အခန်း ၄၁။ လွန်ခဲ့တဲ့နွေရာသီတွေမှာနင်ဘယ်လိုလူလဲငါသိခဲ့ရတယ်
ဆိတ်ငြိမ်ရပ်ကွက်တစ်ခုရဲ့လမ်းကြားလေးထဲကို သိင်္ခရဲ့ကားလေးချိုး၀င်လာခဲ့သည်။ သင်္ကြန်မိုးမရွာသေးတာမို့ ပိတောက်ပင်များက တစ်ပင်လုံးရွက်နုတွေဝေပြီး စိမ်းလန်းတောက်ပနေသလောက် ငု၀ါတွေကတော့သူတို့အလုပ် သူတို့လုပ်ကြရင်း လမ်းကြားလေးထဲမှာဝေဝေဆာဆာပွင့်ဖူးနေကြပြီဖြစ်သည်။လမ်းနာမည်ကပိတောက်ရိပ်တဲ့…ပိတောက်ပန်းတွေမရှိသေးချိန်လမ်းကလေးကိုအလှဆင်ပေးနေကြသူများကငုဝါများဖြစ်ကြတော့ အခုချိန်မှာ ငု၀ါလမ်းသွယ်လို့သာခေါ်သင့်ပါသည်။
ဒီလမ်းကြားလေးထဲရောက်လာတိုင်း စိတ်ထဲမှာငြိမ်းချမ်းသွားလောက်အောင် အလှတရားတွေနဲ့ထုံမွှန်းနေသည်။ ဒီလမ်းကြားလေးထဲမောင်းနှင်လာရတဲ့ မိနစ်ပိုင်းကလေးမှာရတဲ့ ရင်ထဲကကြည်လင်အေးမြချမ်းမြေ့ခြင်းတွေကို သိင်္ခတော့သိပ်သဘောကျမိပါသည်။စိတ်ကူးယဥ်ပုံပြင်ထဲကလမ်းကလေးဖြစ်နေလို့လား၊ တစ်ယောက်သောသူရဲ့အိမ်ကိုအရောက်သွားရာ အတိုဆုံးလမ်းဖြစ်နေ၍လားတော့မသိပါ။
နှစ်မျိုးစလုံးကြောင့်ဖြစ်နိုင်ပါသည်။ နှစ်မျိုးစလုံးကြောင့်ပဲဖြစ်ပါလိမ့်မည်။ သိင်္ခရဲ့ကားချိုး၀င်လိုက်ပြီးမကြာခင်လမ်းကြားလေးထဲကနေထွက်လာတဲ့မိန်းကလေးတစ်ယောက်နှင့်ဆုံသည်။ ငု၀ါတွေအလှကြီးလှနေတဲ့ လမ်းကြားလေးထဲမှာ ငု၀ါရောင်ဂါ၀န်ကလေး၀တ်ထားသည့်သူက အပင်ပေါ်ကကြွေကျလာတဲ့ ပွင့်ဖက်ကလေးတစ်ခုလိုပဲ။ နုနုယွယွလှပတင့်တယ်ပေသည်။ ထိုမိန်းကလေးကို အာရုံစိုက်မိလိုက်တာနဲ့တစ်ပြိုင်နက်မျက်လုံးမလွှဲမိအောင်ငေးမောမိသွားပြီ။သိင်္ခကိုယ်တိုင်တောင်မသိလိုက်မသိဘာ့သာ ပြုံးလိုက်မိပြီ။
ဂါ၀န်ကဒူးအောက်ထိရှည်ပေမယ့်မြန်မြန်သွက်သွက်လှမ်းနေတာမို့တစ်ခါတရံခြေလှမ်းတွေအလစ်မှာ ဖြူ၀င်းနူးညံ့တဲ့လှပခြင်းတွေဟာလှစ်ခနဲ ပေါ်လွင်သွားရသည်။ခြေတိုကလေးလို့အမြဲစနေခဲ့တဲ့ကြောင်ပေါက်ကလေးမှာသွယ်လျှတဲ့ခြေတံတွေရှိတာကိုလည်းသူသတိထားမိတာကြာပါပြီ။ကြက်သွေးရောင်ထီးအနီကလေးကသူ့မျက်နှာကိုမမြင်လောက်အောင်ခပ်ငိုက်ငိုက်စောင်းထားသည်။ ဒါပေမယ့်ကျစ်ဆံမြှီးအတိုကလေးမှာ ငု၀ါရောင်ကလစ်ကလေးပန်ထားတာကအစ နှုတ်ခမ်းပါးလေးမှာပန်းနုရောင်ကလေးချယ်သထားသည်အဆုံး တစ်ခါလှမ်းကြည့်လိုက်မိရုံနဲ့သိင်္ခသတိထားမိသည်။ရန်ကုန်မြို့မှာစော်အလန်းလေးတွေအများကြီးရှိရက်နဲ့ဘာလို့သူတစ်ယောက်ကိုမှနှစ်ခါပြန်ငေးမိတာလဲ…။ တစ်ယောက်သောသူလို့ သိင်္ခသုံးနှုံးမိပါသည်။ သူနဲ့ပက်သက်ရင် သေးငယ်တဲ့အရာလေးတွေကအစ မြတ်နိုးတွယ်တာမိတဲ့ တစ်ယောက်တည်းသောသူပါ…။
![](https://img.wattpad.com/cover/324267524-288-k719227.jpg)
YOU ARE READING
အချစ်တစ်ခုတည်းသာကျန်ရစ်တော့မည်
Romanceသူ့အပေါ်အနိုင်ကျင့်နှောင့်ယှက်နေတဲ့ ဘူလီကောင်လေးနဲ့မှ ချစ်မိပြီးတဲ့နောက်... _______________ သူ႔အေပၚအႏိုင္က်င့္ေႏွာင့္ယွက္ေနတဲ့ ဘူလီေကာင္ေလးနဲ႔မွ ခ်စ္မိၿပီးတဲ့ေနာက္...