Snowless Winter Dream [Completed]

Extra (2)

ဆေးရုံအမည် - ရေးခေတ္တရာ
ဆေးရုံတည်နေရာ - ရန်ကုန်မြို့

ရေးခေတ္တရာဟု အမည်တွင်သည့် ဆေးရုံထဲ၌ ဂျူတီကုတ်အဖြူဝတ်ဆင်ထားသည့် ဒေါက်တာ ရိုင်းလ်စေတန်၏ အညိုရောင် မျက်ဝန်းများက ပျော်မြူးရိပ်တွေ ပြည့်လျှံနေလျက်။ ဂျူတီကုတ်အောက်ရှိ ခြေတံရှည်များက သူ့ဦးတည်ရာနေရာဆီသို့ အမြန်ရောက်ဖို့အတွက် တာဝန်ကျေစွာ ထမ်းဆောင်နေကြသည်။

ရိုင်းလ်စေတန် ဆေးရုံ၏ အမြင့်ဆုံးထပ်၌ တည်ရှိသည့် ဆေးရုံအုပ်၏ ရုံးခန်းဆီသို့ လျင်မြန်စွာ တက်လာခဲ့သည်။

နောက်ဆုံးတော့ သူ နှစ်ပတ်လုံး လွမ်းနေခဲ့ရသည့် ဒီဆေးရုံအုပ်ဖြစ်သည့် သူ့လိပ်ပြာလေးက သူ့ရင်ခွင်ထဲ ပြန်လည်ပျံသန်းရောက်ရှိလာခဲ့ပြီ။

ရုံးခန်းထဲ၌ ဖိုင်တွဲတွေစစ်ရင်း ရပ်စောင့်နေခဲ့သည့် ရေးခေတ္တရာတစ်ယောက် ဘယ်သောအခါမှ မရိုးနိုင်ဆဲ လာဗင်ဒါနံ့တွေ စွဲနေတတ်သည့် ကိုယ်သင်းနံ့အား ရလိုက်ချိန်၌ ချက်ချင်း နောက်လှည့်ကြည့်လိုက်မိသည်။

ထို့နောက် သူ့ထံသို့ အပြုံးတွေဖြင့် လှမ်းလာသည့် လက်နှစ်ဖက်နောက်ပစ်ကာ လျှောက်လာနေသော ကိုကို့ကို တွေ့လိုက်ရတာကြောင့် ရေး သူ့လက်နှစ်ဖက်အား ဘေးသို့ ချက်ချင်းဆန့်ကားပေးထားလိုက်မိသည်။

ရိုင်းလ်စေတန် သူ့လက်နောက်မှ လာဗင်‌ဒါ ပန်းစည်းအား လက်တစ်ဖက်ဖြင့် ပြောင်းကိုင်လိုက်ရင်း ရင်ဖွင့်ပေးထားသည့် သူ့‌အမျိုးသားအား သူ့လက်မောင်းကြားထဲ အမြန်ပွေ့ဖက်ထားလိုက်ရပြီး နှစ်ပတ်လုံး လွမ်းနေရသည့် ကောင်လေး၏ လည်တိုင်ထက်သို့ နှာခေါင်းနစ်ဝင်လိုက်မိတော့၏။

"ကိုယ် မင်းကို လွမ်းလိုက်ရတာကွာ။ ရော့. . .ဒါ ဘေဘီ အိမ်ပြန်လာတာကို ကြိုဆိုတဲ့အနေနဲ့ မနက်က ဝင်ဝယ်လာခဲ့တာ"

ရေး ကိုကို့လက်ထဲက လာဗင်ဒါပန်းစည်းကို တစ်ချက်ငုံ့နမ်းလိုက်ပြီး ကိုကို့နှုတ်ခမ်းတွေကိုတော့ ခြေဖျားထောက်ရင်း အဆက်မပြတ် တဖွဖွ လှမ်းနမ်းနေမိ၏။

ဒီအမျိုးသားရဲ့ ကိုယ်သင်းနံ့ရမှပဲ ရေး သူ လွမ်းနေတာတွေ အနည်းငယ် နေသာထိုင်သာ ရှိသွားတာကြောင့် နောက်ဆို ကိုကို့ကို အကြာကြီးထားခဲ့ပြီး လျှောက်မသွားတော့ဖို့ပင် ဆုံးဖြတ်ထားလိုက်မိသည်။