عودة فاينا

تحديث مهم!

علشان بس اخلي ذمتي من اي شئ ولان الموضوع منتشر بقاله فترة بشكل مستفز انا قررت اخرج عن صمتي واقول الآتي:

1- الناس اللي بتقول ليه التطبيل علي الرواية وانها اقل من عادية ومش مستهلة كل الكلام والانبهار دا، دا رأيك انت حر فيه طبعاً انك متعجبكش رواية وتقول الكلام دا بس قبل ما تقول الكلام دا ياريت تقول محبتهاش علشان واحد اتنين تلاتة مش محبتهاش وخلاص! يا سيدي عنها ما عجبتك! اللي اعرفه انك طالما ما حبتش الرواية متقرهاش عادي جداً لكن تطلع تجرح في الرواية دا تصرف طفولي وحاقد لا مبرر له.

2- الناس اللي متضايقة ان كل النساء في الرواية عذراوات لم يسبق لهم الدخول في علاقات جنسية ف دا شئ غريب جداً يعني انا مابحبش اكتب عن نساء متعددت العلاقات وانا حرة في دا ليه؟ لانها روايتي وكده لو مكنتش واخد بالك ومش لازم اطلع البطلة نامت مع طوب الارض علشان تبقي حلوة واه يا جماعة في عائلات كتيرة البنات بتفضل فيها عذراوات لحد الزواج متخلوش الافلام تأكل عقلكم وتهيئلكم ان الكل بينام مع الكل لان دا فيه بعض الصدق ولكن مش الكل!

3- الناس اللي قفشت في قضية أوليفر وان ازاي عائلة مافيا ونفوذ وفلوس معرفوش يعملوا حاجة لابنهم ف هقولك ان الفصول الاولي كلها محتاجة تعديل مكثف ليه؟ لانها الفصول دي اتكتب قبل سنة كاملة اكيد كتابتي دلوقت مش ذي كتابة اول كام فصل في الرواية الناس بتطور وكده! وانتوا اصلاً بتقروا الرواية في نسختها الاولي مش النسخة المعدلة والنسخة المعدلة اصلاً اصلاً مش هتنزل علي الواتباد!

4- اما الناس بتوع في اخطاء والسرد ضعيف وهكذا.. لو مش عاجبك متقرأش الموضوع بسيط جداً لأن السرد مش ضعيف بشهادة ناس كتير والناس اللي بيحبوا الرواية شكروا في السرد اللي مش عاجبك ف عادي يعني مش عاجبك متقراش!

5- الناس بقي بتوع الفصول مملة وكده... مهو الاحداث اللي انت شايفها مملة دي لو متكتبتش مش هتتحرك الأحداث! ثم انا مكتبتش حاجة إلا وكان ليها علاقة بحبكة الرواية وكل شئ متصل ببعضه!

6- الناس اللي حابة تقرأ عن البطل والبطلة فقط معلش يا جماعة دا مش في روايتي لاني زهقت من تهميش الشخصيات الاخري لمجرد انهم مش الابطال! كل شخصية ليها حكايتها اللي يستاهل انها تتحكي!

7- القراء  اللي بيقولوا البارت قصير وكده، علي عيني وراسي وعارفة انهم بيقولوا كده من حبهم في الرواية بس مش معقول يا جماعة ان تبقي اغلب الكومنتات كده! انا بني ادمة زيي زيكم عندي حياة خارج الكتابة وخارج الواتباد.. عندي دراسة وشغل غير البيت والمسئوليات الاخري فالفصول عندي دائماً ما تتعدي ال 3000 كلمة دا الحد بتاع كل فصل.. الفصل زاد عن 3000 كلمة خير وبركة وحصلت كتير جداً ان فصول وصلت ل 4000 و 5000 و 6000 و7000 كلمة... وبرضو عادي ان الفصل يوصل ل 3000 كلمة فقط المهم ان الفصل ميقلش عن ال 3000 كلمة دا الحد بتاعي.

8- واخيراً هكرر اللي مش عاجبه الرواية ببساطة لا يقرأها.. عاوز ينتقد ينتقد انتقاد بناء لكن محبتش الرواية كده علشان مزاجي؟ طب انا كاتبة الرواية كده علشان مزاجي بردو!!!