Unicode
မိကြွေ၏ လူဆိုးမကြီးဖြစ်သော စိမ်းအတွက်လည်း ထိုရက်တွေမှာ သိပ်အဆင်ပြေလှသည်တော့မဟုတ် ။ တစ်ခါတရံ စာကြည့်ချိန် ၊ စာရေးချိန်များကိုပါ နယ်ကျော်၍ မကြာခဏ ဝင်ရောက်လာတတ်သော အတွေးများတွင် မိကြွေသည်သာ နေယူထားတတ်သည်။
ကြွေ အဆင်ပြေနေရဲ့လား ။
ကြွေဟာ အရင်လို ကြောက်တတ်နေဆဲပဲလား ။ သို့မဟုတ် တစ်ယောက်တည်း ရှင်သန်နေနိုင်ခဲ့ပြီလား ။ ထိုကဲ့သို့ မေးခွန်းများလည်း ရှိပြီး ဝေခွဲမရသော စိတ်လေးများလည်း ရှိနေပြန်သည်။ကြွေဟာ သူ့ဘဝသူ ရှာတွေ့ပြီး စိမ်းကို မှီတွယ်စရာမလိုသည့် လွတ်လပ်သော ရွက်ကြွေလေးလည်း ဖြစ်စေချင်သည်။ အမှီအခိုကင်းသွားသော ကြွေဟာ စိမ်းဆီ ပြန်လာဖို့ မေ့လျော့သွားသည်အထိ အဲ့ဒီဘဝလေးမှာ ပျော်ပိုက်သွားခဲ့လျှင်တော့ရော။ ဘာတတ်နိုင်ပါမည်တဲ့လဲ ။ သို့သော် ထိုအတွေးသည် ထုထည်ကြီးမားစွာ လေးပင်လျှက် ရှိနေတတ်သည်။
ကြွေ့ ကို ဖုန်းဆက်ကြည့်သင့်သလား ။
ဖုန်းဆက်လိုက်သည့်အခါ ကြွေက ငိုနေခဲ့လျှင် ပြန်မခေါ်မိဖို့ ကိုယ့်ကိုယ်ကိုယ် တာဝန်ယူနိုင်ပါရဲ့လား ။ သို့သော် ကြွေ့ဆီက "ဟယ်လို" ဟူသော အသံတိုးတိုးလေးပဲ ဖြစ်ဖြစ်လည်း အလွမ်းပြေ ကြားချင်နေမိသေးသည်။ ကြွေနှင့်ပတ်သက်ပြီး ဒီလောက် ရှုပ်ထွေးရလိမ့်မည်ဟုလည်း တစ်ခါမှ ထင်မထားခဲ့။စိမ်းသည် ဖုန်းကြည့်ရင်း လမ်းလျှောက်တတ်သူတစ်ယောက် ဖြစ်လာသည်။ ကျောင်းဝင်းထဲပင် ဖြစ်သည်မို့ အန္တရာယ်ကင်းသည်ဟု ထင်မှတ်မိသောကြောင့်လည်း ဖြစ်မည်။ ဖုန်းမျက်နှာပြင်ပေါ်က 'ကြွေ' ဟူသော အမည်လေးကို လက်ညိုးထိပ်လေးဖြင့် နှိပ်မည်ဟန်ပြုလိုက် ၊ ပြန်ရုတ်သိမ်းလိုက်ဖြင့် အလုပ်ရှုပ်နေခြင်းဟာ လူတစ်ယောက်၏ ပုခုံးစွန်းနှင့် ဝင်တိုက်မိမှ အသိဝင်လာရသည်။
"အိုးး .. တောင်းပန်ပါတယ်"
"တောင်းပန်ပါတယ်ဗျာ"နှစ်ယောက်လုံးဆီက တောင်းပန်စကားတစ်ခွန်းဟာ တူညီစွာ ထွက်လာတော့ မျက်နှာကိုလည်း ပြိုင်တူမော့ကြည့်မိကြသည်။ ကြည်လင်သော စကားသံလေးနှင့် လိုက်ဖက်စွာ ကြည့်ကောင်းသော အမျိုးသားတစ်ဦးသည် စိမ်းရှေ့၌ ရပ်နေသည်။ စိမ်းတို့ထက် အနည်းငယ် အသက်ကြီးပုံရပြီး ကြည်လင်နေသော မျက်နှာသွင်ပြင်နှင့် လိုက်ဖက်စွာ ကော်လံပါသည့် ရှပ်အင်္ကျီလက်ရှည်နှင့် ကချင်ပုဆိုးကို လိုက်ဖက်စွာ ဝတ်ဆင်ထား၏ ။ လူတစ်ယောက်ကို ပထမဆုံးအကြိမ် သေသေချာချာ ကြည့်မိခြင်း ဖြစ်ပြီး ထိုလူ၏ နှုတ်ခမ်းပါးပါး ၊နှာတံစင်းစင်း နှင့် မျက်နှာကျပုံကို ရင်းနှီးသလို ခံစားရသည် ။ တစ်ခါမှ မတွေ့ဖူးတာ သေချာသလောက်လည်း ရှိနေပြန်၏။
YOU ARE READING
ရွက်ကြွေ (GL-OC)
Romanceကြွေကတော့ သူဟာ နင်းချေခံ သစ်ရွက်ကြွေလေးလို့ ဆိုပါတယ်။ ကျွန်မအတွက်ကတော့ ကြွေဟာ ကဗျာတစ်ပုဒ်ရှိတဲ့ စာမျက်နှာမှာ မြတ်မြတ်နိုးနိုး သိမ်းထားချင်မိတဲ့ ရွှေရောင် ရွက်ကြွေလေးတစ်ရွက်လိုပါပဲ ။