Snowless Winter Dream [Completed]

Chapter 18

Victory ဘားထဲ၌ လူပေါင်းများစွာ ခြေချင်းလိမ်နေသည့်အထဲတွင် ရိုင်းလ်၏ နောက်လိုက်တွေပါ ချက်ချင်းရောက်လာခဲ့ကြသည်။

သခင်လေး၏ အမိန့်အတိုင်း ဘားထဲကို မြေလှန်ရှာခဲ့ကြတာမို့ မိနစ်ပိုင်းအတွင်းပင် ဆေးခတ်သော ကောင်လေးအား ရိုင်းလ် ရှာတွေ့ခဲ့သည်။

ထိုဝန်ထမ်းကောင်လေးခမျာ သူ အခုလို ချက်ချင်းမိသွားရမယ်ဟု မတွေးမိခဲ့တာကြောင့် လူမိုက်အုပ်စုကြား၌ ခြေမကိုင်မိ လက်မကိုင်မိ ဖြစ်နေစဉ် ရိုင်းလ် ထိုကောင့်ရှေ့ ရောက်ရှိလာခဲ့သည်။

"ဒီ‌ကောင်လား"

"ဟုတ်တယ် သခင်လေး၊ ဒါပေမဲ့ ဒီကောင်က ပိုင်ရှင်ကို ရည်ရွယ်တာတော့ မဟုတ်ဘူးတဲ့"

ထိုကောင်လေး အမြန်ဖြေရှင်းလိုက်မိသည်။

"ကျွန်တော် ဧည့်သည်ခွက်ထဲ ထည့်ခိုင်းလို့ ထည့်ရုံပါ။ ဘားပိုင်ရှင်ကိုတော့ ခုလို တကယ် မလုပ်ရဲပါဘူး"

ထိုဝန်ထမ်းကောင်လေးက သျှိုင်းစက်မာန်ထက်စာရင် ညတိုင်းပွဲရှာကြမ်းသည့် ရေးခေတ္တရာကိုသာ ပိုကြောက်မိပါသည်။

ရိုင်းလ်၏ မျက်ခုံးများ အလိုမကျစွာ တွန့်ချိုးသွားသည်။ ရိုင်းလ် ထိုကောင့်အား အခန်းနံရံဆီသို့ လွင့်ထွက်သွားအောင်အထိ ကန်ထုတ်ပစ်လိုက်ရင်း-

"မင်းကများ ငါ့ကို လုပ်ရဲတယ်ပေါ့။ ပြော၊ ငါ့ကို ဘယ်‌ကောင်က ဒီလိုလုပ်ခိုင်းရဲတာလဲ"

ရိုင်းလ် သူ့အား ရည်ရွယ်ချက်ရှိရှိ လုပ်တာဆိုရင်တော့ ဟိုအူကြောင်ကြောင်ကောင်ကိုသာ မြင်ယောင်လိုက်မိပေမယ့် သူ့ကို ဆေးခတ်ရင် အဲ့ကောင် သူ့သူငယ်ချင်း ဒုက္ခရောက်သွားနိုင်တယ်ဆိုတာ မတွေးမိခဲ့လေသလားပဲ။

ရိုင်းလ် ထင်သည့်အတိုင်း ထိုကောင်လေးက ခပ်ကြောက်ကြောက်လေးမို့ သူ့လူငါးယောက်အား တစ်‌ယောက်တစ်ချက်စီ ငါးချက်လောက် နဘန်ကျင်းခိုင်းပြီးချိန်မှာတော့ သျှိုင်းစက်မာန် လုပ်ခိုင်းသွားတာကို ဝန်ခံလာခဲ့သည်။

"တောက်. . .ဒီကောင် တကယ် သေချင်နေပြီ"

ရိုင်းလ် ထိုကောင့်ဖုန်းနံပါတ်ကို ‌မေးလိုက်ပြီး ဖုန်းခေါ်ဆိုလိုက်ရသည်။