Unicode
အဖြစ်အပျက်များအားလုံးဟာ ရုပ်ရှင်တွေထဲကလို အဆင်ပြေပြေပြီးဆုံးသွားသည်ဟူ၍တော့ ဘယ်သောအခါမှ ရှိမည် မဟုတ်ပေ။
ကြွေတို့ကို အန္တရာယ်ပြုခဲ့သော ကောင်လေးဟာ ဒဏ်ငွေပေးဆောင်ခြင်းဖြင့်သာ အပြစ်ခံယူရပြီး လူတွေမေ့ပျောက်သွားသည်အထိ နိုင်ငံခြားထွက်သွားခြင်းဖြင့် သူ့အပြစ်များ မရှိတော့ဟု ထင်နေလေမည်လားမသိ ။ သို့သော် ထိုအတိုင်းသာ ဖြစ်ပျက်သွားခဲ့ပြီး အချိန်အနည်းငယ် ကြာလာသောအခါ ထိုကိစ္စသည် ဖြစ်ပျက်မသွားသကဲ့သို့ပင် မှေးမှိန် ပျောက်ကွယ်သွားတော့၏ ။
အချိန်အနည်းငယ် ကြာပြီးနောက် ကြွေ တို့လည်း Posting ဝင်ဖို့ ပြင်ဆင်ရသည်။ ထိုအခါ စိမ်းကတော့ ပြောပါသည်။
"ကြွေက ဆရာဝန်မကြီး ဖြစ်လာလို့တော်သေးတယ် မဟုတ်ရင် ငါက အလုပ်မရှိတာနဲ့
ဘာနဲ့များ စားသောက်ကြမလဲ နော် .. "
ထိုကဲ့သို့ စနောက်တတ်သည့် စိမ်း၏ စာအုပ်တစ်အုပ်မှ ရနိုင်သည့် ဝင်ငွေဟာ ကြွေတို့လို အစိုးရဆရာဝန်တစ်ယောက်၏ လစာနှင့်တော့ နှိုင်းယှဥ်၍ပင်မရ ။ စိမ်းသည် ထိုမျှလောက်ပင် အောင်မြင်နေခဲ့ပြီး ဖြစ်၏။
"စိမ်း ငါ Posting ဝင်ဖို့
ဘယ်ကို ဦးစားပေးတင်ရင်ကောင်းမလဲ "
စာရေးနေသည့် စိမ်း ကို လှမ်းမေးလိုက်တော့
စိမ်းက သူ့ရေးလက်စလေးကို ရပ်တန့်လိုက်သည်။ ထိုကဲ့သို့ အချိန်မျိုးမှာ စိမ်းက ချစ်စရာအကောင်းဆုံးဖြစ်သည်။ ကြွေ့ကို ဘယ်တော့မှ အထီးမကျန်စေရဟူသော သူ့ကတိလေးကို တည်ဖို့ စာရေးခြင်းဟာလည်း အဟန့်အတား မဖြစ်စေခဲ့ပါ ။ ကြွေ့လောက်တော့ ဘယ်အရာမှ အရေးမကြီးဘူးဟူ၍ ပြန်ပြောနေကျ ဖြစ်သည်။ စိမ်း၏ ထိုစကားကိုသာ သူ့စာဖတ်ပရိတ်သတ်များ ကြားလျှင်ဖြင့် ကြွေတော့ ကောင်းကောင်းကြီး မေတ္တာပို့ခံရတော့မည်။ အခုလည်း စိမ်းက သူ၏ စျာန်ဝင်နေခြင်းအစား ကြွေ့စကားကို အလေးအနက်ထားစဥ်းစားနေကာ နောက်ဆုံးတော့ အဖြေတစ်ခု ရလာဟန်ရှိသည်။
"ဘယ်နေရာကိုပဲဖြစ်ဖြစ်ပါ
ငါက နင်သွားတဲ့နောက်ကို လိုက်ခဲ့မှာ "
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။
