صباح الخير 🤍
كان في كام حاجة حابة أوضحها في العموم علشان شوفت كذا حد بيتكلم عنها من وسط الكومنتات الكتيرة اللي بتدخل السرور إلي قلبي ربنا يسعدكم ❤️🫶🏻
١- الفصول بتنزل كل اسبوعين ليه؟ وليه منزلش كل أسبوع؟
في الحقيقة دا كان طلب القراء لان لو حد بيقرا الرواية منذ البداية هيعرف انها كانت بتنزل اسبوعياً فصل ٣٠٠٠ كلمة ولكن البعض رأى الفصل قصير فتوصلنا لحل فصل كل اسبوعين من ٦٠٠٠ كلمة يعني بمقام فصلين وما شاء الله من ساعتها بينزل فصول ٧٠٠٠، ٨٠٠٠ و٩٠٠٠ كلمة كمان، يعني ما يعادل ثلاثة فصول او اكثر... يعني فصل كل اسبوعين بيبقي تعوض اكثر من كافي لانه بيعادل من ٤ ل ٦ فصول شهرياً!
هذا بالاضافة اني بكتب في رواية تانية يا شباب وعندي حياة وكده 😂 والله لو الروايات كانت خلصانة كنت نزلت فصل كل اسبوع عادي بس دي لسه بتتكتب 🥹🤷🏻♀️
٢- جالي كومنتين حرفياً بيقولوا اني برغي في الفاضي والاحداث بطيئة وازاي بقالهم شهر مستنيين معرفة مصير غريس ألخ...
هو انا مش عارفة لما حد بيكتب كومنت زي دا منتظر رد يكون عامل ازاي؟ ويختموا الرسالة بأن الرواية حلو بس انتي بترغي في الفاضي 💀😂
بس تمام هرد عموماً لانه من الواضح أن البعض غايب عنه معلومة ان الرواية شخصيتها كتيرة جداً، وكل شخصية لها قصة، ومليانة ثنائيات والجميع مشتركين في الحبكة... يعني الرواية مش عن الابطال فقط وفي الوقت اللي بتحصل في أحداث معينة معاهم في احداث اخرى بتحصل مع باقي الشخصيات... هو انا لازم اكتب بعد مرور شهر... سنة... سنتين علشان يبقى حلو؟ ولا اكروت الأحداث واكروتك كقارئ؟ بقي كل المشاعر اللي بجاهد علشان اوصلها لك كقارئ كلام فاضي؟ يعني دي طريقة كتابتي منذ البداية بهذا الشكل وليس بمفاجأة ف ليه الكومنتات دي في الفصول الحاجة وخمسون؟
٣- بكاء ألكساندر... رد فعل أوين وفريدريك علي واقعة تسمم غريس:
-البعض يقول الرجل لا يبكي ولكن لا قدر الله لو حد حط نفسه مكان ألكساندر امه اختفت من سنين وكان فاكرها ميتة، اكتشف وهو يقارب عقده الثالث أنها عاشت حياة عبيد ولا يعرف مدى خطورة وضعها هذا بالاضافة انها رفضته وابتعدت عنه كالطاعون لما افتكرها هتحضنه لأول مرة منذ سنوات... دا اير معاناته عموماً كل السنوات اللي فاتت من حياته ومع ذلك مازال يقف على ساقيه رغم شعوره بالضياع...
دا غير اني بحب اوضح عادي ان الراجل ممكن يبكى لأنه بشر زيه زينا ولازم نكسر القوالب المجتمعية اللي بتصور أن البكاء عيب ولا يصلح للرجال وأن من يبكي لا يكون رجلاً!
-فريدريك اتحرك عشان شاف فاينا في غريس ودا ذكرته في الفصل أن سبب تحركه تجربته مع فاينا... فريدريك كان بيحاول انه ينقذها علشان ميعدش الماضي نفسه وهو واقف مكتوف الأيدي وفاينا مختفية...
-أوين وقف مكانه من صدمته...ودا بردو ذكرته في الفصل انه مش مصدق ان الماضي بيتعاد للمرة الثالثة مع ابنه الثاني وكأن كل نسله ملعون بمفارقة من يحبوا... وقف مكانه مصدوم وخايف... اه خايف علي ابنه من الموقف اللي مر بيه هو وألكساندر قبله... كان شايف معاناته هو وألكساندر امام عيناه في تلك اللحظة لذلك تجمد مكانه... وبكى علي شارلوت التي انهارت بين يديها لان لو تتذكروا أن فريدريك قال إن أوين عفي شارلوت من شغل المافيا وأنه هو وأوين كانوا بيتعاملوا مع اخواتهم كَـ أولادهم لأن والدهم كان وحش بلا قلب ولا رحمة.
جميعهم بشر لديهم مشاعر وليست القوة ابداً عدم البكاء او الشعور بالألم لان هذه مشاعر انسانية طبيعية والجميع مر بصدمات ومواقف لا يحسدوا عليها...
٤- الناس اللي بتقول علي فصل يتعدى ال٨٠٠٠ كلمة قصير... أنا مش هرد هسيبكوا لضميركوا يحاسبكوا على الكلام دا 💀😂🤌🏻
اتمني تكون الامور وضحت ونتحرى اللطف قبل أن نتحدث ❤️
YOU ARE READING
عودة فاينا
Romance"هل تعتقد أنك قوي لمحاربتك بعض البشر؟.. فقط جرب محاربة أفكارك مثلي" -فاينا فيدور نيكولاييف. ♠ ♠ ♠ ♠ ♠ ♠ في عالم المافيا، الثقة ممنوعة ويؤدي تجاهل هذه القاعدة إلى السقوط في مستنقع من الغدر والخيانة حيث يُجبر الأبرياء على سفك الدماء.. اختفت فاينا، وهي...
