ODESSA'S REDEMPTION: Games Of The Gods (Odessa's Redemption Trilogy Book 3)

Chapter 45: AMANG SUBA

Ginising ng isang napakalakas na sigaw si diyosang Tala. Kaagad ay naupo siya sa kinahihigan at sinubukang tumayo, pero naroroon sa tabi niya si diwatang Ylaya at pinigilan siya nito. Nakalagay ang hintuturong daliri nito sa ilalim ng kanyang ilong at harapan ng kanyang mga labi at hindi na iyon kailangan pang ipaliwanag ang ibig sabihin nito.

"Sshhh..." sabi ni Ylaya habang nakahawak siya sa balikat ng diyosa.

Muli ay umalingawngaw sa madilim na kagubatan ang nakapangingilabot na sigaw ng isang babae. Napatingin si diyosang Tala sa diwata na hindi pa rin makapaniwala kung sino ang nasa tabi niya at nagligtas sa kanya mula sa halimaw. Iniligtas siya ni Ylaya, ang reyna ng Elitheria.

Napukaw ang pansin ng diyosa nang mula sa mga sanga ng napakataas na puno ay tila isang maliksing hayop na nagpalipat-lipat ang isang matipunong lalaki. Ni kaluskos ay hindi man lang ito nakagawa ng ingay habang umiigpaw sa mga naglalakihang sanga ng puno. Tila isang tuyong dahon na lumapag sa lupa ang lalaki at agad na nilapitan ang kanyang reyna. Natatandaan ni diyosang Tala ang lalaki dahil ito ang kasama ni Ylaya nang iniligtas siya sa kamay ng halimaw na si Burac.

"Kailangan na po nating umalis dito mahal na Reyna," ang halos pabulong na wika ni Awen, tumingin siya kay diyosang Tala saka nagbigay pugay. "May mga rumorondang mga sarangay sa paligid at may natiyempuhan silang mga manlalakbay," dagdag pa niya.

"Kung gayon, tawagin mo na ang kabayong si Aki at mauna na kayo ni diyosang Tala," ang nababahalang tugon ni Ylaya kay Awen.

Nanatiling nakikinig lamang si diyosang Tala kina Ylaya. Batid niya na mas alam ng dalawa ang kanilang gagawin dahil parehong nilalang ng kagubatan ang dalawa. Kaagad namang tinawag ni Awen ang tikbalang-gubat na si Aki gamit ang isip.

Marahang tumayo na sina Ylaya at diyosang Tala para ihanda ang sarili sa paglikas. Kahit na makulimlim sa loob ng kagubatan ay alam ni Ylaya na malapit na sa paglubog ang araw. Mas mapanganib sa kanilang paglalakbay papunta sa Euseia kapag sumapit na ang gabi. Kaya, nag-aalala ang diwata para sa kalagayan mg diyosa na mahina pa mula sa pakikipaglaban kay Burac.

Tumingin si Ylaya kay Awen na abala sa pagtawag kay Aki. "Awen--" ang mahinang sambit sa pangalan ng lalaking diwata.

Kaagad namang lumapit si Awen nang marinig ang mahinang tawag sa kanya ni Ylaya. Marahang lumapit naman sa kanila ang diyosang si Tala para alamin na rin kung ano ang nangyayari sa kinaroroonan nila.

"Lubhang mapanganib para sa kondisyon po ninyo ang kagubatang ito pagsapit ng gabi, mahal na diyosa. Kaya bago pa lumubog ang araw sa mga kabundukan ay kailangan tayong makahanap ng pansamantalang matutuluyan," ani Ylaya sa diyosa.

"Ha? Pero papaano tayo makakakita ng matutuluyan sa napakalawak na kagubatan na 'to, diwatang Ylaya? Saka kaya ko pa ring makipaglaban sa kung ano mang mababangis na nilalang ang naririto " tugon ni diyosang Tala sa sinabi sa kanya ni Ylaya.

"Ipagpaumanhin po ninyo mahal na diyosang Tala. Hindi na po kasi tayo aabot sa Euseia. Saka, bago pa man po kayo nawalan ng malay kanina ay ibinulong na sa akin ng hangin ang tungkol sa pagsalakay sa Euseia ng mga anak ng buwan. Iyan ay sa pamumuno ng inyong kapatid na si Banaual,"

"Si Banaual, yung tungkod ni amang Bathala ay nasa kanya. Kailangan ko iyong mabawi mula sa kanya, kailangan natin pumunta sa Euseia sa lalong madaling panahon."

"Mahal na diyosa, pero mahina pa po kayo. Hindi niyo pa kaya ang maglakbay ng malayo nang hindi pa nanunumbalik ang inyong lakas at kapangyarihan," ang pagtutol ni Ylaya sa kagustuhan ng diyosa na pumunta sa nasabing siyudad.

"Kakayanin ko, kahit ikamamatay ko pa makuha ko lamang kay Banaual ang tungkod ni ama," dahilan ni diyosang Tala na magpupumilit na makapunta sa lungsod ng Euseia.