Unicode
ဝေသည် စာကြည့်စားပွဲပေါ်ထောင်ထားဆဲ ဖြစ်သော ဓာတ်ပုံလေးကို ကြည့်ကာ သက်ပြင်းချလိုက်မိသလား ။သို့မဟုတ် အသက်ရှူခြင်းကို ခဏ ရပ်လိုက်မိသလား မသိတော့ပေ ။ ထိုပုံက ကျောင်းအားကစားနေ့မှာ အမှတ်တရ ရိုက်ထားသော ပုံဖြစ်သည်။ပုံထဲတွင် သူတို့ သုံးယောက်လုံး ပြုံးရယ်နေကြသည်။ အထူးသဖြင့် ကြွေသည် ဝေ နှင့် စိမ်းကြားတွင် ရပ်ပြီး စိမ်းပုခုံးဘက် ခေါင်းလေးမှီကာ အားပါးတရ ပြုံးရယ်နေခဲ့ပုံက ဘယ်အချိန်ကြည့်ကြည့် ထူးခြားပြီး လှရက်လွန်းသည်ဟု ထိုစာကြည့်စားပွဲတွင် ထိုင်လိုက်တိုင်း ငေးမောမိခဲ့ရသည်။ ထိုဓာတ်ပုံလေးက အစပြုသည်ဟူ၍လည်း မဟုတ်ပါလေ။
ကြွေက ပြုံးရယ်မနေလျှင်တောင် သိပ်လှလွန်းသည်ကို ဝေ ထိုကျောင်းကို ပြောင်းလာသည့် နေ့ကတည်းကပင် သတိထားမိခဲ့သည်ပဲ။
ထို့နေ့က ကျောင်းပြောင်းလာသည့် ဝေ့ကို ရုပ်ရှင်တွေထဲကလို ဆရာ ၊ ဆရာမတွေက အတန်းထဲ မိတ်ဆက်မပေးခဲ့ပါ ။ ဝေသည် အတန်းမတက်ခင်မှာပင် အခန်းထဲ ကြိုရောက်နေခဲ့ပြီး ဖြစ်သည်။ အတော်လေး စောနေသေးသည့်အချိန်မို့ အတန်းထဲတွင် မိန်းကလေးတစ်ယောက်သာ ရှိနေခဲ့သည်။ ထိုမိန်းကလေး မမြင်ခင်က ဝေသာလျှင် ကိုယ့်ကိုယ်ကိုယ် အလှဆုံးဟု အထင်မှားခဲ့ဖူး၏ ။ အရာအားလုံးထက် ပိုလှသော မိန်းကလေးတစ်ယောက်ကို မြင်ရလျှင် မနာလိုဖြစ်ရလိမ့်မည်ဟု ထင်ခဲ့ဖူးသော်လည်း မဟုတ်ပြန် ။
ထိုမိန်းကလေးသည် ဆံပင်အရှည်ကြီးကို အမြင့်မှာ ဖွဖွလေး စည်းထားပြီး နဖူးပြင်ထက်မှာ အနည်းငယ် ဝဲကျလျှက်ရှိသော ဆံစတို့က ပြတင်းပေါက်မှ နေရာင်ခြည်နှင့် ထိတွေ့သောအခါ ရွှေရောင်လေးသဖွယ် လင်းလဲ့နေသည် ။ ဝေသည် ထိုဆံစလေးများကို ဖယ်ပစ်ပြီး ထိုမိန်းကလေး၏ မျက်နှာလေးကို အပြည့်အဝ မြင်လိုက်ရဖို့ စိတ်လှုပ်ရှားခဲ့မိလောက်အောင် ထိုမိန်းကလေးသည် ကဗျာဆန်ဆန် လှရက်လွန်းတာမို့ ငေးမောရင်းဖြင့်ပင် လွန်ကြူးသော အတွေးတချို့ ဝင်ရောက်လာခဲ့သည်။
"အာ .. ငါ ဘာကို တွေးလိုက်မိပါလိမ့်"
ပူခနဲ ဖြစ်သွားသော မျက်နှာလေးကြောင့် ကိုယ့်ဘာသာ စိတ်ကို ပြန်စုစည်းလိုက်ပြီး ဝေ့ အကြည့်တွေကို ထိုမိန်းကလေးဆီက လွှဲဖယ်ပစ်လိုက်ဖို့ ဆုံးဖြတ်ခဲ့ပေမယ့် ကံကြမ္မာပဲ ဖြစ်မည်။
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။