(Unicode)
မနက်စောအချိန်အခါဝယ် သစ်ရိပ်ဝါးရိပ်များဖြင့်စိမ်းစိုလန်းဆန်းနေတဲ့ပတ်ဝန်းကျင်တစ်ခွင်၌ ခြူသံခလောက်သံများ နွားမောင်းသံများအပြင် တောဓလေ့အရစောစောစီးစီးလယ်ထဲသွားနေကြတဲ့လယ်သမားများရဲ့ပုံရိပ်က မနက်ခင်းရဲ့အလှကိုအသက်ဝင်စေခဲ့သည်။
မနက်လင်းကြက်တွန်တဲ့အချိန်ကစပြီး ဆွမ်းချက်သူကချက် လယ်ထဲသွားဖို့ပြင်ကြသူကပြင်နဲ့အလုပ်ရှုပ်နေကြသူများထဲတွင် ဒေါ်အေးသွယ်လည်းအပါအဝင်သာဖြစ်သည်။မနက်စောစောဘုရားရှစ်ခိုးရန်အတွက် ဒေါ်အေးသွယ်ပြင်ဆင်နေခဲ့ရာ သောက်တော်ရေနဲ့ဆွမ်းတော်ကိုသေချာသပ်ရပ်စွာပြင်ဆင်ပြီးမှ သူမဘုရားစင်အရှေ့သို့ထိုင်လိုက်သည်။
ဘုရားစင်ရှေ့တွင်ဒေါ်အေးသွယ်လက်အုပ်လေးကိုရိုသေစွာချီ၍ ဘုရားရှစ်ခိုးရန်အသင့်အနေအထားဖြင့်.....
"နမော"
"မေမေလေးရေ ဒီမှာလာကြည့်ပါဦး မေမေလေးသားသမီးဘော်လီတွေယူဝတ်နေတယ်"
လက်အုပ်ချီလျက်ဖြင့် ဘုရားရှစ်ခိုးရန်အစချီနေတဲ့ဒေါ်အေးသွယ်'နမော'ဘဲဆိုရသေး ခုနှစ်အိမ်ကြားရှစ်အိမ်ကြားကြားထွက်ပေါ်လာတဲ့မေမိုးအသံစာစာလေးကြောင့် ဆိုလက်စဘုရားစာပင်ဆက်မဆိုနိုင်တော့ကာ လက်အုပ်ချီလျက်သားဖြင့်သက်ပြင်းသာခပ်ပြင်းပြင်းချလိုက်မိသည်။
"ဟင်း"
သူမမှဒီကိစ္စထဲဝင်မပါရင် မေမိုးဆက်အော်မှာအသေအချာပေ၊ပတ်ဝန်းကျင်ကိုလည်းမျက်နှာပူရမည့်ကိစ္စမျိုးမဖြစ်စေရန်မေမိုးအားဆင်းတားရန်အတွက်ဒေါ်အေးသွယ်လက်အုပ်ပြန်ချီပြီးဘဲ ရှင်ခိုးတောင်းပန်ရပြန်သည်။ဤပုံနဲ့ဆိုဘုရားလဲကောင်းကောင်းရှင်ခိုးနိုင်မှာမဟုတ်တာနဲ့တော့ တောင်းပန်ပြီးရပ်လိုက်တာကမှတော်ဦးမည်။
"တပည့်တော်မ ခဏနေမှပြန်လာရှစ်ခိုးပါမယ်ဘုရား" ဟုဆိုကာဦးချတောင်းပန်ပြီး ဒေါ်အေးသွယ်ဘုရားခန်းထဲကထွက်လာခဲ့သည်။
အိမ်အပေါ်ထပ်မှဒေါ်အေးသွယ် ခပ်မှန်မှန်လျှောက်လှမ်း၍လာနေသော်လည်း သူမဒေါသကတော့ခပ်မှန်မှန်ဖြစ်နေ့သည့်အခြေအနေမဟုတ်ချေ။မနက်စောစောစီးစီးကြည်လင်နေတဲ့စိတ်များပင် ဒေါသအဖြစ်ပြောင်းလဲကာအသံလာရာအောက်ထပ်သို့ဆင်းလာခဲ့သည်။သူမလှေကားရင်းအရောက်တွင် လှေကားတစ်ဘေးမှာအသင့်ရှိနေတဲ့ကြိမ်လုံးကိုဆွဲယူပြီး အသံလာရာမေမိုးအခန်းဆီကိုလာခဲ့၏။
