Unicode
စိမ်း မျက်နှာပေါ်က တောင်းပန်တိုးလျှိုးဟန် အမူအယာများကို ခံစားနိုင်၍ ဖြစ်မည် ။ ကြွေ့နှုတ်ခမ်း လှုပ်လှုပ်ရွရွလေးဟာ ရပ်တန့်သွားသည် ။ ထို့နောက် ကြံစည်ထားပုံမရသော အခြား စကားများကိုသာ လေပြည်လေးတိုက်သလို ပြောလာသည်။
"စိမ်းရယ် တကယ်တော့လေ ငါ့ဘဝမှာ နင့်ကိုတွေ့ခွင့်ရခဲ့ပြီး နင့်အချစ်ကို ပိုင်ဆိုင်ခွင့်ရခဲ့တာနဲ့တင်ကို ငါ နဲ့ မထိုက်တန်ဘူးလို့တောင် တွေးမိတဲ့အထိ အရမ်း ကံကောင်းလွန်းနေခဲ့ပါပြီ ။
ထပ်ပြီးတော့ နင့်ကို ပိုင်ဆိုင်ဖို့ ငါလောဘကြီးလာမိရင်း နင်နဲ့ ဖေဖေတို့ကြားမှာ ငါ့ကြောင့် .. "ကြွေက ရှိုက်သံတစ်ချက်ထွက်လာကာ စကားသံများကတော့ ထပ်ပြီး ထွက်မလာနိုင်တော့။ ကြွေ့ မျက်ရည်စသေးသေးလေးတောင် မမြင်နိုင်သူ စိမ်းအဖို့ ကြွေ့ ရှိုက်သံဟာ နှလုံးသားကို ဆုတ်ဖြဲနေသလို ခံစားချက်မျိုး ဖြစ်သော်လည်း လစ်လျူရှူထားလိူက်ရသည်။ ဒီထက် ပိုဆိုးသော နာကျင်မှုတွေ ဖြစ်မလာဖို့ရာအတွက် အားနည်းနေခြင်းကို ဖုံးဖိထားကာ မျက်ရည်များဖြင့် ပြည့်လျှံနေသော ကြွေ့မျက်ဝန်းများကိုပင် တန်ပြန် စိုက်ကြည့်လိုက်ရသည်။
"ကြွေ ငါ့ကိုကြည့် "
ကြွေက မရဲတရဲ မော့ကြည့်လာသည်။
"နင် ငါ့ကို တစ်သက်လုံး မတွေ့ရတော့ဘူးလို့
တွေးကြည့်ပါလား နင် နေနိုင်မယ်ထင်လို့လား "ကြွေ့ မျက်ဝန်းများ ပြူးကျယ်ဝိုင်းစက်သွားသည်။ ကြွေဟာ စိမ်းအားနည်းချက်ကို သိသလို ကြွေ့အားနည်းချက်ကိုလည်း စိမ်း မသိဘဲ ရှိပါ့မလား။ ကြွေက ပြာပြာသလဲပင် ငြင်းဆန်လာသည်။
"အို .. ဘာလို့ မတွေ့ရမှာလဲ စိမ်းရဲ့
ငါတို့က အစကတည်းက ညီအစ်မတွေပဲ မဟုတ်လား ၊ ဘယ်လိုပဲဖြစ်ဖြစ် ညီအစ်မတွေပဲမို့ ဆက်တွေ့လို့ရနေတာပဲ "ကြွေ့ကို မယုံကြည်နိုင်စွာ ငေးကြည့်မိသွားသည်။ကြွေ တကယ်ပဲ ရူးသွားပြီလားဟု တွေးမိတာလည်း ပါမည်။ ကြွေကတော့ ထိုစကားကိုပင် အတည်ကြီး ပြောနေမှန်း သိရသောအခါ စိတ်တိုလာ၏။
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။