unicodeဘေးနားက ခန္ဓာကိုယ်လေး ငြိမ်သက်သွားပြီး အသက်ရှူသံမှန်မှန်လေး ထွက်ပေါ်လာမှ စိမ်းတစ်ယောက် စောင်ပုံထဲက ထွက်လာရသည်။ ချွေးများဆို ချွဲနစ်လို့ ။ ကြွေ့ကို ဘေးနားမှာထားပြီး ဘယ်လိုများ အိပ်ပျော်နိုင်ပါ့မလဲ ။
စာကြည့်စားပွဲမှ နာရီလက်တံအရှည်လေးက မနက် တစ်နာရီကို ညွှန်ပြနေသော်လည်း စိမ်း၏ မျက်လုံးများက ကြောင်တောင်တောင် ရှိနေဆဲပင် ဖြစ်သည် ။ရင်တွေလည်း တုန်နေဆဲပင် ဖြစ်ပြီး အရင်နေ့က သောက်ထားသော ကော်ဖီတစ်ခွက်ကြောင့်လားဟုလည်း မဆီမဆိုင် တွေးမိပြန်သည် ။
ကြွေ့ ကိုကြည့်လိုက်တော့ နှစ်နှစ်ခြိုက်ခြိုက်အိပ်ပျော်သွားပြီ ဖြစ်၏။ ကြွေဟာ ဒီလိုကျတော့ အပူအပင်မရှိလှသော ကလေးတစ်ယောက်နှင့် တူသည်။ မကြာသေးခင်ကအထိ စိမ်းကို ရူးသွပ်စေမတတ် ပြုစားခဲ့သော ကဝေမလေးနှင့်လည်း မတူတော့ ။ ပြတင်းပေါက်မှ ဝင်လာသော လ၏ အလင်းရောင်အောက်မှာပင် ကြွေ့မျက်နှာလေးဟာ ကြည်လင်၍နေသည်။
ကြွေ့မျက်ခုံးလေး တွန့်ချိုးသွားသည်။ နဖူးကနေ ကျနေတဲ့ ဆံစတွေကြောင့် နေရခက်နေသလားဟု တွေးမိကာ ထိုဆံစများကို ခပ်ဖွဖွ ဖယ်ရှားလိုက်တော့ ကြွေ့ နဖူးပြင်ပြေပြေလေးဟာ လွန်ခဲ့သော နာရီဝက်မှ အတိတ်သို့ ပြန်လည် ခေါ်ဆောင်သွားပြီး ထိုစဥ်က သနပ်ခါးနံ့လေးကိုပင် ပြန်လည် ရှူရှိုက်မိသကဲ့သို့ ရှိသည် ။
မနမ်းရှိုက်လိုက်ရသော နှုတ်ခမ်းဖူးဖူးလေးတွေဆီ အကြည့်ရောက်သွားချိန်မှာတော့ ချိုမြိန်ရဲ့လား ၊နူးညံ့ရဲ့လား ဆိုတာ စမ်းသပ်ပြီး အတည်ပြုချင်မိပြန်သည်။
ကြွေ မမြင်တာသိသော်လည်း ကိုယ့်အတွေးကိုယ် မလုံမလဲဖြစ်ကာ မျက်နှာလွှဲလိုက်ရပြန်သည်။ တစ်သက်လုံး ညီအစ်မအရင်းတွေလို နေလာခဲ့ကြပြီးမှ မထင်မှတ်ထားဘဲ ဖြစ်ပေါ်လာသည့် မရိုးမသားစိတ်ကြီးကို ဘယ်လိုများ ထိန်းချုပ်ရပါ့မလဲ ။ ပြီးတော့ စိမ်းက မိန်းကလေး ။ ကြွေကလည်း မိန်းကလေးတစ်ယောက်ပင် ဖြစ်နေသည်။ စိမ်း၏ စိတ်ကလေးကို ကြွေသိသွားပါလျှင်ရော ဘယ်လိုများ ရင်ဆိုင်ရမည်တဲ့လဲ ။ကြွေကတော့ သိလျှင်လည်း သိနေလောက်တော့မည်။ ပတ်ဝန်းကျင်က သိသွားခဲ့ပါလျှင်ရော သူတို့ ညီအစ်မနှစ်ယောက်ကို ဘယ်လိုများ ပြောကြမည်လဲ ။ ကြွေ့ထံ၌ စိတ်ဒဏ်ရာအသစ်လေး ထပ်မဖြစ်စေလိုတော့။
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။