လေခြင်း။
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။
