Unicode
"ကြွေ .. ဒီနေ့ဆေးခန်းလာဖို့ ချိန်းထားတယ်ဆို
ငါ .. လိုက်ခဲ့ဖို့လိုလား "
ကြွေက တစ်ပတ်တစ်ခါ ဒေါက်တာမခ နှင့် ဆွေးနွေးကုသမှု ခံယူနေပြီး အစပိုင်း မှာတော့ ကြောက်နေတတ်သေးသဖြင့် ဝေ့ကို အဖော်အနေဖြင့် ခေါ်သွားတတ်ပေမဲ့ အကြောက်တရားကို ကိုယ်တိုင်ကျော်လွှားနိုင်ဖို့လိုသည်ဟူသော ဒေါက်တာ့စကားကို အတိအကျလိုက်နာဖို့အတွက် နောက်ပိုင်းမှာ တစ်ယောက်တည်း သွားဖြစ်သည်က များလေသည်။
ကြွေက အဆင်ပြေပါသည်ဟု ဆိုသော်လည်း ဝေကတော့ စိတ်မချနိုင်သဖြင့် မကြာခဏ အနောက်ကလိုက်ချောင်းတတ်ရာ တစ်ရက်မှာ ကြွေက မိသွားသဖြင့် ဆူခဲ့ဖူး၏။
"ဝေ ..
နင်ကတော့ ငါလုပ်နိုင်တယ်ဆိုတာ ယုံကြည်ပေးသင့်တယ် ။ အမှန်အတိုင်းပြောရရင် ငါ ကုသမှုခံယူနိုင်တယ်ဆိုတာကလည်း ငါ့မှာ နင်ရှိနေလို့သာ သတ္တိတွေလည်းရှိပြီး ၊ နင်က ယုံကြည်ပေးနေလို့သာ အခြေအနေတွေလည်း တိုးတက်လာတာ အမြင်ပဲ မဟုတ်လား ၊ "
ကြွေ့ကို စိတ်မချခြင်းဟာ မယုံကြည်ခြင်းနှင့်မှ မဆိုင်ဘဲ။ ဒီအတိုင်း လှရက်လွန်းသည့် ကြွေ့ကို စိတ်မချခြင်းသက်သက်ဖြင့် ကြွေ တစ်ယောက်တည်း အပြင်သို့သွားခါနီးတိုင်း လိုအပ်ရဲ့လားဟု မေးနေမိခြင်း ဖြစ်သည်။ ဝေ့မျက်နှာက စိုးရိမ်မှုလေးကို တစ်စွန်းတစလောက်များ သိသာနေခဲ့သလား မပြောတတ်ပါ။
"ဝေ နင်ဟာလေ
မသိရင် ငါ့ ရည်းစားကျနေတာပဲ "
ကြွေက ချစ်စရာ အပြုံးလေးဖြင့် ဝေ့နားဆွဲလေးကို လက်ညိုးလေးဖြင့် တောက်လျှက် ဆိုလျှင် ထိုနားဆွဲလေး လှုပ်ခတ်သွားသည့် စည်းချက်နှင့် အညီ ရင်ခုန်သံတွေဟာ မူမမှန်ချင်တော့ ။
"ကြွေ မြန်မြန်သွားတော့လေ
ချိန်းထားတဲ့ အချိန် နောက်ကျနေမှဖြင့် "
အမြန်နှင်လွှတ်မှ ဖြစ်မည်။ သည်အနေအထားအတိုင်း ကြာလျှင် ထိုအပြုံး ၊ထိုအကြည့်တွေအောက်မှာ ချစ်ခြင်းကို ဝန်ခံမိတော့မည်။
"သွားပြီနော်"
"အင်း .. ကြွေ ..
လမ်းမှာကောင်လေးတွေက စနောက်ရင်လည်း
ကြောက်မနေဘဲ မကြားသလိုနေလိုက်နော် .. လိုအပ်ရင် ငါ့ကိုဖုန်းခေါ်လိုက် "
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။
