(Unicode)
"ငါမရှိတုန်းမင်းသခင်ကိုဂရုစိုက်ရမယ်နော်"
"အာဝု..."
"ဟ ဒီကောင်ကြီးနားလည်တယ်ကြည့်စမ်းပင်တိုင်"
အိမ်ပေါ်ကဆင်းလာတဲ့ပင်တိုင့်ကို လင်းခေးနဲ့တုတ်ပေါခေါင်းလေးတွေမော့ကြည့်လျက်။လင်းခေး တုတ်ပေါကိုစကားတွေပြောပြီး သဘောတွေကျနေပြန်ကာပင်တိုင့်ကိုပြန်ပြောနေလိုက်သေးသည်။
သွားခါနီးလာခါနီး တုတ်ပေါနဲ့ဆော့နေတဲ့လင်းခေးကိုကြည့်ပြီး ပင်တိုင်ခေါင်းလေးသာဘယ်ညာရမ်းမိသွား၏။သက်ပြင်းလေးလည်းချလျက်....
"တုတ်ပေါကနားလည်မလားကိုကိုရဲ့ ဆော့မနေတော့နဲ့ရထားမမှီဘဲနေလိမ့်မယ်"
လင်းခေးအတွက်ယူလာတဲ့ခရီးဆောင်အိတ်လေးကိုသာ ပင်တိုင်ကမ်းပေးရင်းပြောလိုက်လေသည်။
တုတ်ပေါအနားကလင်းခေးလည်းထလိုက်ပြီး ပင်တိုင်ပေးလာတဲ့ခရီးဆောင်အိတ်လေးကိုသာယူလိုက်၏။ထို့နောက်ပင်တိုင့်ပခုံးလေးကိုသာဖက်လျက် ခြံအပြင်ကိုထွက်လာခဲ့ကြသည်။သူတို့နှစ်ယောက်ဘေးလိုက်ပါလာတဲ့တုတ်ပေါမှာလည်း အမြှီးလေးတနှံ့နှံ့နဲ့သာ။
ခြံအပြင်ရောက်မှ လင်းခေး ပင်တိုင့်ကိုဖက်ထားရာမှလွှတ်လိုက်ပြီး ခြံတံခါးကိုသာပိတ်နေခဲ့သည်။
"သွားတော့မှာလား"
လင်းခေးခြံတံခါးပိတ်နေချိန်
ကိုကျော့မြိုင်နဲ့အစောတို့ပါ ခြံရှေ့ကိုရောက်လာကြလေသည်။ပင်တိုင်ခေါင်းလေးငြိမ့်ပြီး ကိုကျော့မြိုင်နဲ့အစောကိုပြန်ဖြေနိုင်ပေမဲ့ ခြံတံခါးပိတ်နေရသေးတဲ့လင်းခေးကတော့ ကိုကျော့မြိုင်တို့ကိုတောင်ပြန်မဖြေအား။တံခါးပိတ်ပြီးမှသာ ကိုကျော့မြိုင်တို့ဘက်လှည့်ကာပြန်ဖြေနိုင်လေသည်။
"ပင်တိုင်က ရထားနောက်ကျမှာဆိုးလို့တဲ့အကိုကျော့မြိုင်ရေ"
"ဟုတ်တယ်လေကွာ စောသွားထားလို့မမှားပါဘူး"
ကိုကျော့မြိုင် ပင်တိုင့်ဘက်ကဝင်ထောက်ခံတော့ ပင်တိုင်မေးလေးပင့်လျက်တောင်လင်းခေးကိုကြည့်လိုက်သေးသည်။